ឯកឧត្តម លី ច័ន្ទតុលា ដឹកនាំគណៈប្រភិភូគណៈមេធាវី ចូលរួមក្នុងពិធីបិទសន្និសីទឡអេស៊ា ប្រចាំឆ្នាំលើកទី៣៦ និងចូលរួមក្នុងពិធីប្រគល់ពានរង្វាន់នៃការប្រកួតប្រជែងសវនាការប្រតិដ្ឋអន្តរជាតិ លើកទី១៨ របស់ឡអេស៊ា នៅទីក្រុងបឹងហ្គាឡូរ៉ូ

ភ្នំពេញ៖ នាថ្ងៃចន្ទ ១៥កើត ខែកត្តិក ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២៧ ខែវិច្ឆិកា ឆ្នាំ២០២៣ ឯកឧត្តម លី ច័ន្ទតុលា ប្រធានគណៈមេធាវីនៃព្រះរាជាណាចក្រកម្ពុជា បានអញ្ជើញដឹកនាំគណៈប្រភិភូគណៈមេធាវី ចូលរួមក្នុងពិធីបិទសន្និសីទឡអេស៊ា ប្រចាំឆ្នាំលើកទី៣៦ (36th LAWASIA CONFERENCE) និងចូលរួមក្នុងពិធីប្រគល់ពានរង្វាន់នៃការប្រកួតប្រជែងសវនាការប្រតិដ្ឋអន្តរជាតិ លើកទី១៨ របស់ឡអេស៊ា (18th LAWASIA INTERNATIONAL MOOT COMPETITION) នៅសណ្ឋាគារ Four Seasons ទីក្រុងបឹងហ្គាឡូរ៉ូ (Bengaluru) ប្រទេសឥណ្ឌា ដោយមានការចូលរួមពីប្រធានឡអេស៊ាលោកស្រី Melissa K Pang អតីតប្រធានឡអេស៊ា សមាជិកប្រតិបត្តិ ប្រធានគណៈមេធាវី និងសមាជិក-សមាជិកាគណៈមេធាវីមកពីប្រទេសក្នុងតំបន់អាស៊ី-ប៉ាស៊ីភិច ដែលមានសមាជិកប្រមាណ៤០ប្រទេស និងមានការផ្ទេរតំណែងប្រធានឡអេស៊ា ពីលោកស្រី Melissa K Pang ទៅលោក Shyam Divan ផងដែរ។

នៅក្នុងពីធីនេះ ក៏មានការប្រកាសពានរង្វាន់នៃការប្រកួតប្រជែងសវនាការប្រតិដ្ឋអន្តរជាតិ លើកទី១៨ របស់ឡអេស៊ា (18th LAWASIA INTERNATIONAL MOOT COMPETITION)។ ក្នុងការប្រកួតប្រជែងនេះ និស្សិតកម្ពុជា មកពីសាកលវិទ្យាល័យជាតិគ្រប់គ្រង ទទួលបានពានរង្វាន់ជ័យលាភីនៃក្រុមដែលមានភាពតស៊ូព្យាយាមល្អបំផុតរបស់ឡអេស៊ា (The LawAsia Best Endeavour Prize)។

ក្នុងឱកាសនោះដែរ ឯកឧត្តម លី ច័ន្ទតុលា ប្រធានគណៈមេធាវីនៃព្រះរាជាណាចក្រកម្ពុជា បានចូលរួមអបអរសាទរជាមួយប្អូនៗនិស្សិតទាំងអស់និងគ្រូដឹកនាំ ព្រមទាំងថតរូបអនុស្សាវរីយ៍ផងដែរ។

គណៈមេធាវីនៃព្រះរាជាណាចក្រកម្ពុជា សូមចូលរួមអបអរសាទរនិស្សិតច្បាប់ដែលមកពីសាកលវិទ្យាល័យជាតិគ្រប់គ្រង ចំពោះសមិទ្ធិផលដ៏ល្អលើកឆាកអន្តរជាតិ និងកិច្ចខិតខំប្រឹងប្រែងរបស់និស្សិតទាំង ៣រូប និងគ្រូដឹកនាំ ក្នុងការប្រកួតប្រជែងតំណាងប្រទេសកម្ពុជា និងសូមលើកទឹកចិត្តដល់និស្សិតច្បាប់កម្ពុជា បន្តចូលរួមក្នុងការប្រកួតប្រជែងកម្រិតអន្តរជាតិផ្សេងៗបន្តទៀត ៕