លោក មែ ស៉ីថន នាំយកសាររំលែកទុក្ខរបស់សម្ដេចធិបតី ជូនក្រុមគ្រួសារសពនាយឧត្តមសេនីយ៍ ហេង បូរិន្ទ រដ្ឋលេខាធិការក្រសួងការពារជាតិ
ភ្នំពេញ៖ នៅថ្ងៃទី១៧ ខែកញ្ញា ឆ្នាំ២០២៥ លោក មែ ស៉ីថន ជំនួយការសម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បាននាំយកសាររំលែកទុក្ខរបស់សម្ដេចធិបតី នាយករដ្ឋមន្ដ្រី ជូនក្រុមគ្រួសារសពនាយឧត្តមសេនីយ៍ ហេង បូរិន្ទ រដ្ឋលេខាធិការក្រសួងការពារជាតិ។
សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពិតជាមានសេចក្តីក្តុកក្តួលរំជួលចិត្តជាពន់ពេក និងសោកស្តាយឥតឧបមា ដោយបានទទួលដំណឹងថា នាយឧត្តមសេនីយ៍ ហេង បូរិន្ទ បានទទួលមរណភាព នៅថ្ងៃអង្គារ ៩រោច ខែភទ្របទ ឆ្នាំម្សាញ់ សប្ដស័ក ព.ស. ២៥៦៩ ត្រូវនឹងថ្ងៃទី១៦ ខែកញ្ញា ឆ្នាំ២០២៥ វេលាម៉ោង ២:២៥នាទីរសៀល ក្នុងជន្មាយុ ៦៩ឆ្នាំដោយជរាពាធ។
សម្តេចបានថ្លែងថា «ក្នុងវេលាប្រកបដោយសមានទុក្ខដ៏ក្រៀមក្រំនេះ និងភរិយា សូមចូលរួមរំលែកទុក្ខជាមួយ លោកជំទាវ ព្រមទាំងក្រុមគ្រួសារ ក៏ដូចជាថ្នាក់ដឹកនាំក្រសួងការពារជាតិគ្រប់ជាន់ថ្នាក់ នាយទាហាន នាយទាហានរង និង ពលទាហានទាំងអស់នៃកងយោធពលខេមរភូមិន្ទ និងសូមសម្តែងនូវសេចក្តីសង្វេគ ប្រកបដោយអនិច្ចលក្ខណធម៌យ៉ាងជ្រាលជ្រៅបំផុត។
មរណភាពរបស់ ឯកឧត្តម នាយឧត្តមសេនីយ៍ ហោង បូរិន្ទ គឺជាការបាត់បង់ស្វាមី ដែលប្រកបដោយសង្គហធម៌ដ៏ឧត្ដុង្គឧត្តមចំពោះភរិយា និងជា ការបាត់បង់ឪពុក ឪពុកក្មេក ជីតា ប្រកបដោយព្រហ្មវិហារធម៌ចំពោះកូនៗ ចៅៗ ហើយក៏ជាការបាត់បង់ នូវនាយទាហានដ៏អង់អាចក្លាហាន និងជាឥស្សរជន ដ៏ឆ្នើមនៃកងយោធពលខេមរភូមិន្ទ ដែលបានពុះពារ ធ្វើពលិកម្មគ្រប់បែបយ៉ាងក្នុងបុព្វហេតុ ជាតិ សាសនា ព្រះមហាក្សត្រ និងបានលើកស្ទួយដល់ កិត្យានុភាពជាតិលើឆាកអន្តរជាតិ ជារៀងរហូតមក។
ជាមួយគ្នានេះ ខ្ញុំ និងភរិយា ក៏សូមឧទ្ទិសបួងសួងដល់ដួងវិញ្ញាណក្ខន្ធ ឯកឧត្តម នាយឧត្ដមសេនីយ៍ ហោង បូរិន្ទ សូមឱ្យឆាប់បានយោនយកកំណើតកើតក្នុងសុគតិភពគ្រប់ៗជាតិ កុំបីឃ្លៀងឃ្លាតឡើយ»៕
