ការវាយប្រហារតាមអាកាសរបស់របបយោធាមីយ៉ាន់ម៉ា បានសម្លាប់មនុស្សយ៉ាងហោចណាស់ ៤០នាក់ ក្នុងភូមិមួយនៅភាគខាងលិចរដ្ឋរ៉ាឃីន
យ៉ាំងហ្គោន៖ បុគ្គលិកសង្គ្រោះម្នាក់ និងក្រុមប្រដាប់អាវុធជនជាតិភាគតិចបានប្រាប់ទីភ្នាក់ងារសារព័ត៌មាន AFP នៅថ្ងៃព្រហស្បតិ៍ទី៩ ខែមករាថា ការវាយប្រហារតាមអាកាសរបស់របបយោធាមីយ៉ាន់ម៉ាបានសម្លាប់មនុស្សយ៉ាងហោចណាស់៤០ នាក់នៅក្នុងភូមិមួយនៅភាគខាងលិចរដ្ឋរ៉ាឃីន។ បច្ចុប្បន្នយោធាមីយ៉ានម៉ា កំពុងប្រើយុទ្ធសាស្ត្ររបស់ក្រុមប្រដាប់អាវុធជនជាតិភាគតិច ដោយប្រើយន្តហោះគ្មានមនុស្សបើកវាយប្រហារ។
កងទ័ពអារ៉ាកាន (AA) កំពុងចូលរួមក្នុងការប្រយុទ្ធយ៉ាងខ្លាំងក្លាជាមួយយោធាដើម្បីគ្រប់គ្រងរដ្ឋរ៉ាឃីន ជាកន្លែងដែលក្រុមប្រដាប់អាវុធនេះបានដណ្តើមយកទឹកដីជាច្រើននៅក្នុងឆ្នាំមុន លើកលែងតែរដ្ឋធានីស៊ីតវេរបស់រដ្ឋរ៉ាឃីន។ ជម្លោះក្នុងរដ្ឋរ៉ាឃីន គឺជាធាតុមួយនៃភាពចលាចលបង្ហូរឈាម ដែលបានលេបត្របាក់មីយ៉ាន់ម៉ា ចាប់តាំងពីយោធាបានទម្លាក់រដ្ឋាភិបាលស៊ីវិលរបស់លោកស្រី អ៊ុងសាន ស៊ូជី នៅក្នុងរដ្ឋប្រហារឆ្នាំ២០២១ ដែលបង្កឱ្យមានការបះបោរប្រដាប់អាវុធយ៉ាងទូលំទូលាយ។
អ្នកនាំពាក្យកងទ័ពអារ៉ាកាន លោក ខាំង ធូខា (Khaing Thu Kha) បានប្រាប់ទីភា្នក់ងារសារព័ត៌មាន AFP ថា យន្តហោះយោធាបានទម្លាក់គ្រាប់បែកលើភូមិក្យូកនីម៉ាវ (Kyauk Ni Maw) នៅលើកោះរ៉ាមរី (Ramree) នៅម៉ោងប្រហែល១:២០ រសៀល (ម៉ោងនៅមីយ៉ាន់ម៉ា) កាលពីថ្ងៃពុធ ដោយបណ្តាលឱ្យមានភ្លើងឆេះផ្ទះជាង៥០០ ខ្នង។ លោកបានថ្លែងថា៖«តាមរបាយការណ៍ដំបូងជនស៊ីវិលស្លូតត្រង់ចំនួន ៤០ នាក់ត្រូវបានសម្លាប់ និង ២០ នាក់បានរងរបួស»។ ទន្ទឹមនឹងនោះ សមាជិកម្នាក់នៃក្រុមជួយសង្គ្រោះក្នុងតំបន់ដែលក្រុមរបស់ពួកគេកំពុងជួយប្រជាជនក្នុងតំបន់បានប្រាប់ AFP ថាមនុស្ស ៤១ នាក់ត្រូវបានសម្លាប់ និង ៥២ នាក់រងរបួស។ អ្នកជួយសង្គ្រោះបាននិយាយក្នុងលក្ខខណ្ឌមិនបញ្ចេញឈ្មោះដើម្បីការពារសុវត្ថិភាពថា៖«នៅពេលនេះ យើងមិនមានថ្នាំ គ្រប់គ្រាន់ដើម្បីព្យាបាលពួកគេទេ ដោយសារការដឹកជញ្ជូនមានភាពលំបាក»។ កោះរ៉ាមរី គឺជាទីតាំងនៃកំពង់ផែសមុទ្រទឹកជ្រៅដែលគាំទ្រដោយប្រទេសចិន ដែលនៅពេលសាងសង់រួចរាល់នឹងបម្រើជាច្រកសម្រាប់រដ្ឋធានីប៉េកាំងទៅកាន់មហាសមុទ្រឥណ្ឌា ទោះបីជាការសាងសង់ត្រូវបានជាប់គាំងដោយសារភាពចលាចលក៏ដោយ។
របបសឹកកំពុងតស៊ូដើម្បីប្រយុទ្ធប្រឆាំងនឹងក្រុមប្រដាប់អាវុធនៅលើរណសិរ្សជាច្រើននៅជុំវិញប្រទេស ស្របពេលដែលរបបនេះត្រូវបានចោទប្រកាន់ជាទៀងទាត់ថាបានវាយប្រហារតាមអាកាស និងកាំភ្លើងធំលើសហគមន៍ជនស៊ីវិល។ ក៏ដូចជា កងកម្លាំងការពារប្រជាជន ដែលដឹកនាំដោយយុវជន ដែលងើបឡើងដើម្បីប្រឆាំងនឹងរដ្ឋប្រហារ យោធាក៏កំពុងប្រយុទ្ធជាមួយក្រុមប្រដាប់អាវុធជនជាតិភាគតិចជាច្រើនដែលបានបង្កើតឡើងជាយូរមកហើយ រួមទាំងក្រុមកងទ័ពអារ៉ាកាន ដែលគ្រប់គ្រងតំបន់ដ៏ធំនៃទឹកដីតាមព្រំដែនរបស់ប្រទេស។
ការវាយប្រហារដោយយន្តហោះគ្មានមនុស្សបើកមានសារសំខាន់ចំពោះជោគជ័យរបស់ក្រុមបះបោរ រួមទាំងការវាយរុញកងទ័ពរបបយោធាចេញពីតំបន់ធំៗនៅភាគខាងជើងនៃប្រទេសមីយ៉ាន់ម៉ា ដែលភាគច្រើននៃពួកគេមានទីតាំងនៅជិតព្រំដែនជាមួយប្រទេសចិន។ ឥឡូវនេះ យោធាចម្លងយុទ្ធសាស្ត្ររបស់ក្រុមប្រដាប់អាវុធជនជាតិភាគតិច ដោយប្រើប្រាស់យន្តហោះគ្មានមនុស្សបើកវាយប្រហារគោលដៅ។
កាលពីខែវិច្ឆិកាឆ្នាំ២០២៤ កម្មវិធីអភិវឌ្ឍន៍របស់អង្គការសហប្រជាជាតិបានព្រមានថា រដ្ឋរ៉ាឃីនកំពុងឆ្ពោះទៅរកគ្រោះទុរ្ភិក្ស ដោយសារការប្រយុទ្ធគ្នាបានបង្អាក់ពាណិជ្ជកម្ម និងផលិតកម្មកសិកម្ម។ អង្គការសហប្រជាជាតិកាលពីសប្តាហ៍មុនបានបង្ហាញថាមនុស្សជាង៣,៥ លាននាក់ត្រូវបានផ្លាស់ទីលំនៅដោយសារជម្លោះនៅក្នុងប្រទេសមីយ៉ាន់ម៉ា កើនឡើងពីចំនួន ១,៥ លាននាក់។ យោងតាមទីភ្នាក់ងារមនុស្សធម៌របស់អង្គការសហប្រជាជាតិ OCHA ទស្សនវិស័យសម្រាប់ឆ្នាំខាងមុខគឺអាក្រក់ជាមួយនឹងមនុស្ស១៩,៩ លាននាក់ ដែលច្រើនជាងមួយភាគបីនៃចំនួនប្រជាជនទំនងជាត្រូវការជំនួយនៅឆ្នាំ២០២៥ នេះ៕
