ឯកឧត្តម អ៊ុក ពញ្ញា បានអញ្ជើញជាអធិបតីក្នុងកិច្ចប្រជុំត្រួតពិនិត្យវឌ្ឍនភាពការងារប្រចាំខែឧសភា ឆ្នាំ២០២៥ និងលើកទិសដៅការងារបន្ត របស់ក្រុមការងារគណបក្សចុះមូលដ្ឋានស្រុក និងគណៈកម្មាធិការាកណបក្សស្រុកជលគិរី

ភ្នំពេញ៖នៅព្រឹកថ្ងៃសៅរ៍ ១៣រោច ខែពិសាខ ឆ្នាំម្សាញ់ សប្តស័កព.ស.២៥៦៩ ត្រូវនឹងថ្ងៃទី២៤ ខែឧសភា ឆ្នាំ២០២៥ ឯកឧត្តម អ៊ុក ពញ្ញា សមាជិកគណៈកម្មាធិការកណ្ដាលគណបក្សប្រជាជនកម្ពុជា ប្រធានក្រុមការងារយុវជនគណបក្សក្រសួងអភិវឌ្ឍន៍ជនបទ និងប្រធានក្រុមការងារគណបក្សចុះមូលដ្ឋានស្រុកជលគិរី បានអញ្ជើញជាអធិបតីក្នុងកិច្ចប្រជុំត្រួតពិនិត្យវឌ្ឍនភាពការងារប្រចាំខែឧសភា ឆ្នាំ២០២៥ និងលើកទិសដៅការងារបន្ត របស់ក្រុមការងារគណបក្សចុះមូលដ្ឋានស្រុក និងគណៈកម្មាធិការាកណបក្សស្រុកជលគិរី។

កិច្ចប្រជុំនេះមានការអញ្ជើញចូលរួមពី ឯកឧត្តម លោក លោកស្រីក្រុមការងារគណបក្សចុះមូលដ្ឋានស្រុកជលគិរី លោក លោកស្រី ប្រធាន អនុប្រធាន សមាជិក សមាជិកាគណៈកម្មាធិការគណបក្សស្រុកជលគិរី/ឃុំទាំង ៥/សាខាបក្សភូមិ សរុបចំនួន ៦៤រូប ស្ត្រី០៨រូប។

បន្ទាប់ពីបានស្ដាប់នូវរបាយការណ៍លទ្ធផលការងាររបស់គណៈកម្មាធិការគណបក្សស្រុកជលគិរី ដោយ លោក ដូវ គឹមស៊ីន ប្រធានគណៈកម្មាធិការគណបក្សស្រុក រួចមក ក្រុមការងារ បានពិនិត្យលើសេចក្ដីព្រាងរបាយការណ៍ ដើម្បីបំពេញបន្ថែម និងពិភាក្សាលើបញ្ហា ក៏ដូចជាសំណូមពរមួយចំនួន។

ជាមួយគ្នានោះដែរ ឯកឧត្តមប្រធាន បានផ្ដល់នូវអនុសាសន៍ចំនួន ០៨ចំណុច ដូចខាងក្រោម៖

បន្តពង្រឹងរចនាសម្ព័ន្ធ អង្គការចាត់តាំង របៀបរបបធ្វើការងារ (របបប្រជុំ, របបរាយការណ៍, របបសុំយោបល់)
បន្តផ្សព្វផ្សាយដល់សមាជិក សមាជិកាបក្ស គ្រប់ថ្នាក់ គ្រប់ផ្នែក អំពីសកម្មភាព និងប្រសាសន៍របស់សម្ដេចតេជោ និងសម្ដេធិបតី ព្រមទាំងសកម្មភាពរបស់ថ្នាក់ដឹកនាំគណបក្ស
ស្វែងយល់ និងបន្តក្ដាប់ជាប់ជាប្រចាំសភាពការណ៍ សតិអារម្មណ៍ទាំងក្នុងគណបក្ស ទាំងក្នុងប្រជាជន មហាជន ដើម្បីធានាការអនុវត្តរាល់ភារកិច្ចនយោបាយរបស់គណបក្សប្រកបដោយប្រសិទ្ធភាព
បំផុសការយកចិត្តទុកដាក់ តាមដាន ត្រួតពិនិត្យសមាជិកបក្សដែលគ្រប់អាយុ ១៨ឆ្នាំ ត្រូវទៅចុះឈ្មោះបោះឆ្នោត និងពិនិត្យបញ្ជីឈ្មោះបោះឆ្នោតឡើងវិញឱ្យបានទាន់ពេលវេលា គ្រប់ៗគ្នា និងស្របតាមការណែនាំរបស់គណៈកម្មាធិការរៀបចំការបោះឆ្នោត
បន្តថែរក្សាសន្តិភាពដែលកំពុងមានសព្វថ្ងៃ
បន្តការងារពង្រឹងចាស់ និងពង្រីកសមាជិកថ្មី
ត្រូវបន្តចុះចិញ្ចឹមចលនាតាមគ្រប់រូបភាព ដោយចុះឱ្យបានដល់ភូមិ ដើម្បីស្វែងយល់អំពីសុខទុក្ខ សេចក្តីត្រូវការចំពោះមុខ និងពិនិត្យលទ្ធភាពដោះស្រាយឱ្យត្រូវនឹងចំណង់ចំណូលចិត្តប្រជាជន តាមលទ្ធភាពដើម្បីចិញ្ចឹមចលនាឱ្យដំណើរការជាប់ដូចភ្លៀងរលឹម
ត្រូវបន្តរឹតចំណងសាមគ្គីភាពផ្ទៃក្នុងឱ្យបានរឹងមាំ គិតផលប្រយោជន៍ជាតិជាធំ ដើម្បីថែរក្សាបាននូវ សុខសន្តិភាពដែលយើងកំពុងមានសព្វថ្ងៃ។

ជាកិច្ចបន្ត ឯកឧត្តមប្រធាន និងក្រុមការងារ បានអញ្ជើញជួបសំណេះសំណាលជាមួយលោកគ្រូ អ្នកគ្រូពេទ្យ និងសួរសុខទុក្ខអ្នកជំងឺនៅមណ្ឌលសុខភាពព្រៃគ្រី ស្ថិតនៅឃុំព្រៃគ្រី ស្រុកជលគិរី ខេត្តកំពង់ឆ្នាំង។
គូសបញ្ជាក់ផងដែរថា បច្ចុប្បន្ននៅមណ្ឌលសុខភាពព្រៃគ្រី មានលោកគ្រូ/អ្នកគ្រូពេទ្យ ចំនួន ១៤នាក់ និងអ្នកជំងឺកំពុងសម្រាកព្យាបាល ចំនួន ២០នាក់។