ប្រធានទីភ្នាក់ងារ ស៊ើបការណ៍ សម្ងាត់ របស់សហរដ្ឋ អា ម៉េរិកប្រកាសថា សហរដ្ឋអាម៉េរិកបានផ្អាកការចែករំលែកព័ត៌មានសម្ងាត់ជាមួយអ៊ុយក្រែន ដើម្បីបង្កើនសម្ពាធលើប្រធានាធិបតីអ៊ុយក្រែន
វ៉ាស៊ីនតោន៖ លោក ចន រ៉ាត់គ្លីហ្វ ប្រធានទីភ្នាក់ងារ ស៊ើបការណ៍ សម្ងាត់ របស់សហរដ្ឋ អា ម៉េរិ ក បានប្រកាសកាលពីថ្ងៃពុធទី៥ ខែមីនាថា សហរដ្ឋអាម៉េរិកបានផ្អាកការចែករំលែកព័ត៌មានសម្ងាត់ជាមួយអ៊ុយក្រែន ដើម្បីបង្កើនសម្ពាធលើប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី ឱ្យសហការជាមួយប្រធានាធិបតីអាម៉េរិក លោក ដូណាល់ ត្រាំ ក្នុងការកោះប្រជុំសន្តិភាពជាមួយរុស្ស៊ី។
ការផ្អាកចែករំលែកព័ត៌មាន ដែលអាចធ្វើឱ្យមនុស្សជាច្រើននាក់បន្ថែមទៀតបាត់បង់ជីវិត ដោយសារប៉ះពាល់ដល់សមត្ថភាពរបស់អ៊ុយក្រែនក្នុងការការពារខ្លួនប្រឆាំងនឹងការវាយប្រហារដោយមីស៊ីលរបស់រុស្ស៊ី កើតឡើងបន្ទាប់ពីការផ្អាកជំនួយយោធារបស់សហរដ្ឋអាម៉េរិកដល់រដ្ឋធានីកៀវក្នុងសប្តាហ៍នេះ។ វាគូសបញ្ជាក់អំពីឆន្ទៈរបស់លោក ត្រាំ ក្នុងការដាក់សម្ពាធលើអ៊ុយក្រែន ខណៈដែលលោកបានផ្លាស់ប្ដូរពីការគាំទ្រដ៏រឹងមាំរបស់សហរដ្ឋអាម៉េរិកសម្រាប់អ៊ុយក្រែន ទៅជាគោលជំហរកៀកកើយជាមួយរដ្ឋធានីមូស្គូ។ សម្ពាធទាំងនេះហាក់ដូចជាមានប្រសិទ្ធភាព ដោយលោក ត្រាំ អះអាងថាបានទទួលសំបុត្រពីលោក ហ្សេឡេនស្គី ដែលក្នុងនោះមេដឹកនាំអ៊ុយក្រែនអះអាងថា លោកសុខចិត្តចូលតុចរចា។
លោក រ៉ាត់គ្លីហ្វ បានលើកឡើងថា ៖ « ខ្ញុំ គិត ថា ការ ផ្អាក នេះ នឹង ត្រូវលុបចោលវិញ។ ខ្ញុំគិតថា យើងនឹងប្រកៀកស្មាជាមួយអ៊ុយក្រែន ដើម្បីរុញច្រានការឈ្លានពាន និងចរចាដើម្បីសន្តិភាព»។
ប្រភពដែលដឹងអំពីស្ថានភាពនេះ បាននិយាយក្នុងលក្ខខណ្ឌមិនបញ្ចេញឈ្មោះថា រដ្ឋបាលលោក ត្រាំ បានបញ្ឈប់ការផ្តល់ព័ត៌មានសម្ងាត់ទាំងអស់រួមទាំងការកំណត់គោលដៅទិន្នន័យដែលអ៊ុយក្រែនបានប្រើ ដើម្បីវាយប្រហារគោលដៅរបស់រុស្ស៊ី។
គួរជម្រាបថា បងធំអាម៉េរិកបានបញ្ឈប់ការផ្តល់ជំនួយយោធាដល់រដ្ឋធានីកៀវបន្ទាប់ពីកិច្ចប្រជុំដ៏ក្ដៅគគុកកាលពីសប្តាហ៍មុនរវាងលោក ត្រាំ និងលោក ហ្សេឡេនស្គី ដែលបានប៉ះពារសម្តីគ្នាបែកផ្សែងនៅចំពោះមុខប្រព័ន្ធផ្សព្វផ្សាយពិភពលោក។
ការប៉ះទង្គិចគ្នានេះបានពន្យារពេលការចុះហត្ថលេខាលើកិច្ចព្រមព្រៀងដែលនឹងផ្តល់ឱ្យសហរដ្ឋអាម៉េរិកនូវសិទ្ធិទទួលបានប្រាក់ចំណូលពីរ៉ែដ៏សំខាន់របស់អ៊ុយក្រែន ដែលលោក ត្រាំ បានទាមទារជាថ្នូរនឹងយោធារបស់សហរដ្ឋអាម៉េរិក។ លោក ហ្សេឡេនស្គី បាននិយាយថា មានចលនាវិជ្ជមានលើបញ្ហានេះ ហើយមន្ត្រីនៃប្រទេសទាំងពីរអាចជួបគ្នាម្ដងទៀតក្នុងពេលឆាប់ៗនេះ។
សេតវិមានកំពុងពិចារណាឡើងវិញនូវការផ្អាកការផ្ដល់មូលនិធិសម្រាប់អ៊ុយក្រែន ហើយកិច្ចពិភាក្សារវាងប្រទេសទាំងពីរជុំវិញកិច្ចព្រមព្រៀងរ៉ែកំពុងបន្ត។
មន្ត្រីរដ្ឋបាលជាន់ខ្ពស់មួយរូបបាននិយាយថា ការចុះហត្ថលេខានេះត្រូវបានគេរំពឹងថានឹងកើតឡើងក្នុងពេលឆាប់ៗនេះ ហើយជាជំហានដំបូងក្នុងការចរចាដ៏យូររវាងអ៊ុយក្រែន វ៉ាស៊ីនតោន និងរុស្ស៊ីស្តីពីការបញ្ចប់សង្គ្រាម។
នៅក្នុងសុន្ទរកថាទៅកាន់សភាកាលពីល្ងាចថ្ងៃអង្គារ លោក ត្រាំ បានលើកឡើងថា រដ្ឋធានីកៀវបានត្រៀមខ្លួនរួចរាល់ហើយក្នុងការចុះហត្ថលេខាលើកិច្ចព្រមព្រៀងរ៉ែ។
លោក ត្រាំ ក៏បាននិយាយផងដែរថា លោកបានពិភាក្សាជាមួយរុស្ស៊ី ហើយបានទទួលសញ្ញាថារដ្ឋធានីមូស្គូបានត្រៀមរួចរាល់សម្រាប់សន្តិភាព។
លោកបានថ្លែងយ៉ាងដូច្នេះថា៖ «វាដល់ពេលហើយដើម្បីបញ្ចប់សង្រ្គាមរ៉ាំរ៉ៃ។ ប្រសិនបើអ្នកចង់បញ្ចប់សង្រ្គាម អ្នកត្រូវតែនិយាយជាមួយភាគីទាំងសងខាង»៕ 
