ហាណូយ៖ មន្ត្រីរដ្ឋាភិបាលវៀតណាមបានរាយការណ៍ថា ព្យុះសង្ឃរាយ៉ាកជី បានចុះខ្សោយ នៅថ្ងៃអាទិត្យទី៨ ខែកញ្ញានេះ បន្ទាប់ពីបានសម្លាប់មនុស្សយ៉ាងហោចណាស់៣នាក់នៅក្នុងរដ្ឋធានីហាណូយ ដោយបានជន់លិចសង្កាត់ជាច្រើន ធ្វើឱ្យដើមឈើរាប់ពាន់ដើមបាក់ និងបំផ្លាញផ្ទះសម្បែងជាច្រើនខ្នង។
អាជ្ញាធរបានព្រមានពីការបង្អុរភ្លៀងខ្លាំងបន្តទៀត ទឹកជំនន់ភ្លាមៗ និងការរអិលបាក់ដីនៅភាគខាងជើងប្រទេសវៀតណាម ជាកន្លែងដែលព្យុះនេះបានចុះខ្សោយពីព្យុះសង្ឃរាដ៏ខ្លាំងមួយ ដោយបានសម្លាប់មនុស្សយ៉ាងហោចណាស់៧នាក់ និងរាប់សិបនាក់រងរបួស ចាប់តាំងពីបានបោកបក់នៅរសៀលថ្ងៃសៅរ៍ នេះបើយោងតាមការប៉ាន់ស្មានដំបូង។ ព្យុះដ៏មានឥទ្ធិពលបំផុតរបស់អាស៊ីក្នុងឆ្នាំនេះ បានឆក់យកជីវិតមនុស្ស៤នាក់នៅលើកោះហៃណានភាគខាងត្បូងប្រទេសចិន នេះបើយោងតាមការធ្វើបច្ចុប្បន្នភាពចុងក្រោយពីអាជ្ញាធរក្នុងតំបន់។
ការិយាល័យការពារជនស៊ីវិលនៅក្នុងប្រទេសហ្វីលីពីន ជាប្រទេសដំបូងគេដែលព្យុះយ៉ាកជី វាយប្រហារបន្ទាប់ពីបង្កើតកាលពីសប្តាហ៍មុន បានរាយការណ៍ថា ចំនួនអ្នកស្លាប់បានកើនឡើងពី១៦នាក់ ទៅ២០នាក់ ហើយបានឱ្យដឹងថា មនុស្ស២២នាក់នៅតែបាត់ខ្លួន។
ទីភ្នាក់ងារឧតុនិយមវៀតណាមបានរាយការណ៍ថា ព្យុះយ៉ាងជីបានចុះខ្សោយទៅជាព្យុះត្រូពិច ប៉ុន្តែអាជ្ញាធរបានព្រមានអំពីទឹកជំនន់ភ្លាមៗនៅជិតទន្លេតូចៗ និងអូរ និងការរអិលបាក់ដីនៅលើជម្រាលចោតនៃតំបន់ភ្នំភាគខាងជើង និងខេត្តឆ្នេរសមុទ្ទThanh Hoa។ ប្រព័ន្ធផ្សព្វផ្សាយរដ្ឋបានរាយការណ៍ថា អាកាសយានដ្ឋានអន្តរជាតិ Noi Bai នៃរដ្ឋធានីហាណូយ ដែលជាអាកាសយានដ្ឋានដ៏មមាញឹកបំផុតនៅភាគខាងជើងប្រទេសវៀតណាម បានបើកដំណើរការឡើងវិញបន្ទាប់ពីបានបិទកាលពីព្រឹកថ្ងៃសៅរ៍។
មន្ត្រីរដ្ឋាភិបាលបានឲ្យដឹងថា ព្យុះយ៉ាកជីបានបណ្តាលឱ្យមានរលកខ្ពស់រហូតដល់៤ម៉ែត្រនៅក្នុងខេត្តជាប់មាត់សមុទ្ទ ហើយប្រតិបត្តិការជួយសង្គ្រោះសម្រាប់អ្នកបាត់ខ្លួននៅឯសមុទ្ទត្រូវបានគេរំពឹងថា នឹងចាប់ផ្តើមនៅថ្ងៃអាទិត្យនេះ។ នៅហៃណាន ការប៉ាន់ប្រមាណបឋមបង្ហាញពីការខាតបង់សេដ្ឋកិច្ចដ៏ធំ និងការដាច់ចរន្តអគ្គិសនី។
