ឯកឧត្តម សួស យ៉ារ៉ា៖ គណបក្សប្រជាជនកម្ពុជា ជំរុញឱ្យអនុវត្តគោលនយោបាយការបរទេសសំខាន់ៗចំនួន៤ ក្នុងនោះមិនឱ្យមានការជ្រៀតជ្រែកកិច្ចការផ្ទៃក្នុងរបស់កម្ពុជាដាច់ខាត
ភ្នំពេញ៖ ឯកឧត្តម សួស យ៉ារ៉ា អ្នកនាំពាក្យគណបក្សប្រជាជនកម្ពុជា បានលើកឡើងថា អង្គសន្និបាតគណបក្សប្រជាជនកម្ពុជា បានជំរុញឱ្យអនុវត្តយ៉ាងសកម្មនូវទិសដៅគោលនយោបាយការបរទេសសំខាន់ៗចំនួន៤ ក្នុងនោះការអនុវត្តគោលនយោបាយការបរទេសរបស់រាជរដ្ឋាភិបាល នីតិកាលទី៧ មិនផ្លាស់ប្ដូរផ្សេងពីរាជរដ្ឋាភិបាល នីតិកាលទី៦ឡើយ ហើយក៏មិនអនុញ្ញាតឱ្យមានការចូលជ្រៀតជ្រែកកិច្ចការផ្ទៃក្នុងរបស់កម្ពុជាដាច់ខាត។
ឯកឧត្តម សួស យ៉ារ៉ា បានលើកឡើងបែបនេះ ធ្វើឡើងក្នុងសន្និសីទសារព័ត៌មាន បង្ហាញលទ្ធផលសន្និបាតគណបក្សប្រជាជនកម្ពុជា ដែលមានអស់រយៈពេល ២ថ្ងៃ នៅវិមាន ៧មករា នៅល្ងាចថ្ងៃទី២៦ ខែមករា ២០២៥នេះ។
ឯកឧត្តម សួស យ៉ារ៉ា បានបញ្ជាក់ឱ្យដឹងថា អង្គសន្និបាតបានជំរុញការអនុវត្តយ៉ាងសកម្មនូវទិសដៅគោលនយោបាយការបរទេសសំខាន់ៗ រួមមាន៖
ទី១៖ ប្រកាន់ខ្ជាប់នូវនយោបាយការបរទេសឯករាជ្យផ្អែកលើច្បាប់អន្តរជាតិ និងផ្អែកលើផលប្រយោជន៍ជាតិ ជាពិសេសគោរពយ៉ាងម៉ឺងម៉ាត់នូវធម្មនុញ្ញអង្គការសហប្រជាតិ និងរដ្ឋធម្មនុញ្ញរបស់ព្រះរាជាណាចក្រកម្ពុជា។
ទី២៖ មិនអនុញ្ញាតឱ្យមានការជ្រៀតជ្រែកចូលកិច្ចការផ្ទៃក្នុងរបស់កម្ពុជាជាដាច់ខាត និងមិនដោះដូរអធិបតេយ្យរបស់ជាតិជាមួយជំនួយ ឬភាពអនុគ្រោះណាឡើយ។
ទី៣៖ គាំទ្រការសន្ទនា និងការទូតក្នុងការដោះស្រាយជម្លោះដោយសន្តិវិធី ព្រមទាំងប្រកាន់ខ្ជាប់គោលការណ៍ទាំង៣ ក្នុងការចូលរួមក្នុងយុទ្ធសាស្ត្រឥណ្ឌូប៉ាស៊ីហ្វិកនានា ពោលគឺ៖ ១. ជាយុទ្ធសាស្ត្រដែលគាំទ្រដល់សន្តិភាព និងការអភិវឌ្ឍ, ២. មិនប្រើប្រាស់យុទ្ធសាស្ត្រនោះ ដើម្បីប្រឆាំងប្រទេសដទៃ និង៣. គាំទ្រដល់មជ្ឈភាពអាស៊ាន និងទស្សនវិស័យឥណ្ឌូប៉ាស៊ីហ្វិក។
ទី៤៖ បន្តគាំទ្រប្រព័ន្ធពហុភាគីដែលបើកចំហ សេរី បរិយាបន្ន យុត្តិធម៌ មានតម្លាភាព និងផ្អែកលើច្បាប់ តាមរយៈការប្រើប្រាស់ឱ្យអស់ពីសក្តានុពលនូវភាពជាសមាជិករបស់កម្ពុជានៅក្នុងអាស៊ាន ក៏ដូចជាក្នុងអង្គការតំបន់ និងអន្តរជាតិដទៃទៀត រួមចំណែកយ៉ាងសកម្មក្នុងបុព្វហេតុសន្តិភាព និងមនុស្សធម៌។
ឯកឧត្តម សួស យ៉ារ៉ា បានបញ្ជាក់បន្ថែមថា ការអនុវត្តគោលនយោបាយ គឺផ្អែកលើច្បាប់ជាធំ ដើម្បីរក្សានូវសង្គតិភាពនៃរាជរដ្ឋាភិបាលអាណត្តិទី៦ និងរាជរដ្ឋាភិបាលអាណត្តិទី៧ គឺគោលនយោបាយការបរទេសរបស់កម្ពុជាមិនផ្លាស់ប្ដូរទេ ហើយក៏មិនអនុញ្ញាតឱ្យមានការចូលជ្រៀតជ្រែកកិច្ចការផ្ទៃក្នុងរបស់កម្ពុជាឡើយ ៕
