សម្តេចតេជោ ឱ្យកត់ត្រាទុកថា ថ្ងៃទី១៦ ឧសភា ២០២៤ ជាពេលសម្តេចនិយាយដល់ឯករាជ្យភាពខាងនយោបាយ លើបញ្ហាដឹកជញ្ជូនផ្លូវទឹក
ភ្នំពេញ៖ សម្តេចតេជោ ហ៊ុន សែន ប្រធានព្រឹទ្ធសភា បានណែនាំឱ្យកត់ត្រាទុកថាថ្ងៃទី១៦ ខែឧសភា ឆ្នាំ២០២៤ ជាពេលវេលាដែលសម្តេចតេជោ ប្រកាសថា ព្រែកជីកហ្វូណនតេជោ ជាការពង្រឹងឯករាជ្យនយោបាយដឹកជញ្ជូនរបស់កម្ពុជា។
ក្នុងឱកាសថ្លែងសារពិសេស ពាក់ព័ន្ធព្រែកជីក ហ្វូណនតេជោ សម្តេចតេជោ ហ៊ុន សែន បានបន្តថា កម្ពុជា និងវៀតណាម គឺជាប្រទេសក្បែរខាងគ្នា ត្រូវការកសាងទំនាក់ទំនងល្អជាមួយគ្នា តែប្រៀបដូចជាអណ្តាត និងធ្មេញ ជាមិនផុតពីការប៉ះទង្គិចគ្នានោះឡើយ។
សម្តេចតេជោ បញ្ជាក់ថា «ឥលូវនេះកត់ត្រាទុកទៅ ថាថ្ងៃនេះទី១៦ ខែឧសភា ឆ្នាំ២០២៤ លោក ហ៊ុន សែន បាននិយាយដល់ឯករាជ្យភាពខាងនយោបាយ លើបញ្ហាដឹកជញ្ជូនផ្លូវទឹក ដោយមិនត្រូវឱ្យមិត្តភក្តិ ជួបការលំបាកដោយសារយើង ឬយើងជួបការលំបាកដោយសារមិត្តភក្តិ»។
សម្តេចតេជោ ហ៊ុន សែន គូសបញ្ជាក់ថា កង្វល់របស់វៀតណាមពាក់ព័ន្ធព្រែកជីកហ្វូណន-តេជោ មិនមានភាពចាំបាច់នោះឡើយ។ សម្តេចក៏បានអរគុណអ្នកបរិស្ថានវៀតណាម ដែលចេញមកអះអាងថា ទឹកហូរតាមព្រែកជីកហ្វូណនតេជោ អស់បរិមាណតិចតួចបំផុត បើធៀបបរិមាណទឹកកំពុងហូរតាមប្រទេសវៀតណាម នាពេលបច្ចុប្បន្ន ៕
