ឯកឧត្តម ឡាំ ជា អញ្ជើញប្រកាស សមាសភាពគណៈកម្មការអន្តរក្រសួងដើម្បីដោះស្រាយបញ្ហាបាក់ច្រាំងទន្លេបាសាក់ និងព្រែកជ្រៃធំតាមបណ្តោយព្រំដែនកម្ពុជា-វៀតណាម

ភ្នំពេញ៖ ឯកឧត្តម ឡាំ ជា រដ្ឋមន្ត្រីទទួលបន្ទុករដ្ឋលេខាធិការដ្ឋានកិច្ចការព្រំដែន និងជា ប្រធានគណៈកម្មការអន្តរក្រសួង នាថ្ងៃទី៩ ខែមេសា ឆ្នាំ២០២៤ បានអញ្ជើញដឹកនាំប្រជុំប្រកាសសមាសភាពនិងតួនាទីភារកិច្ចក្រុមការងារបច្ចេកទេសនាំមុខពិភាក្សានិងរៀបចំខ្លឹម សារសម្រាប់គណៈកម្មការអន្តរក្រសួង ដើម្បីសិក្សានិងដោះស្រាយបញ្ហាបាក់ច្រាំងទន្លេបាសាក់ និងព្រែកជ្រៃធំតាមបណ្តោយព្រំដែនកម្ពុជា-វៀតណាម ។

គណៈកម្មការខាងលើនេះ មានមុខងារនិងភារកិច្ចដូចខាងក្រោម៖

-សិក្សា ស្រាវជ្រាវ និងវាយតម្លៃអំពីហេតុផលប៉ះពាល់បរិស្ថាននិងសង្គមដែលបណ្តាលមកពីការបាក់ ច្រាំងទន្លេបាសាក់និងព្រែកជ្រៃធំតាមបណ្តោយព្រំដែនកម្ពុជា-វៀតណាម

-ពិភាក្សា ចរចា និងដាក់ចេញដំណោះស្រាយលើបញ្ហាបាក់ច្រាំងទន្លេបាសាក់និងព្រែកជ្រៃធំ
ចាត់វិធានការសមស្របដើម្បីបង្ការនិងទប់ស្កាត់ការបាក់ច្រាំងនៅតាមបណ្តោយព្រំដែនកម្ពុជា-វៀត ណាម ថែរក្សាការពារស្ថិរភាពនៃខ្សែបន្ទាត់ព្រំដែន ច្រាំងព្រំដែន និងបង្គោលព្រំដែន

-សម្របសម្រួល ពិភាក្សា និងចរចាជាមួយភាគីវៀតណាមដើម្បីរិះរកមធ្យោបាយដែលមានលក្ខណៈ បុរេសកម្មក្នុងការដោះស្រាយបញ្ហាបាក់ច្រាំងទន្លេបាសាក់និងព្រែកជ្រៃធំតាមបណ្តោយព្រំដែនកម្ពុជា- វៀតណាម

-រៀបចំនិងអនុវត្តផែនការសកម្មភាពនិងផែនការថវិកា ដើម្បីបង្ការ ទប់ស្កាត់ និងដោះស្រាយបញ្ហាបាក់ ច្រាំងទន្លេបាសាក់និងព្រែកជ្រៃធំតាមបណ្តោយព្រំដែនកម្ពុជា-វៀតណាម

-រៀបចំគម្រោងថវិកាចំណាយលម្អិតសម្រាប់សាងសង់ច្រាំងទន្លេនិងព្រែកនៅទីតាំងបាក់ច្រាំង ដែល ស្ថិតក្នុងស្ថានភាពហានិភ័យជាក់ស្តែង ដើម្បីដាក់ជូនប្រមុខរាជរដ្ឋាភិបាលពិនិត្យ សម្រេច

-តាមដាន ត្រួតពិនិត្យ និងវាយតម្លៃការអនុវត្តគម្រោងនៃការសាងសង់ច្រាំងទន្លេបាសាក់និងព្រែកជ្រៃធំតាមបណ្តោយព្រំដែនកម្ពុជា-វៀតណាម

-រៀបចំរបាយការណ៍ស្តីពីលទ្ធផលសម្រេចបាននិងវឌ្ឍនភាពការងារជូនប្រមុខរាជរដ្ឋាភិបាល

-អនុវត្តភារកិច្ចផ្សេងទៀតតាមការប្រគល់ពីប្រមុខរាជរដ្ឋាភិបាល ៕