អគ្គនាយកដ្ឋាន ក.ប.ប. នៃក្រសួងពាណិជ្ជកម្ម រៀបចំវគ្គបណ្ដុះបណ្ដាលផ្ទៃក្នុង ស្តីពី «យន្តការនៃការទទួលនិងដោះស្រាយពាក្យបណ្ដឹង និងនីតិវិធីនៃការស៊ើបអង្កេតបទល្មើស»
ភ្នំពេញ៖ នាថ្ងៃទី១៨ ខែតុលា ឆ្នាំ២០២៤ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ (ក.ប.ប.) នៃក្រសួងពាណិជ្ជកម្ម សហការជាមួយទីភ្នាក់ងារសហប្រតិបត្តិការអាល្លឺម៉ង់ (GIZ) បានរៀបចំវគ្គបណ្តុះបណ្តាលស្តីពី «យន្តការនៃការទទួលនិងដោះស្រាយពាក្យបណ្ដឹង និងនីតិវិធីនៃការស៊ើបអង្កេតបទល្មើស» ក្រោមអធិបតីភាព ឯកឧត្តម ផាន អូន ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយក នៃអគ្គនាយកដ្ឋាន ក.ប.ប. និងលោកស្រី គង់ ដារ៉ែន ទីប្រឹក្សាជាន់ខ្ពស់សម្រាប់កិច្ចសហប្រតិបត្តិការសេដ្ឋកិច្ច និងការអភិវឌ្ឍន៍វិស័យឯកជន (GIZ)។ ដោយមានចូលរួមពី ឯកឧត្តម លោក អគ្គនាយករង លោកប្រធាននាយកដ្ឋាន លោក-លោកស្រីអនុប្រធាននាយកដ្ឋាន លោកប្រធានសាខា ក.ប.ប. រាជធានី ខេត្ត លោក-លោកស្រីប្រធានការិយាល័យថ្នាក់កណ្ដាល លោក-លោកស្រីអនុប្រធានការិយាល័យថ្នាក់កណ្ដាល សរុបចំនួនប្រមាណ ១៧០រូប។
វគ្គបណ្តុះបណ្តាលនាពេលនេះផ្តោតលើប្រធានបទ ដែលរួមមាន៖
(១).នីតិវិធីប្រតិបត្តិស្តង់ដាសម្រាប់ការទទួល និងដោះស្រាយបណ្តឹង
(២).វិធីសាស្រ្តសាកសួរ ប្រមូលភស្តុតាង និងធ្វើកំណត់ហេតុ
(៣).បែបបទនិងនីតិវិធីនៃការត្រួតពិនិត្យនិងស៊ើបអង្កេតក្រោមច្បាប់ស្តីពីកិច្ចការពារអ្នកប្រើប្រាស់
(៤).វេទិកាពិភាក្សាតុមូល ស្តីពីយន្តការទទទួលនិងដោះស្រាយបណ្តឹង ក្រោមច្បាប់ស្ដីពីកិច្ចការពារអ្នកប្រើប្រាស់ និងច្បាប់ស្ដីកិច្ចការប្រកួតប្រជែង របស់នាយកដ្ឋាន និងសាខា ក.ប.ប. រាជធានី ខេត្ត។
គោលបំណងនៃការរៀបចំវគ្គបណ្តុះបណ្តាលនេះ ដើម្បីជំរុញ និងលើកកម្ពស់ការយល់ដឹងបន្ថែមមួយកម្រិតទៀតជូនដល់សិក្ខាកាមទាំងអស់ ព្រមទាំងចែករំលែកបទពិសោធន៍ល្អៗទៅវិញទៅមក និងពិភាក្សាលើបញ្ហាថ្មីៗដែលកំពុងកើតមានពាក់ព័ន្ធនឹងការទទួលនិងដោះស្រាយបណ្តឹង នីតិវិធីនៃការត្រួតពិនិត្យនិងស៊ើបអង្កេត និងការសាកសួរ សម្ភាស ការប្រមូលភស្តុតាង និងការរៀបចំកំណត់ហេតុ ជូនដល់មន្ត្រីនៃអគ្គនាយកដ្ឋាន ក.ប.ប. ដែលទទួលបាននីតិសម្បទាជានគរបាលយុត្តិធម៌ក្រោមសមត្ថកិច្ចរបស់អគ្គនាយកដ្ឋាន ក.ប.ប. ដើម្បីធានាឱ្យការអនុវត្តច្បាប់និងបទប្បញ្ញត្តិទទួលបាននូវប្រសិទ្ធភាពនិងប្រសិទ្ធផល។ វគ្គបណ្តុះបណ្តាលនេះក៏មានការចូលរួមធ្វើបទបង្ហាញដោយ កញ្ញា សុខ វណ្ណសិកា មេធាវីនៃការិយាល័យមេធាវីសិដ្ឋាល័យ លើប្រធានបទ «វិធីសាស្រ្តសាកសួរ ប្រមូលភស្តុតាង និងធ្វើកំណត់ហេតុ» និងវាគ្មិនតំណាងរបស់អគ្គនាយកដ្ឋាន ក.ប.ប. ផងដែរ។
សូមបញ្ជាក់ផងដែរថា នេះជាវគ្គបណ្ដុះបណ្ដាលលើកទី៧ ដែលធ្វើឡើងដើម្បីឆ្លើយតបទៅនឹងកម្មវិធីតេស្តសមត្ថភាព កាលពីថ្ងៃទី១៤-១៦ ខែកុម្ភៈ ឆ្នាំ២០២៤ ដែលអគ្គនាយកដ្ឋាន ក.ប.ប. បានរៀបចំនូវការធ្វើតេស្តសមត្ថភាពមន្រ្តីទាំងអស់នៅអគ្គនាយកដ្ឋាន ក.ប.ប. ក្នុងទិសដៅវាស់ស្ទង់អំពីសមត្ថភាពជាក់ស្តែង ចំណុចខ្លាំង និងចំណុចខ្សោយ ពាក់ព័ន្ធនឹងការយល់ដឹងអំពីច្បាប់ស្តីពីការប្រកួតប្រជែង ច្បាប់ស្តីពីកិច្ចការពារអ្នកប្រើប្រាស់ ច្បាប់ស្តីពីសុវត្ថិភាពម្ហូបអាហារ និងបទប្បញ្ញត្តិពាក់ព័ន្ធ ព្រមទាំងបទពិសោធន៍នៅក្នុងការអនុវត្តច្បាប់របស់មន្ត្រីទាំងអស់។
ហេតុដូចនេះ ក្រោយការធ្វើតេស្តសមត្ថភាព អគ្គនាយកដ្ឋាន ក.ប.ប. សង្កេតឃើញថាមានជំនាញមួយចំនួនទៀត តម្រូវឱ្យមន្ត្រីអនុវត្តច្បាប់របស់អគ្គនាយកដ្ឋាន ក.ប.ប. បំពេញបន្ថែមនិងបន្តពង្រឹងសមត្ថភាព ដើម្បីធានាប្រសិទ្ធភាព នៃការអនុវត្តច្បាប់និងបទប្បញ្ញត្តិពាក់ព័ន្ធ ដែលស្ថិតក្រោមសមត្ថកិច្ចរបស់អគ្គនាយកដ្ឋាន ក.ប.ប. ៕
