នាយករដ្ឋមន្ត្រីកម្ពុជា ប្រាប់រដ្ឋមន្ត្រីការបរទេសអូស្រា្តលី ពីទិដ្ឋភាពនយោបាយ និងការកសាងសង្គមប្រជាធិបតយ្យរបស់កម្ពុជា
ភ្នំពេញ៖ ក្រៅពីកិច្ចពិភាក្សាលើវិស័យដែលជាកម្មវត្ថុនៃកិច្ចសហប្រតិបត្តិការរវាងប្រទេសទាំងពីរ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានពន្យល់បន្ថែមអំពីទិដ្ឋភាពនយោបាយ និងការកសាងសង្គមប្រជាធិបតយ្យរបស់កម្ពុជា ជូនលោកជំទាវ ផេននី វ័ង រដ្ឋមន្រ្តីការបរទេសអូស្រា្តលីផងដែរ។
សម្ដេចធិបតី ហ៊ុន ម៉ាណែត បានថ្លែងបែបនេះក្នុងឱកាសដែលសម្តេច បានជួបពិភាក្សា ជាមួយលោកជំទាវ ផេននី វ័ង រដ្ឋមន្រ្តីការបរទេសអូស្រា្តលី នៅទីស្នាក់ការកណ្ដាល អង្គការសហប្រជាជាតិ នៅទីក្រុងញូវយ៉ក សហរដ្ឋអាមេរិក នាព្រឹកថ្ងៃសុក្រ ៨កើត ខែភទ្របទ ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី២២ ខែកញ្ញា ឆ្នាំ២០២៣។
ជាក់ស្តែង សម្ដេចធិបតី បានលើកឡើងអំពីការចូលរួមដ៏ច្រើនលើសលប់របស់ប្រជាពលរដ្ឋកម្ពុជា នៅក្នុងការបោះឆ្នោតជ្រើសតាំងតំណាងរាស្រ្ត នីតិកាលទី៧ ឆ្នាំ២០២៣ ដែលជាភ័ស្តុតាងមិនអាចប្រកែកបាន នៃការជឿទុកចិត្តរបស់ប្រជាពលរដ្ឋមកលើដំណើរការប្រជាធិបតេយ្យនៅកម្ពុជា។
សម្ដេចធិបតី ក៏បានលើកឡើងបន្ថែមទៀតអំពីជំហរដ៏គត់មត់របស់រាជរដ្ឋាភិបាលក្នុងការបន្តធ្វើឱ្យកាន់តែប្រសើរឡើងនូវសិទ្ធិមនុស្ស និងដំណើរការប្រជាធិបតេយ្យនៅកម្ពុជា រួមមានជាអាទិ៍៖ ការបន្តកែទម្រង់អភិបាលកិច្ច និងប្រព័ន្ធយុត្តិធម៌របស់រាជរដ្ឋាភិបាល ការអនុញ្ញាតឱ្យមានអង្គការក្រៅរដ្ឋាភិបាលរាប់ពាន់ដំណើរការ និងការអនុញ្ញាតបន្តសុពលភាពអាណត្តិអ្នករាយការណ៍ពិសេសទទួលបន្ទុកស្ថានភាពសិទ្ធិមនុស្សនៅកម្ពុជា របស់អង្គការសហប្រជាជាតិនៅកម្ពុជា ខណៈដែលប្រទេសជាច្រើនក្នុងតំបន់មិនអនុញ្ញាតក៏ដោយ ៕
