សមាគមសន្តិសុខអ៊ីនធឺណិតជាតិវៀតណាម រាយការណ៍ថា ការឆបោកតាមអ៊ីនធឺណិត បានប៉ះពាល់ដល់អ្នកប្រើប្រាស់ស្មាតហ្វូនម្នាក់ក្នុងចំណោម២២០នាក់ ក្នុងឆ្នាំ២០២៤
ហាណូយ៖ សមាគមសន្តិសុខអ៊ីនធឺណិតជាតិវៀតណាម (NCA) បានរាយការណ៍ថា ការឆបោកតាមអ៊ីនធឺណិត បានប៉ះពាល់ដល់អ្នកប្រើប្រាស់ស្មាតហ្វូនម្នាក់ក្នុងចំណោម២២០នាក់ក្នុងឆ្នាំ២០២៤ និងធ្វើឱ្យជនរងគ្រោះខាតបង់ប្រាក់ចំនួន ១៨,៩ពាន់ពាន់លានដុង ឬត្រូវនឹងប្រមាណ៧៤៤លានដុល្លារអាម៉េរិក ខណៈការក្លែងបន្លំការវិនិយោគលេចឡើងញឹកញាប់ជាងគេ។
សមាគមសន្តិសុខអ៊ីនធឺណិតជាតិវៀតណាម បានស្ទង់មតិអ្នកប្រើប្រាស់អ៊ីនធឺណិតជាង៥៩០០០នាក់ នៅចន្លោះថ្ងៃទី២៨ ខែវិច្ឆិកាដល់ថ្ងៃទី១៤ ខែធ្នូ។ លទ្ធផលចេញផ្សាយនៅថ្ងៃទី១៦ធ្នូ បង្ហាញថា មានតែ៤៥,៦៩ភាគរយនៃជនរងគ្រោះបានរាយការណ៍ពីការឆបោកទៅអាជ្ញាធរ ខណៈ៨៨,៩៨ភាគរយទៀត និយាយថា ពួកគេបានជូនដំណឹងដល់មិត្តភក្តិ និងក្រុមគ្រួសារអំពីការឆបោកនេះ។ នេះ បើ យោង តាម គេហទំព័រ ព័ត៌មាន របស់ រដ្ឋាភិបាល។
វិធីសាស្ដ្រទូទៅបំផុតដែលត្រូវបានប្រើប្រាស់ដោយអ្នកបោកប្រាស់ក្នុងឆ្នាំ២០២៤ រួមមាន៖ «គម្រោងវិនិយោគក្លែងក្លាយ, ការក្លែងបន្លំធ្វើជាមន្ត្រីរដ្ឋាភិបាល ឬអង្គការ, ការផ្ដល់ជូនរង្វាន់ និងការផ្សព្វផ្សាយក្លែងក្លាយ»។
យោងតាមការស្ទង់មតិ៧០,៧២ភាគរយនៃអ្នកប្រើប្រាស់ស្មាតហ្វូន បានជួបប្រទះនឹងវេទិកាហិរញ្ញវត្ថុក្លែងបន្លំ ដែលសន្យាថា នឹងផ្តល់ផលចំណេញខ្ពស់ដោយគ្មានហានិភ័យ។ ទន្ទឹមនឹងនោះ៦២,០៨ភាគរយ បានរាយការណ៍ថា ជនឆបោកបន្លំខ្លួនធ្វើជាមន្ត្រីមកពីនាយកដ្ឋានប៉ូលិស តុលាការ ភ្នាក់ងារពន្ធដារ ឬធនាគារ។ អ្នកបោកប្រាស់ជារឿយៗបានបង្ខិតបង្ខំជនរងគ្រោះឱ្យផ្ទេរប្រាក់ ឬដំឡើងកម្មវិធីមានមេរោគ ក្រោមការក្លែងបន្លំនៃការដោះស្រាយការរំលោភបំពានផ្លូវច្បាប់។
ដោយឡែក៦០,០១ភាគរយបានឱ្យដឹងថា ពួកគេបានទទួលសារមិនច្បាស់លាស់អំពីការឈ្នះរង្វាន់សំខាន់ៗ រួមមានព័ត៌មានលម្អិតមិនច្បាស់លាស់ ឬគួរឱ្យសង្ស័យដែលមានបំណងបោកប្រាស់ពួកគេ។ ជនឆបោកបានប្រើប្រាស់បច្ចេកវិជ្ជាទំនើបៗដូចជា បញ្ញាសិប្បនិម្មិត (AI) ដើម្បីបង្កើតវីដេអូក្លែងក្លាយ ការផ្ញើសារជាសំឡេង ឬ Chatbots ដើម្បីភ្ជាប់ជនរងគ្រោះក្នុងការសន្ទនា។ ប្រព័ន្ធហៅទូរសព្ទដែលមានមូលដ្ឋានលើកុំព្យូទ័រពិសេស ក៏ត្រូវបានប្រើប្រាស់ផងដែរ ដើម្បីជួយសម្រួលដល់ការហៅទូរសព្ទទៅកាន់មនុស្សច្រើននាក់ក្នុងពេលដំណាលគ្នា។
លោក វូ ង៉ុកសឺន (Vu Ngoc Son) ប្រធានផ្នែកបច្ចេកវិទ្យានៅសមាគមសន្តិសុខអ៊ីនធឺណិតជាតិវៀតណាម បានព្រមានថា៖«ការឆបោកតាមអ៊ីនធឺណិតទំនងជានៅតែបន្តកើតមាននៅឆ្នាំ២០២៥។ ទន្ទឹមនឹងវិធានការរបស់អាជ្ញាធរ អ្នកប្រើប្រាស់ក៏ត្រូវតែមានការប្រុងប្រយ័ត្ន និងបង្កើនជំនាញសុវត្ថិភាពតាមអ៊ីនធឺណិតរបស់ពួកគេនៅពេលប្រើប្រាស់អ៊ីនធឺណិត»៕
