មន្រ្តីនគរបាលម្នាក់ពលីជីវិត ក្នុងប្រតិបត្តិការបង្ក្រាបមនុស្សបែកថ្នាំ ដោយត្រូវជនល្មើសយកកាំបិតចាក់ទាំងកំរោល
ភ្នំពេញ៖ មន្រ្តីនគរបាលម្នាក់បានពលីជីវិត ក្នុងប្រតិបត្តិការបង្ក្រាបមនុស្សបែកថ្នាំ ដោយត្រូវជនល្មើសយកកាំបិតចាក់ទាំងកំរោល បណ្ដាលឱ្យបាត់បង់ជីវិតទោះបីសមត្ថកិច្ចព្យាយាមដឹកយកទៅសង្គ្រោះអាយុជីវិតនៅមន្ទីរពេទ្យ កាលពីល្ងាចថ្ងៃទី២៩ ខែសីហា ឆ្នាំ២០២៤ ស្ថិតនៅលើផ្លូវ៣០៤ សង្កាត់បឹងកេងកង២។
យោងតាមការបញ្ជាក់ពីមន្ត្រីសមត្ថកិច្ចបានឱ្យដឹងថា ហេតុការណ៍ដ៏រន្ធត់នេះ គឺជនរងគ្រោះដែលមានឈ្មោះ សៅ រក្សា អាយុ២៩ឆ្នាំ ជាមន្ត្រីបុស្តិ៍នគរបាលបឹងកេងកង២ បានព្យាយាមហាមឃាត់ជនបែកថ្នាំដែលកំពុងកាន់កាំបិតនៅដៅឱ្យទម្លាក់ះអាវុធចុះ។ ភ្លាមៗជនបែកថ្នាំដែលមានឈ្មោះ ជលា វ័យប្រមាណ៣០ឆ្នាំ ជាមនុស្សធ្លាប់ជាប់ពន្ធនាគារ និងប្រើប្រាស់ថ្នាំញៀន បានស្ទុះដេញកាប់សមត្ថកិច្ច និងបានយកកាំបិតចុងស្រួចនោះចាក់មកលើមន្ត្រីប៉ុស្តិ៍នគរបាល បណ្តាលឱ្យដេកដួលទៅលើដី និងបានយកកាំភ្លើងដំបងឆករបស់មន្ត្រីនគរបាលនោះអាមេបម្រុងបាញ់ទៅលើសមត្ថកិច្ចផ្សេងទៀត ទើបមានការសម្រេចបាញ់សម្លាប់ជនបែកថ្នាំនោះ ពីសំណាក់មន្ត្រីនគរបាលតែម្ដង។
សូមជម្រាបថា កាលពីថ្ងៃកើតហេតុខាងលើ ប្រភពព័ត៌មានពីកន្លែងកើតហេតុបានឱ្យដឹងថា ជនសង្ស័យជាមនុស្សបែកថ្នាំ បានអុកឡុកក្នុងផ្ទះ ថែមទាំងយកកាំបិតគំរាមចាក់ម្តាយ ទើបក្រុមគ្រួសារសម្រេចចិត្តទាក់ទងទៅសមត្ថកិច្ចប៉ុស្តិ៍នគរបាលបឹងកេងកង២ ដើម្បីសុំកិច្ចអន្តរាគមន៍។ លុះពេលមន្រ្តីសមត្ថកិច្ចចុះមកដល់ទីតាំងកើតហេតុ ក៏ស្រាប់តែជនបែកថ្នាំស្ទុះទៅដេញចាក់សមត្ថកិច្ច បណ្ដាលរងរបួសធ្ងន់ដេកដួលក្នុងថ្លុកឈាម និងបានយកកាំភ្លើងរបស់សមត្ថកិច្ច ដើរស្រែកឡូឡា ភ្លាមៗ សមត្ថកិច្ចជាច្រើនបានចុះដល់ទីតាំងនោះ និងបានឡោមព័ទ្ធ ប៉ុន្តែជនសង្ស័យហាក់មិនញញើតកម្លាំងនគរបាលឡើយ ដោយបានបាញ់តដៃទៅលើសមត្ថកិច្ចជាច្រើនគ្រាប់ ទើបសមត្ថកិច្ចប្រើប្រាស់សិទ្ធិការពារខ្លួន ដើម្បីបញ្ចប់ជីវិតជនបែកថ្នាំនេះតែម្ដង។ បច្ចុប្បន្ន សពមន្ត្រីនគរបាលដែលបានពលីជីវិត ត្រូវបានបញ្ចូនទៅតម្គល់នៅគេហដ្ឋានក្នុងខណ្ឌសែនសុខ ធ្វើបុណ្យតាមប្រពៃណី។
បន្ទាប់ពីទទួលបានដំណឹងដ៏សោកសៅនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា និងឧបនាយករដ្ឋមន្ត្រី អភិសន្តិបណ្ឌិត ស សុខា បានផ្ញើសាររំលែកទុក្ខដល់ក្រុមគ្រួសារសពលោកអនុសេនីយ៍ត្រី សៅ រក្សា មន្ត្រីប៉ុស្តិ៍នគរបាលរដ្ឋបាលបឹងកេងកងទី២នៃអធិការដ្ឋាននគរបាលខណ្ឌបឹងកេងកង ដែលបានពលីជីវិតនៅក្នុងប្រតិបត្តិការបង្ក្រាបបទល្មើសហិង្សា នៅរសៀលថ្ងៃព្រហស្បតិ៍។ សម្តេចនាយករដ្ឋមន្ត្រី បានចាត់ទុកមរណភាពលោកអនុសេនីយ៍ត្រី សៅ រក្សា ថា ជាការបាត់បង់មន្រ្តីនគរបាលដ៏អង់អាចក្លាហាន ដែលបានលះបង់កម្លាំងកាយចិត្ត និងសេចក្តីសុខផ្ទាល់ខ្លួន ដើម្បីបុព្វហេតុសន្តិសុខ សណ្តាប់ធ្នាប់សាធារណ: និងសុវត្ថិភាពសង្គមជាតិ៕
