ឯកឧត្តម សួស ប្រាថ្នា អញ្ជើញជាអធិបតីជាមួយអគ្គនាយកនៃអគ្គនាយកដ្ឋានសវនកម្មផ្ទៃក្នុងក្រសួងមហាផ្ទៃ ក្នុងពិធីបើកកិច្ចសវនកម្មផ្ទៃក្នុង នៅអគ្គនាយកដ្ឋានរដ្ឋបាល ក្រសួងមហាផ្ទៃ សម្រាប់ការិយបរិច្ឆេទឆ្នាំ២០២៤ និងបណ្ដាឆ្នាំពាក់ព័ន្ធ

ភ្នំពេញ៖ នៅទីស្ដីការក្រសួងមហាផ្ទៃ នាព្រឹកថ្ងៃទី៦ ខែមិថុនា ឆ្នាំ២០២៥នេះ ឯកឧត្តម សួស ប្រាថ្នា អគ្គនាយកនៃអគ្គនាយកដ្ឋានរដ្ឋបាល ក្រសួងមហាផ្ទៃ បានអញ្ជើញជាអធិបតីក្នុងពិធីបើកកិច្ចសវនកម្មផ្ទៃក្នុង នៅអគ្គនាយកដ្ឋានរដ្ឋបាល ក្រសួងមហាផ្ទៃ សម្រាប់ការិយបរិច្ឆេទឆ្នាំ២០២៤ និងបណ្ដាឆ្នាំពាក់ព័ន្ធ ជាមួយឯកឧត្តម ឧត្តមសេនីយ៍ឯក ងួន ស្រេង អគ្គនាយកនៃអគ្គនាយកដ្ឋានសវនកម្មផ្ទៃក្នុងក្រសួងមហាផ្ទៃ ដោយមានការចូលរួមពីថ្នាក់ដឹកនាំជាអគ្គនាយករង ប្រធាននាយកដ្ឋាន អនុប្រធាននាយកដ្ឋាន និងប្រធានការិយាល័យ ព្រមទាំងមន្រ្តីពាក់ព័ន្ធនៃអគ្គនាយកដ្ឋានទាំងពីរសរុបប្រមាណ ១៤០នាក់។

បន្ទាប់ពីថ្លែងស្វាគមន៍យ៉ាងកក់ក្តៅចំពោះវត្តមានឯកឧត្តមឧត្តមសេនីយ៍ឯក ងួន ស្រេង ឯកឧត្តម លោកជំទាវ លោក លោកស្រី គណៈប្រតិភូ នៃអគ្គនាយកដ្ឋានសវនកម្មផ្ទៃក្នុង ដែលបានចំណាយពេលវេលាដ៏មមាញឹកនិងមានតម្លៃចុះមកអនុវត្តនូវកម្មវិធីសវនកម្មនៅអគ្គនាយកដ្ឋានរដ្ឋបាល ឯកឧត្តម សួស ប្រាថ្នា បានគូសបញ្ជាក់អំពីតួនាទីភារកិច្ចស្នូលសំខាន់ៗរបស់អគ្គនាយកដ្ឋានរដ្ឋបាល លើការងារគ្រប់គ្រងរដ្ឋបាលដែនដី ការអនុវត្តកម្មវិធីកំណែទម្រង់វិមជ្ឈការ និងវិសហមជ្ឈការនៅរដ្ឋបាលថ្នាក់ក្រោមជាតិ ការគ្រប់គ្រងសមាគម អង្គការមិនមែនរដ្ឋាភិបាល គណបក្សនយោបាយ ការជំរុញការផ្តល់សេវារដ្ឋបាល សេវាសាធារណៈនានាជូនប្រជាពលរដ្ឋប្រកបដោយប្រសិទ្ធភាព និងជាពិសេសការអន្តរាគមន៍នៅរដ្ឋបាលថ្នាក់ក្រោមជាតិ ក្នុងការអនុវត្តតួនាទី និងភារកិច្ចរបស់ខ្លួនឱ្យបានត្រឹមត្រូវស្របតាមច្បាប់ និងលិខិតបទដ្ឋានគតិយុត្តជាធរមាន។

ឆ្លៀតក្នុងឱកាសនោះដែរ ឯកឧត្តមអគ្គនាយក ក៏បានលើកឡើងអំពីសមិទ្ធផលសំខាន់ៗរបស់អគ្គនាយកដ្ឋានរដ្ឋបាល ដែលសម្រេចបាននាពេលកន្លងមក ក្រោមការចង្អុលបង្ហាញ ណែនាំតម្រង់ទិស និងដឹកនាំដ៏ខ្ពង់ខ្ពស់របស់ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ រួមមាន៖ ការងារក្រុមប្រឹក្សារដ្ឋបាលថ្នាក់ក្រោមជាតិ, ការងារគ្រប់គ្រងរដ្ឋបាលដែនដី, ទីក្រុងឆ្លាត, ការគ្រប់គ្រងធនធានមនុស្សថ្នាក់ក្រោមជាតិ, វិមជ្ឈការហិរញ្ញវត្ថុ, ការផ្ទេរមុខងារនិងធនធាន, កិច្ចសហប្រតិបត្តិការខេត្តជាប់ព្រំដែន, ការងារគណបក្សនយោបាយនិងអង្គការសង្គមស៊ីវិលជាដើម។

ជាមួយគ្នានេះ ឯកឧត្តមអធិបតី បានធ្វើការគូសបញ្ជាក់បន្ថែមថា រាជរដ្ឋាភិបាលក្នុងនីតិកាលទី៧ នៃរដ្ឋសភានេះ បាននិងកំពុងយកចិត្តទុកដាក់ក្នុងការអនុវត្តកម្មវិធីកំណែទម្រង់រដ្ឋបាលសាធារណៈ ពោល គឺការកែទម្រង់ក្រសួង ស្ថាប័នសាធារណៈ ដែលផ្តោតលើការពង្រឹងអភិបាលកិច្ច និងការធ្វើទំនើបកម្មស្ថាប័នរដ្ឋឱ្យក្លាយទៅជារដ្ឋបាលសាធារណៈទំនើប ប្រកបដោយសមត្ថភាពខ្ពស់ ខ្លាំង វៃឆ្លាត និងស្អាតស្អំ តាមរយៈការដាក់ចេញនូវវិធានការគន្លឹះក្នុងការកែទម្រង់រដ្ឋបាលសាធារណៈ ដើម្បីលើកកម្ពស់គុណភាពការងារប្រកបដោយវិន័យ សីលធម៌វិជ្ជាជីវៈ ប្រសិទ្ធភាព ស័ក្តិសិទ្ធិភាព សំដៅបម្រើឧត្តមប្រយោជន៍ជាតិ និងឆ្លើយតបទៅនឹងសេចក្តីត្រូវការជាក់ស្តែងរបស់ប្រជាពលរដ្ឋ។ ហើយការធ្វើសវនកម្មផ្ទៃក្នុង គឺជាកិច្ចការដ៏មានសារៈសំខាន់នៅក្នុងក្របខ័ណ្ឌកំណែទម្រង់ ដែលបានរួមចំណែកក្នុងការពង្រឹងប្រសិទ្ធភាពស្ថាប័ន តាមរយៈការអនុវត្តយន្តការវាយតម្លៃដែលមានលក្ខណៈជាប្រព័ន្ធទៅលើលទ្ធផល និងប្រសិទ្ធភាពការងាររបស់អង្គភាពនីមួយៗ។

ជាទីបញ្ចប់ ឯកឧត្តមអគ្គនាយក បានសូមប្រសិទ្ធពរជ័យជូន ឯកឧត្តម លោកជំទាវ លោក លោកស្រី ជាសមាជិក សមាជិកានៃអង្គពិធីទាំងមូលសូមជួបប្រទះតែនឹងព្រះពុទ្ធពរទាំងបួនប្រការគឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕