ឯកឧត្តម មាន ចាន់យ៉ាដា៖ ការពង្រឹងលើរបៀប របបការងារ និងធ្វើការតាមឋានានុក្រម សាម្គីភាព និងឯកភាពផ្ទៃក្នុងគឺជាចំណុចសំខាន់ដែលមិនត្រូវមើលរំលងឡើយ
ភ្នំពេញ៖ ឯកឧត្តម មាន ចាន់យ៉ាដា អភិបាលខេត្តឧត្តរមានជ័យ តាមរយៈបណ្ដាញសង្គមហ្វេសប៊ុកបានបញ្ជាក់ថា ការពង្រឹងលើរបៀប របបការងារ និងធ្វើការតាមឋានានុក្រម សាម្គីភាព និងឯកភាពផ្ទៃក្នុងគឺជាចំណុចសំខាន់ដែលមិនត្រូវមើលរំលងឡើយ។
នៅរសៀលថ្ងៃទី៤ ខែកុម្ភៈ ឆ្នាំ២០២៥ ឯកឧត្តម មាន ចាន់យ៉ាដា អភិបាលខេត្តឧត្តរមានជ័យ បានអញ្ជើញជួបសំណេះសំណាលជាមួយមន្រ្តីរាជការរបស់រដ្ឋបាលស្រុកបន្ទាយអំពិល នៃខេត្តឧត្តរមានជ័យ។
ឯកឧត្តម មាន ចាន់យ៉ាដាបានលើកឡើងថា ដើម្បីឱ្យការដឹកនាំគ្រប់គ្រងនៅរដ្ឋបាលស្រុកបានល្អប្រសើរ អភិបាលស្រុកត្រូវដឹកនាំបែងចែកការងារ ដល់អភិបាលរងស្រុក នាយករដ្ឋបាល និងមន្ត្រីទាំងអស់ត្រូវពង្រឹងបន្ថែមលើរបៀប របបការងារ និងធ្វើការតាមឋានានុក្រម សាម្គីភាព ឯកភាពផ្ទៃក្នុងអោយបានល្អ។
ឯកឧត្តម មាន ចាន់យ៉ាដាបន្តថា អធិការនគរបាលស្រុកក៏ត្រូវតែយកចិត្តទុកដាក់ការងារ “ភូមិ-ឃុំមានសុវត្ថិភាព” យកចិត្តទុកដាក់លើបងប្អូនប្រជាការពារភូមិ ទប់ស្កាត់រាល់បទល្មើសគ្រប់រូបភាព ជាពិសេសលើក្មេងទំនើង និងគ្រឿងញៀនជាដើម។ រដូវនេះជារដូវប្រាំង អាជ្ញាធរ និងមន្ត្រីជំនាញត្រូវគិតគូរអំពីប្រភពទឹក ថែរក្សាទឹក អូរ បឹងបួរ ដើម្បីយកទឹកស្រោចស្រប់លើដំណាំស្រូវជូនដល់ពលរដ្ឋអោយបានទាន់ពេលវេលា៕
