ប្រធានាធិបតីកូរ៉េខាងត្បូង បញ្ជាឱ្យគណៈរដ្ឋមន្រ្តីរបស់លោក ត្រៀមរៀបចំការអនុវត្តខ្លះៗ និងជាដំណាក់កាល នូវកិច្ចព្រមព្រៀងដែលមានស្រាប់នានា ជាមួយប្រទេសកូរ៉េខាងជើង

សេអ៊ូល៖ លោក Lee Jae Myung ប្រធានាធិបតីកូរ៉េខាងត្បូង ដែលបាននិងកំពុងព្យាយាមចង់ស្តារទំនាក់ទំនងឡើងវិញ ជាមួយទីក្រុងព្យុងយ៉ាង នាថ្ងៃចន្ទ ទី១៨ ខែសីហា បានចេញបទបញ្ជាឱ្យគណៈរដ្ឋមន្រ្តីរបស់លោក ត្រៀមរៀបចំការអនុវត្តខ្លះៗ និងជាដំណាក់កាល នូវកិច្ចព្រមព្រៀងដែលមានស្រាប់នានា ជាមួយប្រទេសកូរ៉េខាងជើង។

បើតាមការចេញផ្សាយដោយ ទីភ្នាក់ងារព័ត៌មាន Reuters លោក Lee មិនបានបញ្ជាក់ឱ្យច្បាស់ថា លោកចង់សំដៅលើកិច្ចព្រមព្រៀងមួយណាឡើយ ប៉ុន្តែកាលពីថ្ងៃសុក្រសប្តាហ៍មុននេះ លោកប្រធានាធិបតី បាននិយាយថា ទីក្រុងសេអ៊ូលមានបំណងចង់ ស្តារកិច្ចព្រមព្រៀងមួយកាលពីឆ្នាំ២០១៨ ដែលបានដួលរលំ ដើម្បីផ្អាកសកម្មភាពយោធាមួយចំនួន នៅតាមបណ្តោយព្រំប្រទល់ជាមួយកូរ៉េខាងជើង។

អំឡុងកិច្ចប្រជុំគណៈរដ្ឋមន្រ្តីនាថ្ងៃចន្ទនេះ លោក Lee បានលើកឡើងថា «ទំនាក់ទំនងរវាងកូរ៉េខាងត្បូងនិងកូរ៉េខាងជើង មានសារសំខាន់ដើម្បីការពារផលប្រយោជន៍ជាតិរបស់កូរ៉េខាងត្បូង និងពង្រីកដែនធ្វើប្រតិបត្តិការផ្នែកការទូត នៅចំពោះមុខការប្រែប្រួលយ៉ាងឆាប់រហ័ស នៃកត្តាស្ថានភាពខាងក្រៅ។ ក្រសួងពាក់ព័ន្ធទាំងឡាយ សូមត្រៀមលក្ខណៈ សម្រាប់ការអនុវត្តខ្លះៗ និងជាដំណាក់កាល នូវកិច្ចព្រមព្រៀងអន្តរកូរ៉េនានាដែលមានរួចស្រាប់ ដោយចាប់ផ្តើមពីកន្លែងណាក៏ដោយ ឱ្យតែអាចទៅរួច»។

គួរបញ្ជាក់ថា ចាប់តាំងពីពេលឡើងកាន់អំណាច កាលពីខែមិថុនា ឆ្នាំនេះ រដ្ឋាភិបាលរបស់លោក Lee បានព្យាយាមចង់ស្តារទំនាក់ទំនង រវាងប្រទេសទាំងពីរឡើងវិញ ប៉ុន្តែមកទល់នឹងពេលឥឡូវ មន្រ្តីជាន់ខ្ពស់កូរ៉េខាងជើង ហាក់មិនបានស្វាគមន៍ឡើយ ចំពោះគោលបំណងរបស់ប្រធានាធិបតីកូរ៉េខាងត្បូងរូបនេះ៕