ក្រសួងសង្គមកិច្ច ចុះហត្ថលេខាលើកិច្ចព្រមព្រៀងគម្រោងជាមួយសមាគម និងអង្គការមិនមែនរដ្ឋាភិបាលចំនួន១៧ លើវិស័យកិច្ចការពារកុមារ វិស័យគាំពារជនរងគ្រោះ និងវិស័យសុខុមាលភាពជនពិការ
ភ្នំពេញ៖ កាលពីរសៀលថ្ងៃទី៦ ខែឧសភា ឆ្នាំ២០២៥ ឯកឧត្ដមបណ្ឌិត ស៊ូនី វង្សវិសិដ្ឋ រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ជា សុមេធី រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា បានអញ្ជើញចូលរួមជាអធិបតីភាព និងជាហត្ថលេខី ក្នុងពិធីចុះហត្ថលេខាកិច្ចព្រមព្រៀងគម្រោង រវាងក្រសួងសង្គមកិច្ច អតីតយុទ្ធជន និងយុវនីតិសម្បទា ជាមួយសមាគម និងអង្គការមិនមែនរដ្ឋាភិបាលចំនួន១៧ ដែលអនុវត្តគម្រោងផ្តោតលើវិស័យកិច្ចការពារកុមារ វិស័យគាំពារជនរងគ្រោះ និងវិស័យសុខុមាលភាពជនពិការ។
ក្នុងចំណោមសមាគម និងអង្គការមិនមែនរដ្ឋាភិបាលទាំងអស់ដែលបានចុះហត្ថលេខានាពេលនោះ មានអង្គការមិនមែនរដ្ឋាភិបាលបរទេសចំនួន៩ អង្គការមិនមែនរដ្ឋាភិបាលក្នុងស្រុកចំនួន៨ និងដោយភាគច្រើនអនុវត្តគម្រោង នៅរាជធានីភ្នំពេញ និងតាមបណ្ដាខេត្តមួយចំនួននៅក្នុងប្រទេសកម្ពុជា ក្នុងទំហំគម្រោងថវិកា សរុបប្រមាណជាង ១៥លានដុល្លារ ដោយសាមីអង្គការជាអ្នកអនុវត្តគម្រោងដោយផ្ទាល់ សម្រាប់ រយៈពេល ៣ឆ្នាំ (២០២៥-២០២៨)។
កិច្ចព្រមព្រៀងនេះផ្ដោតលើការងារ ៣ធំៗរួមមាន៖ ការងាកុមារ ពិការភាព និងគាំពារជនរងគ្រោះ។
សូមជម្រាបផងដែរថា ភាពជាដៃគូក្នុងកិច្ចសហប្រតិបត្តិការរវាងក្រសួងសង្គមកិច្ច អតីតយុទ្ធជន និងយុវនីតិសម្បទា និងសមាគម អង្គការមិនមែនរដ្ឋាភិបាល ត្រូវបានបន្តបង្កើតឡើង តាមរយៈការចុះកិច្ចព្រមព្រៀងគម្រោងជាបន្តបន្ទាប់។ រហូតមកដល់ពេលនេះ មានសមាគម អង្គការមិនមែនរដ្ឋាភិបាលក្នុងស្រុក និងបរទេស បានចុះកិច្ចព្រមព្រៀងគម្រោងជាមួយក្រសួងសង្គមកិច្ច អតីតយុទ្ធជន និងយុវនីតិសម្បទា ដែលនៅមានសុពលភាពចំនួន១៦១ (ក្នុងនោះកំពុងអនុវត្តគម្រោងកិច្ចការពារកុមារចំនួន១០៥ កិច្ចការគ្រួសារចំនួន ១៤ គាំពារជនរងគ្រោះចំនួន២៥ ជនមានពិការភាព ចំនួន១៥ និងមនុស្សចាស់ចំនួន២) ហើយនៅថ្ងៃនេះបានចុះកិច្ចព្រមព្រៀងចំនួន១៧ទៀត ដូច្នេះសរុបមានចំនួន ១៧៨ សមាគម និងអង្គការដៃគូសហប្រតិបត្តិការ៕
