រង់ចាំមើលថា តើនរណានឹងក្លាយជាប្រធានាធិបតីថ្មីរបស់កូរ៉េខាងត្បូង បន្ទាប់ពីលោក យូន ស៊ុនយ៉ុល?

សេអ៊ូល៖ ប្រជាជនកូរ៉េខាងត្បូង ត្រូវបោះឆ្នោតជ្រើសរើសប្រធានាធិបតីថ្មីហើយ បន្ទាប់ពីវិបត្តិរដ្ឋធម្មនុញ្ញដ៏អាក្រក់បំផុតរបស់ប្រទេសនេះ ក្នុងរយៈពេលជាច្រើនទសវត្សរ៍។ យ៉ាងណា យើងរង់ចាំមើលថា តើនរណានឹងក្លាយជាប្រធានាធិបតីថ្មីរបស់កូរ៉េខាងត្បូង បន្ទាប់ពីលោក យូន ស៊ុនយ៉ុល?

ការបោះឆ្នោតនឹងប្រព្រឹត្តទៅនៅថ្ងៃទី៣ ខែមិថុនាខាងមុខ ក្រោយអតីតប្រធានាធិបតីលោក យូន ស៊ុកយ៉ុល ត្រូវបានជ្រុះចេញពីតំណែង ខណៈភាពខ្វះចន្លោះនៃភាពជាអ្នកដឹកនាំរបស់កូរ៉េខាងត្បូង កន្លងមក បានបង្កឱ្យចរន្តសេដ្ឋកិច្ចរបស់កូរ៉េខាងត្បូង ដាំក្បាលចុះយ៉ាងលឿនស្លេវ។

រំឭកបន្តិចថា លោក យូន បានធ្វើឱ្យពិភពលោកភ្ញាក់ផ្អើលកាលពីដើមខែធ្នូ ឆ្នាំ២០២៤ ក្រោយប្រកាសច្បាប់អាជ្ញាសឹកជាលើកដំបូង ចាប់តាំងពីការចាប់ផ្តើមលទ្ធិប្រជាធិបតេយ្យពេញលេញនៅក្នុងប្រទេសនេះប្រហែល៤០ឆ្នាំមុន។

តើ នរណា ខ្លះជា បេក្ខជន ប្រធានាធិបតីលេចធ្លោក្នុងការប្រជែងតំណែងប្រធានាធិបតី? ជាក់ស្តែង ប្រជាជនកូរ៉េខាងត្បូងតម្រូវឱ្យបោះឆ្នោតជ្រើសរើសបេក្ខជនប្រធានាធិបតីម្នាក់ ដោយសេរី និងគ្មានការបង្ខិតបង្ខំ ដើម្បីជ្រើសរើសប្រធានាធិបតីសម្រាប់ការកាន់តំណែងរយៈពេល៥ឆ្នាំ។

បេក្ខជនប្រធានាធិបតតីសំខាន់២រូប ដែលកំពុង ប្រជែង គ្នា យ៉ាងក្ដៅគគុក ដើម្បី ក្លាយ ជា ប្រធានាធិបតី គឺ  លោក លី ជេយ៉ុង  ជាអតីត ប្រធាន គណបក្ស ប្រជាធិបតេយ្យ ប្រឆាំង ដ៏ធំបំផុតមួយ និង លោក គីម មូនស៊ូ  ជាអ្នកស្ដាំនិយម នៃ គណបក្ស អំណាច ប្រជាជន(PPP) ខណៈអ្នក ទាំង២ សុទ្ធតែជា អតីត សកម្មជន ការងារដូចគ្នា។ គេនៅចាំបានថា លោក លី ជេយ៉ុង បានចាញ់លោក យូន ស៊ុកយ៉ុល នៅក្នុងការបោះឆ្នោតប្រធានាធិបតីចុងក្រោយក្នុងឆ្នាំ២០២២។

ក្នុង ចំណោម បេក្ខជន ផ្សេង ទៀតក៏មាន លោក លី ជុនស៊ិក  អាយុ៤០ឆ្នាំ ជា អតីត មេដឹកនាំគណបក្សPPP ដោយបច្ចុប្បន្ន លោកឈរ ឈ្មោះ ឱ្យ គណបក្ស កំណែទម្រង់ (Reform Party) ជា គណបក្ស ស្តាំ និយម ទើប បង្កើត ឡើង ថ្មីៗ នេះផងដែរ។ បេក្ខភាពប្រធានាធិបតីវ័យក្មេងដ៏លេចធ្លោរូបនេះ កំពុងព្យាយាមអំពាវនាវទៅកាន់ប្រជាជនវ័យក្មេង ដើម្បីច្បាមយកការគាំទ្រ។

តើបេក្ខជនរូបណាមានភាគរយខ្ពស់ក្នុងការឡើងអង្គុយកៅអីប្រធានាធិបតីបន្ទាប់? ជាការពិតណាស់ លោក លី ជេយ៉ុង គឺជាបេក្ខជននាំមុខគេយ៉ាងច្បាស់។ បើទោះជាយ៉ាងណាក៏ដោយ គូរប្រជែងសំខាន់ៗផ្សេងទៀតនៅតែមានសង្ឃឹម និងមិនព្រមចុះចាញ់នោះឡើយ ល្កឹកណាលទ្ធផលបោះឆ្នោតត្រូវបានប្រកាសជាផ្លូវការ។

តើអ្វីជាកង្វល់ធំបំផុតសម្រាប់អ្នកបោះឆ្នោតកូរ៉េខាងត្បូង? ការដាំក្បាលចុះនៃសេដ្ឋកិច្ចនៅក្នុងត្រីមាសទី១ ឆ្នាំ២០២៥ កំពុងបង្ហាញពីស្ថានភាពផុយស្រួយនៃសកម្មភាពអាជីវកម្ម និងលម្ហសេដ្ឋកិច្ចរបស់កូរ៉េខាងត្បូងទាំងមូល។

លើសពីនេះ ការ បំពាក់បំប៉នស្មារតី ឯកភាព ជាតិ ជា បញ្ហា មួយ ទៀត ក្នុង ការ បោះឆ្នោត ខណៈកំណែទម្រង់រដ្ឋធម្មនុញ្ញក៏អាចនាំមកនូវការសងសឹកនយោបាយរបស់ប្រទេសកូរ៉េខាងត្បូងផងដែរ។ ក្រៅពីនេះ សារសំខាន់នៃគោលនយោបាយការបរទេស ក៏ជាក្ដីកង្វល់ដ៏សំខាន់មួយផងដែរ ដោយសារតែគំនាបពន្ធគយបដិការរបស់លោក ដូណាល់ ត្រាំ, សម្ព័ន្ធភាពត្រីភាគី (អាម៉េរិក-ជប៉ុន-កូរ៉េខាងត្បូង) និងការប្រជែងដោយផ្ទាល់ និងប្រយោលរវាងរដ្ឋធានីវ៉ាស៊ីនតោន និងរបបប៉េកាំង៕