កប៉ាល់មួយចំនួនដែលដឹកប្រេងអ៉ីរ៉ង់ បានចាប់ផ្តើមចាកចេញពីតំបន់ដែលត្រូវបានបិទខ្ទប់ដោយយោធាអាមេរិក នៅច្រកសមុទ្រ Hormuz ហើយ

មជ្ឈិមបូព៌ា៖ បើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃពុធ ទី១៧ ខែមិថុនា ឆ្នាំ២០២៦ បានបញ្ជាក់ថា កប៉ាល់មួយចំនួនដែលដឹកប្រេងអ៉ីរ៉ង់ បានចាប់ផ្តើមចាកចេញពីតំបន់ដែលត្រូវបានបិទខ្ទប់ដោយយោធាអាមេរិក នៅច្រកសមុទ្រ Hormuz ហើយ ពីរថ្ងៃមុនពេលភាគីទាំង២ ត្រូវចុះកិច្ចព្រមព្រៀងបឋម ដែលសំដៅបិទបញ្ចប់សង្រ្គាមដែលផ្ទុះឡើង តាំងពីចុងខែកុម្ភៈ។

វែបសាយតាមដានកប៉ាល់ TankerTrackers បានបង្ហាញថា កប៉ាល់យក្ស២គ្រឿងរបស់ក្រុមហ៊ុនកប៉ាល់ដឹកប្រេងអ៉ីរ៉ង់ NITC ឈ្មោះ DIONA និង HERO2 បានធ្វើដំណើរចេញផុតបរិវេណដែលត្រូវបានបិទខ្ទប់ដោយកងទ័ពជើងទឹកអាមេរិក ហើយផ្ទុកប្រេងឆៅសរុបចំនួន ៣,៨លានបារ៉ែល។ ក្រោយមក វែបសាយដដែល បានឱ្យដឹងទៀតថា កប៉ាល់ដឹកប្រេងទី៣ ក៏បានចាកចេញផុតផងដែរ។

បើតាមវែបសាយ TankerTrackers វាគឺជាការនាំចេញប្រេងឆៅអ៉ីរ៉ង់ដំបូងបំផុតក្នុងរយៈពេល២ខែ ពោលគឺចាប់តាំងពីសហរដ្ឋអាមេរិកអនុវត្ត ការបិទខ្ទប់លើកប៉ាល់អ៉ីរ៉ង់ ឆ្លើយតបការដែលអ៉ីរ៉ង់បិទខ្ទប់ច្រកសមុទ្រ Hormuz ដែលជាច្រកដ៏សំខាន់នៃការដឹកជញ្ជូនប្រេងនិងឧស្ម័នរបស់ ពិភពលោក ក្រោយរងការវាយប្រហារពីអាមេរិកនិងអ៉ីស្រាអែល កាលពីថ្ងៃទី២៨ ខែកុម្ភៈ។

គួរបញ្ជាក់ថា ការប្រកាសអំពីការឈានដល់កិច្ចព្រមព្រៀងរវាងអាមេរិកនិងអ៉ីរ៉ង់ ហើយច្រកសមុទ្រ Hormuz នឹងត្រូវបើកឡើងវិញទាំងស្រុងនោះ បានធ្វើឱ្យតម្លៃប្រេងអន្តរជាតិ ចាប់ផ្តើមធ្លាក់ចុះវិញ៕