សម្តេចធិបតី៖ គ្មានសង្គ្រាម បងប្អូនអាចរៀនសូត្រ និងមានការវិនិយោគ តែបើមានសង្គ្រាម លុយជាតិត្រូវយកទៅទិញគ្រាប់ ដើម្បីវាយគ្នា និងសម្លាប់គ្នា

ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានលើកឡើងថា គ្មានសង្គ្រាម បងប្អូនអាចរៀនសូត្រ និងមានការវិនិយោគ តែបើមានសង្គ្រាម លុយជាតិត្រូវយកទៅទិញគ្រាប់ ដើម្បីវាយគ្នា និងសម្លាប់គ្នា។

ក្នុងឱកាសអញ្ជើញចុះជួបសំណេះសំណាលជាមួយកម្មករ និយោជិត ១៨,១០៤នាក់ នៅស្រុកបាទី ខេត្តតាកែវ សម្តេចធិបតី ហ៊ុន ម៉ាណែត មានប្រសាសន៍ថា បើគ្មានសន្តិភាព កុំនិយាយរឿងរោងចក្រទាំង ២៣៣ និងកម្មករជិត ៧ម៉ឺននាក់ បើគ្មានសន្តិភាព កុំនិយាយរឿង ២០៩ដុល្លារ យកមកដាក់ហោប៉ៅ របស់ប្រជាពលរដ្ឋ ជិត ៧ម៉ឺននាក់ ។ សម្ដេចថា នេះយើងនិយាយ ក្នុងវិស័យសហគ្រាស និងក្រុមហ៊ុនផង ទម្រាំតែបងប្អូននៅក្នុងវិស័យធនាគារ វិស័យរដ្ឋបាលផ្សេងៗ មានច្រើនទៅទៀត ។

សម្តេចធិបតីបញ្ជាក់ថា «គ្មានសង្គ្រាម បងប្អូនអាចរៀនសូត្រ និងមានការវិនិយោគ តែបើមានសង្គ្រាមលុយជាតិ ត្រូវយកទៅទិញគ្រាប់ ដើម្បីវាយគ្នា និងសម្លាប់គ្នា រាជរដ្ឋាភិបាល ដឹកនាំដោយគណបក្សប្រជាជនកម្ពុជា ប្តេជ្ញាការពារឲ្យបានសន្តិភាព ទោះក្នុងតម្លៃណាក៏ដោយ ដើម្បីការអភិវឌ្ឍ»។

សម្តេចធិបតី ហ៊ុន ម៉ាណែត ក៏បានថ្លែងថា សង្គ្រាមមិនត្រឹមតែនាំឱ្យប្រជាពលរដ្ឋបែកបាក់គ្នានោះទេ សូម្បីសម្បត្តិដូនតាខ្មែរ ក៏ត្រូវបានប្រាត់ប្រាស់ឆ្ងាយពីប្រទេសជាតិដែរ។ តែសន្តិភាព បានធ្វើឱ្យប្រជាពលរដ្ឋរួបរួមគ្នា ហើយព្រលឹងដូនក៏បានត្រឡប់មកកាន់ប្រទេសវិញដែរ ៕