និយតករទំនាក់ទំនងរបស់ប្រទេសម៉ាឡេស៊ី ផ្តល់អាជ្ញាបណ្ណដល់កម្មវិធី TikTok និង WeChat ឱ្យដំណើរការនៅក្នុងប្រទេស
គូឡាឡាំពួ៖ និយតករទំនាក់ទំនងរបស់ប្រទេសម៉ាឡេស៊ី បានរាយការណ៍ថា ខ្លួនបានផ្តល់អាជ្ញាបណ្ណដល់កម្មវិធីទិកតុក (TikTok) និងវីឆាត (WeChat) ឱ្យដំណើរការនៅក្នុងប្រទេស ក្រោមច្បាប់ប្រព័ន្ធផ្សព្វផ្សាយសង្គមថ្មី ខណៈវេទិកាមួយចំនួនផ្សេងទៀតមិនបានដាក់ពាក្យស្នើសុំអាជ្ញាបណ្ណនៅឡើយ។
ច្បាប់ដែលមានគោលបំណងដោះស្រាយបញ្ហាឧក្រិដ្ឋកម្មតាមអ៊ីនធឺណិត កំពុងកើនឡើង តម្រូវឱ្យប្រព័ន្ធផ្សព្វផ្សាយសង្គម និងសេវាកម្មផ្ញើសារមានអ្នកប្រើប្រាស់ជាង៨ លាននាក់ នៅក្នុងប្រទេសម៉ាឡេស៊ី ត្រូវស្នើសុំអាជ្ញាបណ្ណ ឬប្រឈមមុខនឹងវិធានការផ្លូវច្បាប់។ ច្បាប់នេះ បានចូលជាធរមាននៅថ្ងៃទី១ ខែមករា។
នៅក្នុងសេចក្តីថ្លែងការណ៍ គណៈកម្មាការទំនាក់ទំនង និងពហុព័ត៌មានម៉ាឡេស៊ី បានលើកឡើងថា វេទិកាផ្ញើសារតេលេក្រាម (Telegram) កំពុងស្ថិតក្នុងដំណាក់កាលចុងក្រោយនៃការទទួលបានអាជ្ញាបណ្ណ ខណៈ Meta Platforms ជាម្ចាស់របស់កម្មវិធីហ្វេសប៊ុក អ៊ីនស្តាក្រាម និង WhatsApp ទើបតែចាប់ផ្តើមដំណើរការស្នើសុំអាជ្ញាបណ្ណ។
យ៉ាងណា និយតករបានឱ្យដឹងថា កម្មវិធី X មិនបានដាក់ស្នើទេ ដោយសារតែវេទិកានេះអះអាងថា មូលដ្ឋានអ្នកប្រើប្រាស់ក្នុងស្រុករបស់ខ្លួនមិនឈានដល់កម្រិត៨លាននាក់។
និយតករ ក៏បានឱ្យដឹងដែរថា Google របស់ក្រុមហ៊ុន Alphabet ដំណើរការវេទិកាវីដេអូ YouTube ក៏មិនបានដាក់ពាក្យសុំអាជ្ញាបណ្ណផងដែរ បន្ទាប់ពីមានការព្រួយបារម្ភអំពីមុខងារចែករំលែកវីដេអូរបស់ YouTube និងការចាត់ថ្នាក់របស់វានៅក្រោមច្បាប់អាជ្ញាបណ្ណ។ និយតករបានសង្គត់ធ្ងន់ថា៖«អ្នកផ្តល់វេទិកាដែលបានរកឃើញថា បំពានលើតម្រូវការអាជ្ញាបណ្ណ អាចជាកម្មវត្ថុនៃការស៊ើបអង្កេត និងសកម្មភាពនិយតកម្ម»។
ម៉ាឡេស៊ីបានរាយការណ៍ពីការកើនឡើងយ៉ាងខ្លាំងនៃមាតិកាប្រព័ន្ធផ្សព្វផ្សាយសង្គម ដែលបង្កគ្រោះថ្នាក់នៅដើមឆ្នាំ២០២៤ ហើយបានជំរុញឱ្យក្រុមហ៊ុនប្រព័ន្ធផ្សព្វផ្សាយសង្គម រួមទាំងមេតា និងវេទិកាវីដេអូខ្លីទិកតុក បង្កើនការត្រួតពិនិត្យលើវេទិកាបស់ពួកគេ។
អាជ្ញាធរម៉ាឡេស៊ីចាត់ទុកការលេងល្បែងតាមអ៊ីនធឺណិត ការឆបោក រូបភាពអាសអាភាសរបស់កុមារ ការគំរាមកំហែងតាមអ៊ីនធឺណិត និងខ្លឹមសារទាក់ទងនឹងពូជសាសន៍ សាសនា ថាជាមាតិកាមានមានគ្រោះថ្នាក់។
យោងតាមអ្នកផ្តល់ទិន្នន័យឯករាជ្យ World Population Review កម្មវិធីវីឆាតមានអ្នកប្រើប្រាស់ចំនួន ១២លាននាក់នៅក្នុងប្រទេសម៉ាឡេស៊ី។ យូធូបមានអ្នកប្រើប្រាស់ប្រហែល២៤,១លាននាក់នៅក្នុងប្រទេសម៉ាឡេស៊ីនៅដើមឆ្នាំ២០២៤ អ្នកប្រើប្រាស់ទិកតុក មានចំនួន ២៨,៦៨លាននាក់ មានអាយុចាប់ពី១៨ឆ្នាំឡើងទៅ អ្នកប្រើប្រាស់ហ្វេសប៊ុកមាន ២២,៣៥លាននាក់ និង X មាន៥,៧១លាននាក់៕
