ឯកឧត្តម សរ សុពុត្រា ប្តេជ្ញាចិត្តបញ្ចប់ការបន្ទោរបង់ពាសវាលពាសកាល (ODF) ក្នុងខេត្តស្ទឹងត្រែង នៅចុងឆ្នាំនេះ
ភ្នំពេញ៖ នាព្រឹកថ្ងៃចន្ទ ទី១៩ ខែសីហា ឆ្នាំ២០២៤ ឯកឧត្តម សរ សុពុត្រា អភិបាល នៃគណៈអភិបាលខេត្តស្ទឹងត្រែង បានទទួលជួបពិភាក្សាការងារជាមួយលោកស្រី ឃ្វីនែត វ៉ង់ នាយិកាប្រចាំប្រទេស នៃអង្គការ ភ្លែនអន្តរជាតិ និងសហការី ស្តីពីនិរន្តរភាពនៃកិច្ចសហប្រតិបត្តិការ និងពិនិត្យការអនុវត្តគម្រោងនៅខេត្តស្ទឹងត្រែង។
ក្នុងឱកាសនៃជំនួបលោកស្រី ឃ្វីនែត វ៉ង់ នាយិកាប្រចាំប្រទេស នៃអង្គការ ភ្លែនអន្តរជាតិ បានលើកឡើង ៥ចំណុច ដើម្បីស្នើសុំកិច្ចសហប្រតិបត្តិការជាមួយរដ្ឋបាលខេត្ត ដូចខាងក្រោម៖
ទី១-ទឹកស្អាត និងអនាម័យ៖ សូមមានការជួយការសម្របសម្រួល និងពន្លឿនការសម្រេចបានស្ថានភាព ODF សម្រាប់ខេត្ត នៅចុងឆ្នាំ២០២៤ ដោយពិនិត្យឃើញថាតំបន់ដាច់ស្រយាលមួយចំនួនពុំទាន់មានបង្គន់ប្រើប្រាស់ ការចូលរួមរបស់មូលដ្ឋានពុំទាន់បានព្រមៗគ្នា។
ទី២-ការងារអប់រំមូលដ្ឋាន៖ កុមារនៅតាមតំបន់ឆ្ងាយៗភាគច្រើនរៀនបានត្រឹមថ្នាក់បឋមសិក្សា ឬអាចទៅមធ្យមសិក្សាបឋមភូមិ តែពុំមានចប់ថ្នាក់ទី៩ ធ្វើឱ្យអត្រានៃការបោះបង់ការសិក្សាក្នុងកម្រិតខ្ពស់ត្រឹមមធ្យមសិក្សាបឋមភូមិ។ ករណីនេះត្រូវជំរុញ លើកទឹកចិត្ត និងគាំទ្ររដ្ឋបាលមូលដ្ឋានក្នុងការដាក់គម្រោងថវិកា និងធនធានដើម្បីកែលម្អគុណភាពនៃការអប់រំ កាត់បន្ថយអត្រាបោះបង់ការសិក្សា និងលើកទឹកចិត្តគ្រួសារ និងយុវជនក្រៅសាលាឱ្យចូលរួមបណ្តុះបណ្តាលជំនាញវិជ្ជាជីវៈ។
ទី៣-ការរៀបការលឿនមុនអាយុ១៥ឆ្នាំ៖ នៅមានបញ្ហានេះកើតឡើង ដែលគ្រប់អ្នកពាក់ព័ន្ធទាំងអស់គួរតែចាត់វិធានការរួមគ្នាដើម្បីអប់រំ និងធ្វើសកម្មភាពឈានទៅលុបបំបាត់ការរៀបការលើកុមារមុនអាយុកំណត់។ រដ្ឋបាលមូលដ្ឋានគួរមានផែនការសកម្មភាពច្បាស់លាស់ដើម្បីរួមចំណែកនូវធនធាន និងថវិកាដែលបានបែងចែកក្នុងគម្រោងផែនការអភិវឌ្ឍន៍និងកម្មវិធីវិនិយោគ ព្រមទាំងមានការណែនាំសម្រាប់ការពារការរៀបអាពាហ៍ពិពាហ៍របស់កុមារមុនវ័យ និងការមានផ្ទៃពោះក្នុងវ័យជំទង់។
ទី៤-ផ្នែកសុខាភិបាលអំពីអាហារូបត្ថម្ភ និងសន្តិសុខស្បៀង (គុណភាពនិងសុវត្ថិភាពស្បៀង)៖ សូមមានការពង្រឹងតួនាទី ភារកិច្ចរបស់ក្រុមការងារថ្នាក់ខេត្តស្តីពីសន្តិសុខស្បៀងអាហារ អាហារូបត្ថម្ភ និងអនាម័យសុខភាព ដើម្បីបញ្ចូលក្នុងរួមចំណែកអន្តរាគមន៍ដ៏ល្អនៃគម្រោងលើកកម្ពស់ការចាប់ផ្តើមគិតគូរពីសុខភាពប្រជាពលរដ្ឋក្នុងមូលដ្ឋានដោយដាក់បញ្ចូលទៅក្នុងផែនការសកម្មភាពប្រចាំឆ្នាំនីមួយៗ។ លើសពីនេះទៀត សូមមានការលើកទឹកចិត្តរដ្ឋបាលក្រុង ស្រុកឱ្យដាក់បញ្ចូលគម្រោងសកម្មភាពអនាម័យសុខភាព និងអាហារូបត្ថម្ភនៅក្នុងកម្មវិធីវិនិយោគបីឆ្នាំរំកិលរបស់ខ្លួនទាំងនៅថ្នាក់ក្រុង ស្រុក និងឃុំ សង្កាត់ដូចមានក្នុងគោលការណ៍ និងបទដ្ឋានគតិយុត្តស្រាប់។
ទី៥-ការលើកកម្ពស់ភាពជាអ្នកដឹកនាំរបស់ក្មេងស្រីដើម្បីផ្សារភ្ជាប់ទំនាក់ទំនងកាន់តែច្រើនទៅនឹងគណៈកម្មាធិការ គ.ក.ស.ក និងកិច្ចការនារីខេត្ត៖ តាមរយៈលើកកម្ពស់ការចូលរួម និងការចូលរួមរបស់យុវជនក្នុងការសម្រេចចិត្ត ដើម្បីដោះស្រាយបញ្ហាដែលប៉ះពាល់ដល់កុមារ និងយុវវ័យ។
ថ្លែងប្រាប់អង្គភាពសារព័ត៌មាន HOT News Asia នាថ្ងៃទី១៩ សីហានេះ ឯកឧត្តម សរ សុពុត្រា អភិបាលខេត្តស្ទឹងត្រែង បានស្វាគមន៍ និងទទួលយកការស្នើសុំរបស់អង្គការ ភ្លែនអន្តរជាតិ ដើម្បីអនុវត្ត ហើយធ្វើការជំរុញឱ្យការងារនេះបានលឿន និងប្តេជ្ញាចិត្តបញ្ចប់នៅចុងឆ្នាំនេះ ដើម្បីឱ្យខេត្តរបស់យើង ជាខេត្តដែលបញ្ចប់ការបន្ទោរបង់ពាសវាលពាសកាល (ODF) ៕
