សម្តេចធិបតី៖ រាជរដ្ឋាភិបាលរៀបចំផែនការដើម្បីពង្រឹងការផ្តល់សេវារបស់មណ្ឌលសុខភាព និងមន្ទីរពេទ្យបង្អែកឱ្យកាន់តែល្អប្រសើរ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា រាជរដ្ឋាភិបាលនឹងរៀបចំផែនការសកម្មភាពដើម្បីដាក់ឱ្យអនុវត្តដើម្បីពង្រឹងវិស័យសុខាភិបាលសាធារណៈឱ្យកាន់តែមានគុណភាព និងល្អប្រសើរសម្រាប់បម្រើដល់ប្រជាពលរដ្ឋ។

ក្នុងឱកាសអញ្ជើញសម្ពោធដាក់ឱ្យប្រើប្រាស់ សមិទ្ធផលគម្រោងអភិវឌ្ឍន៍ប្រព័ន្ធបង្ហូរទឹកកង្វក់ក្នុងរាជធានីភ្នំពេញ នាព្រឹកថ្ងៃទី២៧ ខែធ្នូ ឆ្នាំ២០២៣នេះ សម្តេចធិបតី ហ៊ុន ម៉ាណែត បានមានប្រសាសន៍ថា ក្នុងរាជរដ្ឋាភិបាលអាណត្តិទី៧នេះ បានបេ្តជ្ញាចិត្តខិតខំលើកកម្ពស់ សុខភាព សមត្ថភាព និងជីវភាពរបស់ប្រជាពលរដ្ឋ។

សម្តេចធិបតី នាយករដ្ឋមន្ត្រី បានថ្លែងថា៖ «ល្ងាចមិញប្រជុំមួយល្ងាចជាមួយឯកឧត្តម ឈាង រ៉ា និងក្រុមការងារ ពង្រឹងវិធានគន្លឹះ ក្នុងការពង្រឹងវិស័យសុខាភិបាលមូលដ្ឋាន ពង្រឹងមណ្ឌលសុខភាព ពេទ្យបង្អែកម្រិត១ កម្រិត២ និងកម្រិត៣ រៀបចំជាផែនការសកម្មភាពដើម្បីដាក់ឱ្យអនុវត្ត ធ្វើយ៉ាងណាជំរុញការរៀបចំមណ្ឌលសុខភាពពេទ្យបង្អែកឱ្យកាន់តែល្អប្រសើរជូនប្រជាពលរដ្ឋ ធ្វើយ៉ាងណាឱ្យសម្ភារ និងថ្នាំឱ្យកាន់តែមានគុណភាពល្អប្រសើរ»។

សម្តេចធិបតី នាយករដ្ឋមន្ត្រី បានបន្តដែរថា ក្នុងយុទ្ធសាស្ត្របញ្ចកោណដែលរដ្ឋាភិបាលអាណត្តិទី៧ បានដាក់ចេញ គឺផ្តោតទៅលើសុខុមាលភាពរបស់ប្រជាពលរដ្ឋ តាមរយៈប្រព័ន្ធជំនួយគាំពារសង្គម និងការពង្រឹង និងបង្កើនកម្រិតសមត្ថភាពក្នុងការព្យាបាលជូនពលរដ្ឋ។ តែយ៉ាងការងារអាទិភាពដែលរាជរដ្ឋាភិបាលត្រូវអនុវត្តនោះគឺការជួយឱ្យសេដ្ឋកិច្ចកម្ពុជាកាន់តែមានកំណើន។

សម្តេចធិបតី មានប្រសាសន៍ដូច្នេះថា ដំណាក់សំខាន់បំផុតដែលរាជរដ្ឋាភិបាលត្រូវធ្វើយ៉ាងម៉េចបង្ការការឈឺស្កាត់របស់ពលរដ្ឋ គឺធ្វើយ៉ាងម៉េចខិតខំបង្កើនសេដ្ឋកិច្ច បង្កើតការងារ បង្កើនចំណូលជូនពលរដ្ឋ ដើម្បីឱ្យអាហារូបត្ថម្ភដល់ពលរដ្ឋបានល្អ ៕