លោក ស៊ី ជីនពីង ប្រាប់លោក ដូណាល់ ត្រាំថាការវិលត្រឡប់របស់តៃវ៉ាន់ មកនៅក្រោមការគ្រប់គ្រងរបស់ចិនវិញ គឺជាចំណុចស្នូលមួយនៃសណ្ដាប់ធ្នាប់អន្តរជាតិក្រោយសង្រ្គាមលោកលើកទី២
ប៉េកាំង៖ លោក ស៊ី ជីនពីង ប្រធានាធិបតីចិន បានប្រាប់ប្រធានាធិបតីអាមេរិក លោក ដូណាល់ ត្រាំ អំឡុងកិច្ចពិភាក្សាតាមទូរស័ព្ទកាលពីថ្ងៃចន្ទ ទី២៤ ខែវិច្ឆិកាថាការវិលត្រឡប់របស់តៃវ៉ាន់ មកនៅក្រោមការគ្រប់គ្រងរបស់ចិនវិញ គឺជាចំណុចស្នូលមួយនៃសណ្ដាប់ធ្នាប់អន្តរជាតិក្រោយសង្រ្គាមលោកលើកទី២។ បើតាមការចេញផ្សាយដោយទីភ្នាក់ងារសារព័ត៌មានចិន Xinhua។
តាម Xinhua លោក ស៊ី ជីនពីង បានប្រាប់លោក ត្រាំ ថា «ចិន និងសហរដ្ឋអាមេរិកធ្លាប់ប្រកៀកស្មាគ្នាប្រយុទ្ធប្រឆាំងនឹងរបបហ្វាស៊ីស និងយោធានិយម ដូច្នេះឥលូវគួរតែធ្វើការជាមួយគ្នា ដើម្បីការពារថែរក្សាសមិទ្ធផលនៃសង្រ្គាមលោកលើកទី២»។
មន្ត្រីសេតវិមានម្នាក់បានទទួលស្គាល់ថាមេដឹកនាំនៃប្រទេសទាំង២ ពិតជាបានបើកកិច្ចសន្ទនាតាមទូរស័ព្ទប្រាកដមែន តែមិនបាន ផ្ដល់ព័ត៌មានលម្អិតឡើយ។
ការអត្ថាធិប្បាយរបស់លោក ស៊ី ជីនពីងខាងលើទៀតសោត ធ្វើឡើងចំពេលចិន និងជប៉ុនកំពុងមានជម្លោះការទូតនឹងគ្នា បន្ទាប់ពីនាយករដ្ឋមន្ត្រី លោកស្រី Sanae Takaichi បាននិយាយថាប្រសិនបើចិនប្រើកម្លាំងយោធាដើម្បីគ្រប់គ្រងកោះតៃវ៉ាន់ នោះជប៉ុនអាចនឹងធ្វើការឆ្លើយតបដោយយោធា។
ចិនបានចាត់ទុកតៃវ៉ាន់ជាខេត្តមួយរបស់ខ្លួន និងបានព្រមានជារឿយៗថានឹងប្រើប្រាស់កម្លាំងយោធាដើម្បីបង្រួបបង្រួមជាមួយតៃវ៉ាន់ ក្នុងករណីចាំបាច់។ តៃវ៉ាន់វិញបានច្រានចោលការអះអាងរបស់ចិន ហើយថាមានតែប្រជាជនតៃវ៉ាន់ប៉ុណ្ណោះដែលសម្រេចពីជោគវាសនារបស់តៃវ៉ាន់៕
