រដ្ឋមន្រ្តី ឈាង រ៉ា លើកយកប្រធានបទ៖ ការបង្កើនសមិទ្ធិផលការងារ (performance) របស់បុគ្គល ក្រុមការងារក្នុងវិស័យសុខាភិបាល
ភ្នំពេញ៖ នារសៀលថ្ងៃអង្គារ ២រោច ខែមិគសិរ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៧ ខែធ្នូ ឆ្នាំ២០២៤ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានធ្វើបទបាឋកថាក្នុងវគ្គភាពជាអ្នកដឹកនាំ និងនវានុវត្តន៍ ជូនថ្នាក់ដឹកនាំ និងមន្រ្តីសុខាភិបាលគ្រប់ឋានានុក្រមក្រោមឱវាទក្រសួងសុខាភិបាល តាមប្រព័ន្ធវីដេអូសន្និសីទ (Zoom) ដែលមានសមាសភាពចូលរួមសរុបចំនួន ៤.១៥៣នាក់។
ជាកិច្ចចាប់ផ្តើម ឯកឧត្តមសាស្រ្តាចារ្យរដ្ឋមន្រ្តី បានសំណេះសំណាលជាមួយសិក្ខាកាមនិងបានផ្តល់ជាការណែនាំសម្រាប់ការងារជ្រើសរើសមន្រ្តីបម្រើការងារតាមអង្គភាពក្នុងវិស័យសុខាភិបាល ឱ្យធ្វើការជ្រើសរើសដោយភាពត្រឹមត្រូវជានិច្ចជាកាល។
ជាកិច្ចបន្តឯកឧត្តមសាស្រ្តាចារ្យរដ្ឋមន្រ្តីបានធ្វើបទបាឋកថាលើប្រធានបទ ការបង្កើនសមិទ្ធិផលការងារ (performance) របស់បុគ្គល/ក្រុមការងារក្នុងវិស័យសុខាភិបាល ដោយសង្កត់ធ្ងន់ថា ដើម្បីបង្កើនប្រសិទ្ធិភាពការងារក្នុងវិស័យសុខាភិបាល បុគ្គលិកសុខាភិបាលគ្រប់រូបត្រូវធ្វើការឱ្យចេញជាសមិទ្ធិផល ហើយសមិទ្ធផលទាំងនេះនឹងត្រូវកើតឡើងជាបន្តរបន្ទាប់ មិនមែនគ្រាន់តែកើតឡើងដោយចៃដន្យ ឬម្តងម្កាលនោះទេ។ បន្ថែមពីលើនេះ អ្នកដឹកនាំក្នុងវិស័យសុខាភិបាល ក៏ត្រូវរៀបចំក្រុមការងារឱ្យមានប្រសិទ្ធិភាព សម្រាប់បំពេញការងារតាមអង្គភាពផងដែរ។
ដើម្បីដឹកនាំក្រុមការងារអោយមានប្រសិទ្ធិភាព អ្នកដឹកនាំត្រូវ៖ (១).ចេះប្រែក្លាយការងារពីអតីតកាល អោយក្លាយជាកម្លាំងវិជ្ជមាន និងបន្តរខិតខំកែរលំអរការងារកន្លងមក អោយកាន់តែប្រសើរឡើង, (២).ត្រូវផ្តល់ក្តីសង្ឍឹមដល់សមាជិកក្រុមការងារ និង យកចិត្តទុកដាក់ស្តាប់ ផ្តល់ការគិតគូរនិងជួយដល់បុគ្គលិកដោយក្តីសុច្ចរិត, (៣).មានភាពបត់បែនក្នុងការងារដើម្បីធ្វើអោយក្រុមការងារឬអង្គភាពមានភាពរស់រវើក ឬ ភាពទាក់ទាញអោយមានការចូលរួមកាន់តែច្រើនពីបុគ្គលិកនិងភាគីពាក់ពន្ធ័, (៤).បង្កើតបរិស្ថានការងារដែលរីកចំរើននិងមាននិរន្តរភាពតាមរយៈការជួយគ្នាទៅវិញទៅមក និង(៥).ត្រូវជំរុញអោយមានការរក្សាអោយបាននូវមនសិការវិជ្ជាជីវៈសុខាភិបាលនិងជំរុញអោយក្រុមការងារសម្រេចបានសមិទ្ធផលសម្រាប់វិស័យសុខាភិបាលទាំងមូល។
ដោយមានការអនុញ្ញាតពី ឯកឧត្តមសាស្រ្តាចារ្យ នៅក្នុងសប្តាហ៍នេះក៍មានបទបង្ហាញពីការធ្វើ PDIA សម្រាប់ទាក់ទាញការមកប្រើប្រាស់សេវានៅមន្ទីរពេទ្យបង្អែកស្រុកមេសាង នៃរដ្ឋបាលខេត្តព្រៃវែង ៕
