ភ្នំពេញ៖ ឯកឧត្តមសន្តិបណ្ឌិត ឡូយ សុផាត ប្រធានគណៈកម្មការផែនការ វិនិយោគ កសិកម្ម រុក្ខាប្រមាញ់ នេសាទ អភិវឌ្ឍន៍ជនបទ បរិស្ថាន ធនធានទឹក និងឧតុនិយម នៃរដ្ឋសភា (គណៈកម្មការទី៣) បានអញ្ជើញញដឹកនាំកិច្ចប្រជុំផ្ទៃក្នុងគណៈកម្មការ ដើម្បីពិនិត្យពិភាក្សា សិក្សា លើសេចក្ដីព្រាងច្បាប់ស្តីពី ជលផល នាព្រឹកថ្ងៃទី៣០ ខែ មេសា ឆ្នាំ២០២៥ នៅវិមានរដ្ឋសភា។
សូមបញ្ជាក់ថា សេចក្តីព្រាងច្បាប់ស្តីពី ជលផល មានចំនួន ១៥ជំពូក ចែកចេញជា១០៤មាត្រា និងមានឧបសម្ព័ន្ធចំនួន០២ ត្រូវបានកិច្ចប្រជុំគណ:កម្មាធិការអចិន្ត្រៃយ៍រដ្ឋសភា ប្រគល់តួនាទីភារកិច្ចជូនគណៈកម្មការទី៣នៃរដ្ឋសភាពិនិត្យសិក្សា ចាប់តាំងពីថ្ងៃទី១៣ ខែកុម្ភៈ ឆ្នាំ២០២៥ កន្លងមក។
កិច្ចប្រជុំនេះមានការចូលរួមពី ឯកឧត្តម លោកជំទាវ ជាសមាជិក សមាជិកាគណៈកម្មការ និងទីប្រឹក្សាអ្នកច្បាប់អមគណៈកម្មការ ព្រមទាំងមន្ត្រីជំនួយការ ដោយបានធ្វើការពិនិត្យសិក្សាទៅលើខ្លឹមសារ ទម្រង់ច្បាប់ ក៏ដូចជាអក្ខរាវិរុទ្ធ ដើម្បីមានមូលដ្ឋានគតិយុត្ត សម្រាប់បន្តជួបប្រជុំជាមួយតំណាងរាជរដ្ឋាភិបាល មុននឹងសម្រេចបញ្ជូនសេចក្ដីព្រាងច្បាប់នេះ ត្រឡប់ទៅគណៈកម្មាធិការអចិន្ត្រៃយ៍រដ្ឋសភាវិញ ដើម្បីពិនិត្យសម្រេចដាក់បញ្ចូលក្នុងរបៀបវារៈសម័យប្រជុំរដ្ឋសភា ធ្វើការពិភាក្សា និងអនុម័ត នៅពេលខាងមុខ ៕
