ជំនឿបានរុញច្រានឱ្យប្រជាពលរដ្ឋរស់នៅក្នុងសហគមន៍ការពារធនធានធម្មជាតិជាំធ្លក ចូលរួមការពារព្រៃឈើ និងសត្វព្រៃ
ភ្នំពេញ៖ នៅក្នុងពិធីមួយរបស់ប្រជាសហគមន៍នៅតំបន់ការពារជាតិជាំធ្លក ត្រូវគេហៅថា «ពិធីឡើងលោកតា» ដើម្បីសុំសេចក្តីសុខសប្បាយនៅក្នុងភូមិលោកតា មាស ទួន ជាព្រឹទ្ធាចារ្យរបស់សហគមន៍ បានឲ្យដឹងថា ពិធីដែលកំពុងធ្វើនេះហៅថាអូតាកួយ ដោយតំបន់នេះមានឈ្មោះតាំងពីដើមឡើយ ពោលគឺមានតាំងចាស់ៗជំនាន់មុនមកម្ល៉េះ។ ដោយមានភ្លេងប្រពៃណីខ្មែរមានទាំងទ្រ ស្គរ និងឧបករណ៍ចំនួនកំពុងលេងដើម្បីសុំសេចក្តីសុខនៅក្នុងភូមិ ក៏ដូចជាសហគមន៍ ដោយមានភ្លេងបែបអារក្ស ភ្លេងអន្ទងឲ្យចូលរូប ហើយមានអ្នកច្រៀងរាំផងដែរ។
លោកតា មាស ទួន បានបញ្ជាក់ថា ពួកយើងរៀបចំកម្មវិធីនេះ គឺធ្វើមិនឲ្យកន្លែងនេះរលាយរលត់បានទេ ប្រសិនអត់មានកន្លែងនេះទេ នោះប្រជាជននឹងរលាយរលត់អត់មានជីវិត។ យើងនិយាយរលាយរលត់នេះ សំដៅថាដីទីកន្លែងនេះគឺមានម្ចាស់ បើបាត់បង់នោះ ស្រុកភូមិនេះរលាយមិនសល់នោះទេ។
បើតាម លោកតាព្រឹទ្ធាចារ្យរូបនេះ បានឲ្យដឹងទៀតថា តំបន់ដែលប្រជាជននាំគ្នាប្រារព្ធធ្វើនេះ គឺមានទំហំធំធេងណាស់ ដែលពីដើមឡើយគ្មានអ្នកណាហ៊ានចូលកាប់ព្រៃឈើនោះទេ។ បើអ្នកណាដែលហ៊ានចូលកាប់ព្រៃឈើនៅតំបន់នេះ គឺត្រូវស្លាប់បាត់បង់ជីវិតជាបន្តបន្ទាប់ ព្រោះថានៅតំបន់នេះមានបារមីស័ក្តសិទ្ធិណាស់ក្នុងការគ្រប់គ្រងថែរក្សាការពារ។
លោកតា មាស ទួន បានគូសបញ្ជាក់ថា ការធ្វើពិធីនៅទីកន្លែងនេះ ក៏ដើម្បីចូលរួមអភិរក្សតំបន់នេះ មានទាំងព្រៃឈើ សត្វព្រៃ និងធនធានធម្មជាតិឲ្យបានគង់រង់យូរអង្វែងដល់កូនចៅជំនាន់ក្រោយផងដែរ។
ក្រៅពីប្រជុំគ្នាធ្វើសក្ការៈ អ្នកភូមិនៅទីនោះ ក៏មិនហ៊ានលបលួចកាប់ព្រៃឈើដែរ ដ្បិតបារម្ភអ្នកតាខឹងសម្បា នាំឱ្យជួបគ្រោះភ័យ។ ហេតុផលទាំងនេះ បានជំរុញឱ្យពួកគេចូលរួមការពារព្រៃឈើក្នុងសហគមន៍ខ្លួនយ៉ាងយកចិត្តទុកដាក់។
សហគមន៍តំបន់ការពារធម្មជាតិជាំធ្លក ក្នុងខេត្តកំពង់ធំ បានចូលរួមយ៉ាងសកម្មដាំស្តារព្រៃឈើ ក្នុងតំបន់ព្រៃរិចរិលបង្កើនជីវចម្រុះ ដើម្បីបង្កើនគម្រប់បៃតង។
សូមបញ្ជាក់ថា សហគមន៍តំបន់ការពារធម្មជាតិជាំធ្លក បានបង្កើតឡើងជាផ្លូវការ នៅថ្ងៃទី២៣ ខែកក្កដា ឆ្នាំ២០១០ លើទំហំផ្ទៃដីចំនួន ៥,២០៤ហិកតា ស្ថិតក្នុងភូមិចំនួន៧ និងមាន ប្រជាជនរស់នៅរហូតដល់ ១.១១៣គ្រួសារ។ ការងារសំខាន់ៗរបស់សហគមន៍គឺផ្តោតទៅលើកិច្ចការងារអភិរក្សការអភិវឌ្ឍប្រកបដោយនិរន្តរភាព និងពិសេស គឺការងារដាំស្តារព្រៃ និងការគិតគូរពីចំណូលទ្រទ្រង់ដល់សេដ្ឋកិច្ចក្នុងសហគមន៍ផងដែរ ៕
