ឯកឧត្តម ស្វាយ សំអ៊ាង៖ នាពេលកន្លងមកនៃការគ្រប់គ្រង និងឧបត្ថម្ភគាំទ្រដល់គ្រួសារអតីតយុទ្ធជន បានបង្ហាញនូវចីរភាពយ៉ាងច្រើន ក្នុងការដោះស្រាយនូវគោលនយោបាយជូនអតីតយុទ្ធជន
ភ្នំពេញ៖ ឯកឧត្តម ស្វាយ សំអ៊ាង អភិបាល នៃគណៈអភិបាលខេត្តស្ទឹងត្រែង និងជាប្រធានកិត្តិយសសមាគមអតីតយុទ្ធជនកម្ពុជាខេត្ត បានមានប្រសាសន៍ថា នាពេលកន្លងមកនៃការគ្រប់គ្រង និងឧបត្ថម្ភគាំទ្រដល់បងប្អូន និងគ្រួសារអតីតយុទ្ធជន បានបង្ហាញនូវចីរភាពយ៉ាងច្រើន ដោយបានរួមចំណែកក្នុងការដោះស្រាយនូវគោលនយោបាយជូនអតីតយុទ្ធជនរបស់យើង ហើយដែលនឹងត្រូវបន្តយកចិត្ត ទុកដាក់ខ្ពស់ក្នុងការអនុវត្តយន្តការគាំទ្រលើការងារអតីតយុទ្ធជនឱ្យកាន់តែល្អប្រសើរថែមទៀត។
ឯកឧត្តម ស្វាយ សំអ៊ាង បានមានប្រសាសន៍បែបនេះ ក្នុងឱកាសដែលឯកឧត្តមអញ្ជើញចូលរួមក្នុងកិច្ចប្រជុំត្រួតពិនិត្យវឌ្ឍនភាពការងាររបស់សមាគមអតីតយុទ្ធជនកម្ពុជាខេត្ត នាព្រឹថ្ងៃអាទិត្យ ២រោច ខែជេស្ឋ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២៣ ខែមិថុនា ឆ្នាំ២០២៤ ក្រោមអធិបតីភាពឯកឧត្តម នាយឧត្តមសេនីយ៍ កិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា។
ក្នុងឱកាសនោះ ឯកឧត្ដម ស្វាយ សំអ៊ាង អភិបាលខេត្ត បានថ្លែងថា អ្វីដែលជាការកត់សម្គាល់ជាងនេះទៀត លើយន្តការមួយនេះ គឺក្នុងគោលដៅលើកកម្ពស់ ស្មារតី នៃក្តីសង្ឃឹមរបស់បងប្អូនអតីតយុទ្ធជន គ្រួសារ ពលី មរណៈ ពិការ និងសោធននិវត្តន៍ជន ដែលបានលះបង់នូវសាច់ស្រស់ ឈាមស្រស់ ក្នុងបុព្វហេតុជាតិមាតុភូមិ និងប្រជាជននៅគ្រប់ ដំណាក់កាល។
ជាមួយគ្នានេះ ឯកឧត្តមអភិបាលខេត្ត បានគូសបញ្ជាក់ថា ដោយហេតុថាកន្លងមកក៏មានសមាសភាពមួយចំនួន បានផ្ទេរភារកិច្ចទៅ បម្រើការងារនៅស្ថាប័នថ្នាក់ជាតិ ក៏ដូចជាដើម្បីឆ្លើយតបទៅនឹងសំណូមពរការងាររបស់សមាគម អតីតយុទ្ធជនខេត្ត ក្នុងដំណាក់កាលថ្មីនេះ ដែលត្រូវពិនិត្យរៀបចំបំពេញបន្ថែម ស្របតាមគោល ការណ៍លិខិតបទដ្ឋាគតិយុត្តនិងលក្ខន្តិកៈរបស់សមាគមអតីតយុទ្ធជនកម្ពុជាដែលនៅជាធរមាន ៕
