ប្រធានាធិបតីអ៊ុយក្រែន បំពេញទស្សនកិច្ចទៅកាន់ប្រទេសស៊ុយអែត ដើម្បីពិភាក្សាអំពីកិច្ចព្រមព្រៀងនាំចេញសព្វាវុធ
ស្តុកខុល៖ បើតាមការចេញផ្សាយដោយ ទីភ្នាក់ងារព័ត៌មាន Reuters ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelenskiy ) នៅថ្ងៃពុធនេះបានបំពេញទស្សនកិច្ចទៅកាន់ប្រទេសស៊ុយអែត ដើម្បីពិភាក្សាអំពីកិច្ចព្រមព្រៀងនាំចេញសព្វាវុធដែលអាចកើតមាន ជាមួយនាយករដ្ឋមន្ត្រីស៊ុយអែត លោក អ៊ុលហ្វ គ្រីស្ទ័រសុន (Ulf Kristersson) នៅឯក្រុមហ៊ុនឧស្សាហកម្មការពារជាតិ Saab។
នាយករដ្ឋមន្ត្រីស៊ុយអែត ថ្លែងថា «យើងនឹងពិភាក្សាអំពីកិច្ចព្រមព្រៀងនាំចេញដ៏ធំមួយរបស់ស៊ុយអែត»។ ក្រោយមក លោកបានបញ្ជាក់ថា លោក និងលោក ហ្សេលេនស្គី នឹង «ពិនិត្យមើលយន្តហោះចម្បាំងដ៏ល្អបំផុតមួយនៅលើពិភពលោក» ដែលជាយន្តហោះ JAS 39 Gripen ផលិតដោយក្រុមហ៊ុន Saab។
គួរបញ្ជាក់ថា នាយករដ្ឋមន្ត្រីស៊ុយអែតធ្លាប់បានបញ្ជាក់កាលពីមុនថា ការ «ផ្តល់» យន្តហោះ Gripen ឱ្យអ៊ុយក្រែន មិនមែនជាជម្រើសនាពេលបច្ចុប្បន្នទេ ប៉ុន្តែការណ៍នេះមិនបានបដិសេធចំពោះលទ្ធភាពនៃការបញ្ជាទិញនោះទេ។ លទ្ធភាពនៃការផ្គត់ផ្គង់យន្តហោះ Gripen ត្រូវបានពិចារណាអស់រយៈពេលពីរឆ្នាំមកហើយ ហើយអ្នកបើកយន្តហោះអ៊ុយក្រែនក៏ធ្លាប់បានមកធ្វើតេស្តសាកល្បងនៅប្រទេសស៊ុយអែតរួចហើយដែរ៕
