ភ្នំពេញ៖ កាលពីរសៀលថ្ងៃទី៣ ខែកញ្ញា ឆ្នាំ២០២៤ ឯកឧត្តម សួស យ៉ារ៉ា ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ និងព័ត៌មាន នៃរដ្ឋសភា បានជួបពិភាក្សាការងារជាមួយនឹង លោក Sandar Umar Alam តំណាងអង្គការយូណេស្កូប្រចាំកម្ពុជា ដោយបានការចូលរួមពី ឯកឧត្តម ប៉ាន សូរស័កិ្ត និងឯកឧត្តម ទី សុគន្ធ និងក្រុមការងារអនុគណៈកម្មការប្រតិបត្តិនៃគណៈកម្មការដឹកនាំ និងរៀបចំសម័យប្រជុំពេញអង្គនៃសភាអន្តរជាតិដើម្បីភាពអត់ឱន និងសន្តិភាព (IPTP) លើកទី១១ ដោយបានពិភាក្សាអំពីការអញ្ជើញតំណាងអង្គការយូណេស្កូចូលរួមជាវាគ្មិននៅក្នុងសម័យប្រជុំពេញអង្គ IPTP លើកទី១១ ដែលសភាកម្ពុជា ធ្វើជាម្ចា ស់ផ្ទះនៅខែវិច្ឆិកា ឆ្នាំ២០២៤ខាងមុខនេះ និងគំនិតផ្តួចផ្តើមអំពីសន្តិភាព ដែលកម្ពុជាអាចចែករំលែកបទពិសោធជាក់ស្តែងក្នុងការកសាង និងថែរក្សាសន្តិភាពទៅកាន់ពិភពលោក។
ឯកឧត្តម សួស យ៉ារ៉ា ក៏បានជម្រាបជូនអំពីកិច្ចខិតខំប្រឹងប្រែងរបស់រដ្ឋសភាកម្ពុជា ក្នុងការលើកកម្ពស់តួនាទីរបស់យុវជនតាមរយៈការបង្កើតក្រុមសភាវ័យក្មេងជាយន្តការអចិន្ត្រៃយ៍មួយ ដែលអាចសហការជាមួយនឹងអង្គការយូណេស្កូ ក្នុងការលើកគម្រោងសហប្រតិបត្តិការជាក់ស្តែង អំពីតួនាទីយុវជននៅក្នុងដំណើរឈានចូលក្នុងបរិបទថ្មីនៃសង្គមឌីជីថល។
ភាគីទាំងពីរក៏បានពិភាក្សាអំពីកិច្ចសហប្រតិបត្តិការផ្នែកនីតិប្បញ្ញត្តិ ការចែករំលែកបទពិសោធអំពីការកសាងច្បាប់ និងការអនុវត្តច្បាប់នានា ជាពិសេសការអប់រំ វិទ្យាសាស្ត្រ វប្បធម៌ និងការអភិវឌ្ឍដោយចីរភាព ដែលអង្គការយូណេស្កូកំពុងតែធ្វើការជំរុញរបៀបវារៈនេះផងដែរ ហើយក្រុមប្រឹក្សាវប្បធម៌អាស៊ី (ACC) ដែលជាដៃគូសហប្រតិបត្តិការជាមួយនឹងអង្គការយូណេស្កូ ក៏អាចចូលរួមក្នុងសហប្រតិបត្តិការជាមួយដៃគូពាក់ព័ន្ធ ក្នុងការលើកកម្ពស់វប្បធម៌សន្តិភាពផងដែរ៕
