៦ខែ ឆ្នាំនេះ អគ្គនាយកដ្ឋានរដ្ឋបាលក្រសួងមហាផ្ទៃ បានពិនិត្យ និងផ្តល់អនុលោមភាពគម្រោង អភិវឌ្ឍន៍ដោយប្រើប្រាស់ថវិកាគុណប្រយោជន៍របស់រដ្ឋបាលរាជធានី ខេត្ត ចំនួន ៧៩គម្រោង មានទឹកប្រាក់ជាង ៣៤,៥លានដុល្លារ
ភ្នំពេញ៖ ឯកឧត្តម សួស ប្រាថ្នា អគ្គនាយកនៃអគ្គនាយកដ្ឋានរដ្ឋបាល ក្រសួងមហាផ្ទៃ បានឲ្យដឹងថា ក្នុងរយៈពេល ៦ខែ ឆ្នាំ២០២៤នេះ អគ្គនាយកដ្ឋានរដ្ឋបាល ក្រសួងមហាផ្ទៃ បានពិនិត្យ និងផ្តល់អនុលោមភាពគម្រោងអភិវឌ្ឍន៍ដោយប្រើប្រាស់ថវិកាគុណប្រយោជន៍របស់រដ្ឋបាលរាជធានី ខេត្ត សរុបចំនួន ៧៩គម្រោង មានទឹកប្រាក់សរុបចំនួន ១៣៨.២២៨.៧៩០.០០០រៀល (មួយរយសាមសិបប្រាំបីប៊ីលានពីររយម្ភៃប្រាំបីលានប្រាំពីររយកៅសិបពាន់រៀលគត់) ស្មើនឹង ៣៤.៥៥៧.១៩៧ ដុល្លារអាម៉េរិក ។
ក្នុងឱកាសអញ្ជើញផ្ដល់កិច្ចសម្ភាសន៍ ស្ដីពី «វឌ្ឍនភាពការងាររបស់ អគ្គនាយកដ្ឋានរដ្ឋបាល ក្រសួងមហាផ្ទៃ» នាថ្ងៃទី១២ ខែសីហា ឆ្នាំ២០២៤នេះ ឯកឧត្តម សួស ប្រាថ្នា បានមានប្រសាសន៍ថា ដើម្បីពង្រឹង និងលើកកម្ពស់ប្រសិទ្ធភាពនៃការអនុវត្តគម្រោងអភិវឌ្ឍន៍ដោយប្រើប្រាស់ថវិកាគុណប្រយោជន៍របស់រដ្ឋបាលរាជធានី ខេត្ត មូលនិធិក្រុង ស្រុក និងមូលនិធិឃុំ សង្កាត់ឱ្យមានតម្លាភាព និងមានសង្គតិភាព ជាមួយផែនការអភិវឌ្ឍន៍រយៈពេល ៥ឆ្នាំ និងកម្មវិធីវិនិ-យោគ៣ឆ្នាំរំកិលរបស់រដ្ឋបាលថ្នាក់ក្រោមជាតិ អគ្គនាយកដ្ឋានរដ្ឋបាល ក្រសួងមហាផ្ទៃ បានតាមដានត្រួតពិនិត្យ និងគាំទ្រដល់ការរៀបចំ និងអនុវត្តគម្រោងអភិវឌ្ឍន៍ប្រចាំឆ្នាំរបស់រដ្ឋបាលថ្នាក់ក្រោមជាតិ រួមមានដូចខាងក្រោម៖
-បានពិនិត្យ និងផ្តល់អនុលោមភាពគម្រោងអភិវឌ្ឍន៍ដោយប្រើប្រាស់ថវិកាគុណប្រយោជន៍របស់រដ្ឋបាលរាជធានី ខេត្ត សរុបចំនួន ៧៩គម្រោង មានទឹកប្រាក់សរុបចំនួន ១៣៨.២២៨.៧៩០.០០០រៀល (មួយរយសាមសិបប្រាំបីប៊ីលានពីររយម្ភៃប្រាំបីលានប្រាំពីររយកៅសិបពាន់រៀលគត់) ស្មើនឹង ៣៤.៥៥៧.១៩៧ ដុល្លារអាម៉េរិក ដែលភាគច្រើនជាគម្រោងស្ថាបនា និងជួសជុលហេដ្ឋារចនាសម្ព័ន្ធរូបវន្ត ដូចជាផ្លូវអ៊ុតកៅស៊ូ AC DBST ផ្លូវបេតុង ស្ពាន អគាររដ្ឋបាល បណ្តាញអគ្គិសនី សួនច្បារសាធារណៈ និងសំណង់សិល្បការនានា។ល។
-បានផ្តល់ការគាំទ្រដល់រដ្ឋបាលក្រុង ស្រុក ក្នុងការរៀបចំ និងអនុវត្តគម្រោងមូលនិធិក្រុង ស្រុក សរុបចំនួន ៥០៩គម្រោង មានទឹកប្រាក់សរុបចំនួន ១៣៥.២២៣លានរៀល ស្មើនឹង៣៤លានដុល្លារអាម៉េរិក ។
-បានផ្តល់ការគាំទ្រដល់រដ្ឋបាលឃុំ សង្កាត់ក្នុងការរៀបចំ និងអនុវត្តគម្រោងមូលនិធិឃុំ សង្កាត់ មានចំនួនសរុប ២.១០៥គម្រោង មានទឹកប្រាក់សរុប ២៩៨.២១៣លានរៀល ស្មើនឹង ៧៥លានដុល្លារអាម៉េរិក ៕
