ក្មេងប្រុសស្រី ចំនួន៤នាក់ នាំគ្នាទៅចាប់ក្តាម រួចមកលាងខ្លួននិងទឹកប្រឡាយបានលង់ទឹកស្លាប់ម្នាក់ នៅស្រុកមង្គលបូរី
បន្ទាយមានជ័យ៖ ក្មេងប្រុស ស្រីចំនួន៤នាក់ ក្នុងនោះមាន១នាក់បានលង់ទឹកប្រឡាយស្លាប់បន្ទាប់ពួកគេដើរចាប់ក្តាមរួចមកលាងនៅនឹងប្រឡាយទឹក។ ហេតុការណ៍ភ្ញាក់ផ្អើលនេះបានកើតឡើងនៅវេលាម៉ោង៨និង១០នាទីយប់ថ្ងៃទី២១ ខែឧសភា ឆ្នាំ២០២៥ នៅភូមិចំការលោក ឃុំអូរប្រាសាទ ស្រុកមង្គលបូរី ខេត្តបន្ទាយមានជ័យ។
លោកវរសេនីយ៍ទោ ឌី ទាវ អធិការនគរបាលស្រុកមង្គលបូរី បានឲ្យដឹងថា ក្មេងស្រីរងគ្រោះឈ្មោះ ពេជ្រ ហុងអ៊ី ភេទស្រីអាយុ ១២ឆ្នាំរស់នៅភូមិចំការលោក ឃុំអូរប្រាសាទ ស្រុកមង្គលបូរី ខេត្តបន្ទាយមានជ័យ។
លោកអធិការបានបញ្ជាក់ថា តាមការបំភ្លឺរបស់ក្មេង៤នាក់ ១.ឈ្មោះ រ៉ុង ពិសិដ្ឋ ភេទប្រុស អាយុ ១០ឆ្នាំ ២.ឈ្មោះ ស្រៀង ហាន់ណា ភេទស្រី អាយុ ១៣ឆ្នាំ ៣.ឈ្មោះស្រៀងធាវី ភេទស្រី អាយុ ១២ឆ្នាំ ៤.ឈ្មោះ ប៊ុននី លីណា ភេទស្រីអាយុ១២ ឆ្នាំ រស់នៅភូមិជាមួយគ្នានិងជាមិត្តភក្កិគ្នា វេលាម៉ោងប្រហែល៤នឹង១០នាទីល្ងាចពយគគេបានបបួលគ្នាទៅចាប់រកក្ដាមនៅឯវាលស្រែខាងលិចភូមិចម្ងាយប្រហែល ១.០០០ ម៉ែត្រពីភូមិរហូតដល់ម៉ោង ជិត៥ល្ងាចនាំគ្នាចាប់ក្ដាមមិនបានក៏បបួលគ្នាមកលាងខ្លួននិងទឹកប្រឡាយដើម្បីមកផ្ទះវិញពេលមកដល់ប្រឡាយពួកគេនាំគ្នាចុះលាងខ្លួនកៀនៗច្រាំងកន្លែងរាក់ៗ តែឈ្មោះ ពេជ្រ ហុងអ៊ី គាត់បានលោតទឹកទៅកន្លែងជ្រៅទើបបណ្ដាលឲ្យគាត់លង់ទឹក(ដោយសារគាត់អត់ចេះហែលទឹកទេ) ពេលនោះខ្ញុំឃើញគាត់កំពុងលង់ទឹកខ្ញុំបានហែលទៅជួយតែគាត់នៅឆ្ងាយពេកទើបខ្ញុំមិនហ៊ានហែលទៅ ហើយខ្ញុំបាននាំគ្នាឡើងមកលើគោកដោយសារខ្ញុំភ័យពេក ប្រហែល២-៣នាទីក្រោយ ឈ្មោះពេជ្រ ហុងអ៊ី បានលិចទៅក្នុងទឹកបាត់ទៅ ដោយសារពួកខ្ញុំភ័យរហូតដល់ម៉ោងប្រហែល៥ល្ងាចជាងទើបពួកខ្ញុំបានមកប្រាប់ឪម្តាយរបស់ ពេជ្រ ហុងអ៊ីថាកូនស្រីរបស់អ៊ុំបានលង់ទឹកនៅឯប្រឡាយខាងលិចភូមិពេលនោះ ។
លោកអធិការបានបញ្ជាក់ថា ក្រោយពីទទួលបានព័ត៌មាននេះ លោកមេភូមិក៏ដូចជាសមត្ថកិច្ចនគរបាលប៉ុស្តិ៍រដ្ឋបាលបានមកចុះរាវរករហូតដល់យប់ជ្រៅតែពុំឃើញក៏បាននាំគ្នាត្រឡប់មកផ្ទះវិញ លុះព្រឹកឡើងទើបស្នើសុំកម្លាំងយោធាដែលមានជំនាញឱ្យមកជួយរាវរកសាកសព រហូតដល់ម៉ោង៩ និង ៥៥នាទីព្រឹកថ្ងៃទី២២ ខែឧសភា ឆ្នាំ ២០២៥ កម្លាំងយោធាបានចុះរាវរកឃើញសពក្មេងស្រីនោះ។
ក្រោយពីបានត្រួតពិនិត្យទៅលើខ្លួនប្រាណសាកសពឈ្មោះ ពេជ្រ ហុងអុី និង ពិនិត្យកន្លែងកើតហេតុយ៉ាងល្អិតល្អន់រួចមក ក្រុមការងារ នឹងសន្និដ្ឋានពីលោកគ្រូពេទ្យកោសល្យវិច្ច័យបានថាជនរងគ្រោះពិតជាស្លាប់ដោយសារលង់ទឹកខ្លួនឯងពិតប្រាកដមែន។ សពត្រូវបានប្រគល់ជូនក្រុមគ្រួសាររៀបចំធ្វើបុណ្យតាមប្រពៃណី៕
