ជនជាតិថៃ ៤១នាក់ត្រលប់ទៅដល់ប្រទេសវិញ ក្រោយជាប់គាំងដោយសារការប្រយុទ្ធគ្នានៅមីយ៉ាន់ម៉ា
បាងកក៖ កងទ័ពថៃបានឲ្យដឹងថា ជនជាតិថៃចំនួន ៤១នាក់ ដែលជាប់នៅភាគខាងជើងប្រទេសមីយ៉ាន់ម៉ា ចំពេលមានការកើនឡើងនៃការប្រយុទ្ធគ្នារវាងកងទ័ពរដ្ឋាភិបាល និងក្រុមជនជាតិភាគតិចប្រដាប់អាវុធនៅជិតព្រំដែនចិន បានវិលត្រឡប់មកប្រទេសថៃវិញកាលពីថ្ងៃសៅរ៍។
មនុស្សរាប់ម៉ឺននាក់ត្រូវបានផ្លាស់ទីលំនៅនៅទូទាំងប្រទេសមីយ៉ាន់ម៉ា ខណៈដែលរដ្ឋាភិបាលយោធាដែលបានដណ្ដើមអំណាចនៅក្នុងរដ្ឋប្រហារឆ្នាំ២០២១ ប្រយុទ្ធនឹងការវាយលុកដោយសម្របសម្រួលដោយសម្ព័ន្ធភាពនៃក្រុមជនជាតិភាគតិចចំនួនបី និងក្រុមអ្នកតស៊ូគាំទ្រលទ្ធិប្រជាធិបតេយ្យ។
កងទ័ពថៃបាននិយាយនៅក្នុងសេចក្តីថ្លែងការណ៍មួយថា ជនជាតិថៃទាំង ៤១ នាក់បានត្រឡប់មកពីរដ្ឋ Shan នៅច្រកព្រំដែនតាជីលិក-មេសៃ តាមរយៈការសម្របសម្រួលរវាងអាជ្ញាធរថៃ និងកងទ័ពមីយ៉ាន់ម៉ា។
អាជ្ញាធរថៃកំពុងធ្វើមាតុភូមិនិវត្តន៍ជនជាតិថៃយ៉ាងហោចណាស់ ២៦៤ នាក់ដែលជាប់នៅក្បែរក្រុងឡៅកៃ។
អាជ្ញាធរថៃបាននិយាយថា អ្នកដែលជាប់ក្នុងប្រទេសមីយ៉ាន់ម៉ាមួយចំនួនជា “ជនរងគ្រោះនៃការជួញដូរមនុស្ស” ហើយខ្លះទៀតអាចពាក់ព័ន្ធនឹងក្រុមចោរបន្លំទូរគមនាគមន៍។
អាស៊ីអាគ្នេយ៍ រួមទាំងប្រទេសមីយ៉ាន់ម៉ា បានក្លាយជាមជ្ឈមណ្ឌលសម្រាប់ទូរគមនាគមន៍ និងការក្លែងបន្លំតាមអ៊ីនធឺណិតផ្សេងទៀត បើយោងតាមអង្គការសហប្រជាជាតិ ជាមួយនឹងមនុស្សរាប់សែននាក់ត្រូវបានជួញដូរដោយក្រុមឧក្រិដ្ឋជន និងបង្ខំឱ្យធ្វើការនៅក្នុងមជ្ឈមណ្ឌលបោកប្រាស់ និងប្រតិបត្តិការអនឡាញខុសច្បាប់ផ្សេងទៀត។
ការវាយលុកដែលបានចាប់ផ្តើមកាលពីខែមុន និងហៅថា “ប្រតិបត្តិការ ១០២៧” បន្ទាប់ពីកាលបរិច្ឆេទដែលវាត្រូវបានចាប់ផ្តើម គឺជាការវាយប្រហារដ៏ធំបំផុតដែលរបបយោធាបានប្រឈមមុខក្នុងរយៈពេលជាច្រើនឆ្នាំ។
ក្រុមទាំងនោះបានដណ្តើមយកទីក្រុង និងប៉ុស្តិ៍យោធាជាច្រើននៅទូទាំងប្រទេស ហើយបានវាយលុកផ្នែកខ្លះនៃភាគខាងជើងនៃប្រទេសមីយ៉ាន់ម៉ា នៅក្នុងតំបន់ជាប់ព្រំដែនប្រទេសចិន។
ប្រភព៖ Reuters
ប្រែសម្រួលដោយ៖ ឡាយ លីហួ
