ភ្នំពេញ៖ ឯកឧត្ដម ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យ.ក) បានថ្លែងបញ្ជាក់យ៉ាងខ្លីថា ការងារស្ម័គ្រចិត្តត្រូវការ “ចិត្ត” ។
តាមរយៈបណ្ដាញសង្គមហ្វេសប៊ុក នៅថ្ងៃទី២ កក្កដានេះ ឯកឧត្ដម ហ៊ុន ម៉ានី បានមានប្រសាសន៍ថា ប្អូនៗដែលកំពុងស្ថិតក្នុងឯកសណ្ឋាន ស.ស.យ.ក សុទ្ធតែជាអ្នកដែលមានចិត្ត។ ដ្បិតថាយើងទាំងអស់គ្នា សុទ្ធតែមានការងារស្នូលរៀងៗខ្លួន មានជំនាញ និងការងាររៀងៗខ្លួន មានគោលដៅជីវិតរៀងៗខ្លួន តែអ្វីដែលយើងមានរួមគ្នានោះគឺ យើងមានចិត្ត មានស្មារតីតែមួយ ដែលនោះគឺ ដើម្បីជាតិ និងប្រជាជនកម្ពុជា។
ឯកឧត្ដម ហ៊ុន ម៉ានី បន្តថា ស្មារតីនេះ មិនខុសអ្វីពីអ្វីដែលយើងតែងតែស្គាល់ថា “ស្មារតី២ធ្នូ” ជាស្មារតីនៃការលះបង់ ពុះពារដើម្បីរំដោះជាតិមាតុភូមិចេញពីភ្លើងសង្គ្រាម បន្តស្វែងរកសុខសន្តិភាពជូនប្រជាជន បន្តអភិវឌ្ឍប្រទេសជាតិ និងស្វែងរកសេចក្តីសុខ ក៏ដូចជាសុខដុមរមនីយកម្មជូនជាតិ និងប្រជាជន។
ឯកឧត្ដម ហ៊ុន ម៉ានី បញ្ជាក់ថា «ការមាន “ចិត្ត” បណ្តាលអោយយើងមានឱកាស បានបង្ហាញពីសកម្មភាពនៃការ ចូលរួមក្នុងកិច្ចការងារសង្គម មនុស្សធម៌បានកាន់តែច្រើន ហើយអ្វីដែលអាចកំណត់ពីអនាគត ផ្អែកលើអ្វី (សកម្មភាព)ដែលយើងធ្វើនៅថ្ងៃនេះ ។ អនាគតនោះ គឺជាក្តីស្រមៃ ឬក្តីសង្ឃឹមរបស់បុគ្គលម្នាក់ៗនោះឯង។ ប៉ុន្តែ ប្រសិនយើងបើមិនមានចិត្ត មិនមានការខិតខំប្រឹងប្រែង ការលះបង់ និងការពុះពារ នាពេលបច្ចុប្បន្នទេ បុគ្គលម្នាក់ៗក៏មិនអាចមិនអាច សម្រេចដល់គោលដៅ ឬក្តីស្រមៃដែលខ្លួនប៉ងប្រាថ្នា នៅថ្ងៃអនាគតនោះបានដែរ» ៕
