ការវាយប្រហារសងសឹករបស់អ៉ីរ៉ង់បណ្តាលឱ្យមានការផ្ទុះលាន់ឮពេញទីក្រុង Jerusalem និងទីក្រុង Tel Aviv ដែលជាទីក្រុងធំជាងគេចំនួនពីររបស់អ៉ីស្រាអែល

ហ៊្សេរុយសាឡិម៖ បេីយោងតាមការចេញផ្សាយដោយទីភ្នាក់ងារសារព័ត៌មាន Reuters ការវាយប្រហារសងសឹករបស់អ៉ីរ៉ង់បណ្តាលឱ្យមានការផ្ទុះលាន់ឮពេញទីក្រុង Jerusalem និងទីក្រុង Tel Aviv ដែលជាទីក្រុងធំជាងគេចំនួនពីររបស់អ៉ីស្រាអែល នៅយប់ថ្ងៃសុក្រឈានចូលថ្ងៃសៅរ៍ ទី១៤ ខែមិថុនា ឆ្នាំ២០២៥។

ស៉ីរ៉ែនជូនដំណឹងពីការវាយឆ្មក់ តាមផ្លូវអាកាសបានបន្លឺ ឡើង ពាសពេញប្រទេស អ៉ីស្រាអែល ខណៈ អាជ្ញាធរ ជំរុញឱ្យប្រជាជនរកកន្លែងជ្រក។ មីស៉ីលត្រូវបានគេមើល ឃើញពីលើផ្ទៃមេឃរបស់ទីក្រុង Tel Aviv។

យោធាអ៉ីស្រាអែលនិយាយថា អ៉ីរ៉ង់បានបាញ់មីស៉ីលតិចជាង ១០០គ្រាប់ ហើយភាគច្រើនត្រូវបានស្ទាក់ចាប់ ឬបាញ់ទម្លាក់។ មន្ត្រីអាមេរិកពីររូបនិយាយថា យោធាអាមេរិកក៏បានជួយបាញ់ទម្លាក់មីស៉ីលអ៉ីរ៉ង់ដែលសំដៅទៅអ៉ីស្រាអែលផងដែរ។

ទូរទស្សន៍អ៉ីស្រាអែលរាយការណ៍ថា មនុស្សពីរនាក់បានរងរបួសធ្ងន់ ៨នាក់របួសមធ្យម និង៣៤នាក់របួសស្រាល។ អគារជាច្រើនរងការខូចខាត រួមទាំងប្លុកផ្ទះល្វែងមួយក្នុងសង្កាត់លំនៅដ្ឋាននៃទីក្រុង Ramat Gan ក្បែរទីក្រុង Tel Aviv។ អគារមួយទៀតនៅកណ្តាលទីក្រុង Tel Aviv ក៏បានរងនូវការវាយប្រហារដែរដែលបណ្តាលឱ្យខូចខាតអស់ច្រើនជាន់។

គួរបញ្ជាក់ថា នៅថ្ងៃទី១៣ ខែមិថុនា អ៉ីស្រាអែលបានបេីកការវាយប្រហារតាមផ្លូវអាកាសទ្រង់ទ្រាយធំ លើរោងចក្រនុយក្លេអ៊ែរអ៉ីរ៉ង់ រោងចក្រមីស៊ីលបាលិស្ទីគ ដោយបានសម្លាប់មេបញ្ជាការយោធារួមទាំងអ្នកវិទ្យាសាស្ត្រនុយក្លេអ៊ែរអ៉ីរ៉ង់ផងដែរ។ មេដឹកនាំកំពូលអ៉ីរ៉ង់លោក Ayatollah Ali Khamenei បានគំរាមថា អ៉ីស្រាអែលនឹងត្រូវទទួលរងផលវិបាកធ្ងន់ធ្ងរ សម្រាប់ការវាយប្រហារលើអ៉ីរ៉ង់៕