នាយឧត្តមសេនីយ៍ ស ថេត ទទួលអំណោយជា ថវិកា គ្រឿងឧបភោគបរិភោគ និងសម្ភារប្រើប្រាស់ជាច្រើនមុខពីអគ្គនាយកដ្ឋានអន្តោប្រវេសន៍ ដើម្បីចែកជូនដល់កងកម្លាំងនគរបាលការពារព្រំដែន
ភ្នំពេញ៖ នៅព្រឹកថ្ងៃសុក្រ ទី៨ ខែសីហា ឆ្នាំ២០២៥នេះ នៅបរិវេណទីស្តីការក្រសួងមហាផ្ទៃ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ រួមជាមួយថ្នាក់ដឹកនាំជាច្រើនរូបទៀត បានអញ្ជើញទទួលអំណោយជា ថវិកា គ្រឿងឧបភោគបរិភោគ និងសម្ភារប្រើប្រាស់ជាច្រើនមុខពី ឯកឧត្តម ឧត្តមសេនីយ៍ឯក សុខ វាសនា អគ្គនាយកអន្តោប្រវេសន៍ ដើម្បីចែកជូនដល់កងកម្លាំងនគរបាលការពារព្រំដែន នៅជួរមុខដ៏អង់អាចក្លាហាន ដែលកំពុងឈរជើងយ៉ាងរឹងមាំការពារបូរណភាពទឹកដីនៃព្រះរាជាណាចក្រកម្ពុជា។
ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ជំនួសមុខឱ្យថ្នាក់ដឹកនាំ និងកងកម្លាំងនគរបាលទូទាំងប្រទេស សូមថ្លែងអំណរគុណ និងវាយតម្លៃខ្ពស់ចំពោះ ឯកឧត្តម ឧត្តមសេនីយ៍ឯក សុខ វាសនា រួមនិងថ្នាក់ដឹកនាំ មន្រ្តីនគរបាលទាំងអស់ នៃអគ្គនាយកដ្ឋានអន្តោប្រវេសន៍ ក្នុងនាមអង្គភាពចំណុះក្រសួងមហាផ្ទៃតែមួយ ក្រោមការដឹកនាំរបស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ដែលបាននាំអំណោយមកប្រគល់ជូនដល់អគ្គស្នងការដ្ឋាននគរបាលជាតិ ចំពេលដែលមានតម្រូវការចាំបាច់ចំពោះមុខ ហើយក៏សូមចាត់ទុកនូវកាយវិការដ៏ឧត្តុង្គឧត្តមនេះ គឺជាការឆ្លុះបញ្ចាំងអំពីទឹកចិត្តសប្បុរសធម៌ ក៏ដូចជាការរួមចំណែកលើកទឹកចិត្ត និងជុំរុញស្មារតីបន្ថែមទៀតដល់កងកម្លាំងកំពុងឈរជើងការពារអធិបតេយ្យភាពទឹកដីព្រះរាជាណាចក្រកម្ពុជា។
ជាមួយគ្នានេះ ឯកឧត្តម នាយឧត្តមសេនីយ៍ ស ថេត ក៏បានប្រគល់លិខិតថ្លែងអំណរគុណ និងបានជូនពរដល់ឯកឧត្តម ឧត្តមសេនីយ៍ឯក សុខ វាសនា រួមនិងថ្នាក់ដឹកនាំ មន្រ្តីនគរបាលទាំងអស់ នៃអគ្គនាយកដ្ឋានអន្តោប្រវេសន៍។
សូមជម្រាបថា អំណោយរបស់អគ្គនាយកដ្ឋានអន្តោប្រវេសន៍ នាំមកប្រគល់ជូនអគ្គស្នងការដ្ឋាននគរបាលជាតិ សម្រាប់កងកម្លាំងនគរបាលការពារព្រំដែន រួមមាន៖ ១-ថវិកា ចំនួន ៦០លានរៀល ,២-ពងមាន់ ចំនួន ១៣កេសធំ និង២០កេសតូច ,៣-សាច់ផាត់ ចំនួន ៥កេស ,៤-សាច់ក្រក ចំនួន ១១កេស ,៥-បាយក្តាំង ចំនួន ១២កេស ,៦-កាហ្វេ ចំនួន ១៧កេស ,៧-ហតដក ចំនួន ១៤០កេស ,៨-ត្រីងៀត ចំនួន ៩កេស ,៩-នំ(៩០០) ចំនួន ៦៨កេស ,១០-ថ្នាំបាញ់មូស ចំនួន១០៤០ដបតូច និង១០០០ដបធំ ,១១-ថ្នាំបាញ់ខ្លួនការពារមូសខាំ ចំនួន ៩៦ដបធំ និង១៥០០ដបតូច៕
