ឯកឧត្តម ចាន់ ស៊ីណាត ដឹកនាំកិច្ចប្រជុំចាប់ផ្តើមបេសកកម្មនៃគម្រោងអភិវឌ្ឍន៍ប្រព័ន្ធធារាសាស្ត្រដែលមានភាពធន់នឹងអាកាសធាតុនិងការកាត់បន្ថយគ្រោះទឹកជំនន់និងគ្រោះរាំងស្ងួតក្នុងក្របខ័ណ្ឌទូទាំងប្រទេសជំហានទី១

ភ្នំពេញ៖ នៅទីស្ដីការក្រសួងធនធានទឹក និងឧតុនិយម នាថ្ងៃទី២៥ ខែសីហា ឆ្នាំ២០២៥ ឯកឧត្តម ចាន់ ស៊ីណាត រដ្ឋលេខាធិការ និងជានាយកគម្រោង ក្នុងនាមតំណាងដ៏ខ្ពង់ខ្ពស់ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានអញ្ជើញដឹកនាំកិច្ចប្រជុំចាប់ផ្តើមបេសកកម្ម (Kick off Meeting AIIB Inception Mission) គម្រោងអភិវឌ្ឍន៍ប្រព័ន្ធធារាសាស្ត្រដែលមានភាពធន់នឹងអាកាសធាតុ និងការកាត់បន្ថយគ្រោះទឹកជំនន់និងគ្រោះរាំងស្ងួតក្នុងក្របខ័ណ្ឌទូទាំងប្រទេសជំហានទី១(CCRSIWDFMP-Phase1) ដើម្បីពិភាក្សាលើការរៀបចំគម្រោងក្នុងខេត្តគោលដៅ និងការចុះពិនិត្យជាក់ស្តែងនៅតាមទីតាំងគម្រោង។

សូមជម្រាបថា កិច្ចប្រជុំដ៏សំខាន់នេះមានវត្តមានចូលរួមពីលោក David Ginting ប្រធានក្រុមបេសកកម្ម ធនាគារវិនិយោគហេដ្ឋារចនាសម្ព័ន្ធអាស៊ី(AIIB) ឯកឧត្តម លោកជំទាវ លោក លោកស្រី តំណាងក្រសួងសេដ្ឋកិច្ច និងហិរញ្ញវត្ថុ ក្រសួងកសិកម្ម រុក្ខាប្រមាញ់ និងនេសាទ ក្រសួងកិច្ចការនារី និងអគ្គនាយកដ្ឋានក្រោមឱវាទក្រសួងធនធានទឹក និងឧតុនិយម អាជ្ញាធរទន្លេសាប និងគណៈកម្មាធិការជាតិទន្លេមេគង្គកម្ពុជា ព្រមទាំងប្រធានមន្ទីរធនធានទឹក និងឧតុនិយមតាមបណ្តាខេត្តគោលដៅរួមមាន ខេត្តពោធិ៍សាត់ ខេត្តកំពង់ធំ ខេត្តសៀមរាប ខេត្តព្រះវិហារ ខេត្តឧត្តរមានជ័យ ខេត្តបាត់ដំបង និងខេត្តបន្ទាយមានជ័យ ជាច្រើនរូបផងដែរ៕