ក្រុងឈៀងម៉ៃ៖ ចិន នឹងគាំទ្រដល់ការផ្លាស់ប្ដូរលទ្ធិប្រជាធិបតេយ្យនៅក្នុងប្រទេសមីយ៉ាន់ម៉ា និងគាំទ្រផែនការថ្នាក់តំបន់ដើម្បីស្វែងរកផ្លូវចេញពីវិបត្តិដែលកំពុងបន្តកើតឡើងក្នុងប្រទេសអាស៊ីអាគ្នេយ៍នេះ។ នេះបើតាមការអះអាងរបស់រដ្ឋមន្រ្តីការបរទេសចិនលោក វ៉ាង យី នៅថ្ងៃសុក្រទី១៦ខែសីហា ក្នុងអំឡុងពេលទស្សនកិច្ចទៅកាន់ប្រទេសថៃ។
ការអត្ថាធិប្បាយរបស់លោក វ៉ាង នៅក្នុងសន្និសីទសារព័ត៌មានមួយបានកើតឡើង បន្ទាប់ពីលោកបានជួបជាមួយប្រមុខរបបយោធាមីយ៉ាន់ម៉ាលោក មីន អ៊ុងឡាំង ក្នុងអំឡុងពេលទស្សនកិច្ចទៅកាន់ប្រទេសដែលហែកហួរដោយសង្រ្គាមមួយនេះ។ ប្រមុខការទូតចចកចម្បាំងចិនរូបនេះ បានអះអាងនៅក្នុងសុន្ទរកថាមួយថា «ចិនបន្តការប្តេជ្ញាចិត្តរបស់ខ្លួនក្នុងការស្តារសន្តិភាព និងស្ថិរភាពនៅក្នុងប្រទេសមីយ៉ាន់ម៉ាឡើងវិញ»។
ថ្លែងនៅនៅក្នុងកិច្ចប្រជុំថ្នាក់តំបន់នៅប្រទេសថៃលោក វ៉ាង បានបញ្ជាក់ថា ចិនក៏គាំទ្រផែនការសន្តិភាពដែលបានព្រមព្រៀងដោយសមាគមប្រជាជាតិអាស៊ីអាគ្នេយ៍ក្នុងខ្លឹមសារការឯកភាពប្រាំចំណុចផងដែរ ដើម្បីដោះស្រាយវិបត្តិនៅក្នុងប្រទេសមីយ៉ាន់ម៉ា។
ប្រព័ន្ធផ្សព្វផ្សាយដែលគ្រប់គ្រងដោយរបបយោធាកាលពីថ្ងៃព្រហស្បតិ៍ទី១៥សីហា បានរាយការណ៍ថា ចិនបានសន្យាថានឹងគាំទ្រផ្នែកបច្ចេកទេស និងជំនួយសម្រាប់ធ្វើជំរឿន សម្រាប់ការបោះឆ្នោតដែលគ្រោងនឹងធ្វើឡើងនៅឆ្នាំក្រោយ។
គួរជម្រាបថា ប្រទេសមីយ៉ាន់ម៉ាបានស្ថិតរអិលធ្លាក់ចូលទៅក្នុងភាពចលាចលចាប់តាំងពីខែកុម្ភៈឆ្នាំ២០២១ នៅពេលដែលរបបយោធាបានបណ្តេញរដ្ឋាភិបាលស៊ីវិលជាប់ឆ្នោតនៅក្នុងរដ្ឋប្រហារ និងបានទាញប្រទេសនេះចូលទៅក្នុងវិបត្តិដ៏រ៉ាំរ៉ៃ៕
