ឯកឧត្ដម សួស ប្រាថ្នា លើកឡើងពីការងារបង្កើត កែសម្រួល និងកំណត់ព្រំប្រទល់រដ្ឋបាលថ្នាក់ក្រោមជាតិ
ភ្នំពេញ៖ ក្នុងឱកាសអញ្ជើញផ្ដល់កិច្ចសម្ភាសន៍ ស្ដីពី «វឌ្ឍនភាពការងាររបស់ អគ្គនាយកដ្ឋានរដ្ឋបាល ក្រសួងមហាផ្ទៃ» នាថ្ងៃទី១២ ខែសីហា ឆ្នាំ២០២៤នេះ សួស ប្រាថ្នា អគ្គនាយកនៃអគ្គនាយកដ្ឋានរដ្ឋបាល ក្រសួងមហាផ្ទៃ បានលើកឡើងពីការងារបង្កើត កែសម្រួល និងកំណត់ព្រំប្រទល់រដ្ឋបាលថ្នាក់ក្រោមជាតិ ។
ឯកឧត្ដម សួស ប្រាថ្នា បានមានប្រសាសន៍ថា បច្ចុប្បន្នព្រះរាជាណាចក្រកម្ពុជាមាន៖ រាជធានីចំនួន ០១ ខេត្តចំនួន ២៤ ខណ្ឌចំនួន ១៤ ក្រុងចំនួន ៣២ ស្រុកចំនួន ១៦៣ សង្កាត់ចំនួន ២៦៩ ឃុំចំនួន ១.៣៨៣ និងភូមិចំនួន ១៤.៥៨០ (ភូមិបង្កើតថ្មីចំនួន ០៣)។
ឯកឧត្ដមបន្ថែមថា ក្នុងរយៈពេល៦ខែដើមឆ្នាំ២០២៤ដោយផ្អែកលើស្ថានភាពភូមិសាស្ត្រនិងប្រជាសាស្ត្រ ក៏ដូចជាដើម្បីលើកកម្ពស់ប្រសិទ្ធភាពនៃការគ្រប់គ្រងរដ្ឋបាលថ្នាក់ក្រោមជាតិ និងការថែរក្សាសន្តិសុខសណ្តាប់ធ្នាប់សាធារណៈ ព្រមទាំងឆ្លើយតបទៅនឹងតម្រូវការនៃការផ្តល់សេវារដ្ឋបាល សេវាសាធារណៈ និងការអភិវឌ្ឍមូលដ្ឋាន អគ្គនាយកដ្ឋានរដ្ឋបាល បានចុះសិក្សា និងលើកយោបល់ ជូនថ្នាក់ដឹកនាំក្រសួងមហាផ្ទៃដើម្បីលើកសំណើទៅរាជរដ្ឋាភិបាល សម្រេចកែសម្រួលព្រំប្រទល់ រដ្ឋបាលរវាងសង្កាត់ព្រែកអំពិលជាមួយសង្កាត់កោះឧកញ៉ាតី នៃក្រុងអរិយក្សត្រ ខេត្តកណ្តាល, បានបង្កើតក្រុងថ្មីចំនួន០១ ចំណុះរដ្ឋបាលខេត្តសៀមរាប, និងការបង្កើតភូមិថ្មីចំនួន០៣ ចំណុះ រដ្ឋបាលខេត្តបន្ទាយមានជ័យ។
ឯកឧត្ដមអគ្គនាយកបន្តទៀតថា ក្រុង និងភូមិដែលបានបង្កើតថ្មីនេះ ត្រូវបានរៀបចំរចនាសម្ព័ន្ធ និងប្រព័ន្ធគ្រប់គ្រងផ្អែកតាមគោលការណ៍ និងនីតិវិធីដែលបានកំណត់ ដើម្បីដំណើរការការងារក្នុងការ ផ្តល់សេវារដ្ឋបាល សេវាសាធារណៈ និងការថែរក្សាសន្តិសុខ សណ្តាប់ធ្នាប់សាធារណៈ និងការអភិវឌ្ឍមូលដ្ឋានប្រកបដោយចីរភាព។ ទន្ទឹមនេះ បានចុះសិក្សាស្រាវជ្រាវ ស្ថានភាពភូមិសាស្រ្ត ប្រជាសាស្រ្ត សក្តានុពល សេដ្ឋកិច្ច សង្គមលើសំណើសុំបង្កើតក្រុងកំពង់សោម ចំណុះខេត្តព្រះសីហនុ ដើម្បីមានមូលដ្ឋានធ្វើរបាយការណ៍គោរពស្នើសុំគោលការណ៍ពិនិត្យ សម្រេចពីថ្នាក់ដឹកនាំក្រសួងមហាផ្ទៃ និងប្រមុខរាជរដ្ឋាភិបាល។
ឯកឧត្ដមគូសបញ្ជាក់ថា ចំពោះការងារអន្តរាគមន៍ និងការដោះស្រាយ វិវាទដីធ្លី ក្នុងរយៈពេល៦ខែកន្លងមកនេះ អគ្គនាយកដ្ឋានរដ្ឋបាល បានទទួលសំណើជាលាយលក្ខណ៍អក្សរ ពីប្រជាពលរដ្ឋស្នើសុំជួយអន្តរាគមន៍ដោះស្រាយទំនាស់ដីធ្លី ស្នើសុំចុះវាស់វែង កាត់ឆ្វៀលដី ដើម្បីចុះបញ្ជី ចេញប័ណ្ណកម្មសិទ្ធិ ផ្លាស់ប្តូរប័ណ្ណកម្មសិទ្ធិ និងប្តឹងអាជ្ញាធរមូលដ្ឋានចំនួន៥១ករណី ដែលសំណើទាំងនេះក្រសួងមហាផ្ទៃបានបញ្ជូនទៅរដ្ឋបាលរាជធានី ខេត្តដើម្បីពិនិត្យ និងដោះស្រាយ បានចំនួន២ករណី និងរដ្ឋបាលរាជធានី ខេត្តបន្តពិនិត្យ ដោះស្រាយឆ្លើយតបទៅសាមីសំណើ និងធ្វើរបាយការណ៍មកក្រសួងមហាផ្ទៃ អំពីលទ្ធផលសម្រេចបាននៃការដោះស្រាយទាំងនោះ។
ឯកឧត្ដមបន្ថែមថា ចំណែកឯការងារដោះស្រាយសំណើ សំណូមពររបស់មហាជនក្នុង គេហទំព័រហេ្វសប៊ុក អគ្គនាយកដ្ឋានរដ្ឋបាលបានទទួលសំណើ សំណូមពររបស់មហាជនពីក្រុមការងារហ្វេសប៊ុកឯកឧត្តមអភិសន្តិបណ្ឌិត, ហ្វេសប៊ុកសម្តេចក្រឡាហោម និងហ្វេសប៊ុកក្រសួងមហាផ្ទៃ និងបានបញ្ជូនឱ្យរដ្ឋបាលរាជធានី ខេត្ត ដើម្បីពិនិត្យ និងដោះស្រាយ ចំនួន៦៣ករណី។ បច្ចុប្បន្ននេះ រដ្ឋបាលរាជធានី ខេត្តបានធ្វើការពិនិត្យ ដោះស្រាយ និងឆ្លើយតបទៅសាមីសំណើវិញបានចំនួន ១៨ ករណី (២៩%) និងនៅសល់ចំនួន៤៥ករណី (៧១%) កំពុងពិនិត្យ ដោះស្រាយ និងឆ្លើយតបទៅសាមីសំណើវិញ ៕
