អេមីរ៉ាតអារ៉ាប់រួមថា យន្តហោះដ្រូនដែលកំណត់គោលដៅរោងចក្រនុយក្លេអ៊ែររបស់ខ្លួន កាលពីសប្តាហ៍មុន គឺចេញមកពីប្រទេសអ៉ីរ៉ាក់ ពីកន្លែងដែលក្រុមគាំទ្រដោយអ៉ីរ៉ង់
ឌូបៃ៖ បើយោងតាមការចេញផ្សាយដោយទីភ្នាក់ងារសារព័ត៌មាន AFP អេមីរ៉ាតអារ៉ាប់រួម (UAE) បានឱ្យដឹងកាលពីថ្ងៃអង្គារ ទី១៩ ខែឧសភា ថាយន្តហោះដ្រូនដែលកំណត់គោលដៅរោងចក្រនុយក្លេអ៊ែររបស់ខ្លួន កាលពីសប្តាហ៍មុន គឺចេញមកពីប្រទេសអ៉ីរ៉ាក់ ពីកន្លែងដែលក្រុមគាំទ្រដោយអ៉ីរ៉ង់ បើកការវាយប្រហារជាច្រើនអំឡុងពេលនៃសង្រ្គាមមជ្ឈិមបូព៌ា។
ដ្រូនមួយគ្រឿងបានវាយប្រហារម៉ាស៉ីនភ្លើង ជិតរោងចក្រថាមពលនុយក្លេអ៊ែរតែមួយគត់របស់ពិភពអារ៉ាប់ នៅតំបន់ Barakah ទីក្រុង Abu Dhabi កាលពីថ្ងៃអាទិត្យ បង្កឱ្យមានអគ្គីភ័យ ប៉ុន្តែគ្មានអ្នករងរបួស ឬការលេចធ្លាយសារធាតុវិទ្យុសកម្មទេ។ ដ្រូនពីរផ្សេងទៀតត្រូវបានស្ទាក់ចាប់។
តាមក្រសួងការពារជាតិអេមីរ៉ាតអារ៉ាប់រួម «ជាផ្នែកមួយនៃការស៉ើបអង្កេតដែលកំពុងបន្ត ជុំវិញការកំណត់គោលដៅលើរោងចក្រថាមពលនុយក្លេអ៊ែរ Barakah កាលពីថ្ងៃទី១៧ ខែឧសភា ឆ្នាំ២០២៦ លទ្ធផលតាមដាន និងត្រួតពិនិត្យបច្ចេកទេសបញ្ជាក់ថា ដ្រូនទាំង ៣គ្រឿងនោះ មានប្រភពមកពីទឹកដីអ៉ីរ៉ាក់»។
ក្រសួងបានបន្ថែមថា មានដ្រូន ៦គ្រឿងហោះមកពីប្រទេសអ៉ីរ៉ាក់ និងព្យាយាមកំណត់គោលដៅស៉ីវិល និងតំបន់សំខាន់ៗ ក្នុងរយៈពេល ៤៨ម៉ោងចុងក្រោយនេះ៕
