ឯកឧត្ដម ហ៊ុន ម៉ានី៖ ព្រះរាជវត្តមានដ៏ថ្លៃថ្លាបំផុតរបស់ព្រះមហាក្សត្រ ជាការប្រោះព្រុំពរជ័យ ដល់ស្ថាប័ននីតិបញ្ញត្តិ ក្នុងការចាប់ផ្តើមបេសកកម្មរបស់ខ្លួន
ភ្នំពេញ៖ ឯកឧត្ដម ហ៊ុន ម៉ានី អ្នកតំណាងរាស្ត្រមណ្ឌលខេត្តកំពង់ស្ពឺ នីតិកាលទី៧ បានថ្លែងបញ្ជាក់ថា ព្រះរាជវត្តមានដ៏ថ្លៃថ្លាបំផុត របស់ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃកម្ពុជា យាងជាព្រះរាជាធិបតីភាពដ៏ខ្ពង់ខ្ពស់បំផុត ក្នុងសម័យប្រជុំ លើកដំបូងនៃរដ្ឋសភា នីតិកាលទី៧ គឺជាការប្រោះព្រុំពរជ័យប្រទានដល់ ស្ថាប័ននីតិបញ្ញត្តិក្នុងការចាប់ផ្តើម បេសកកម្មរបស់ខ្លួន។
តាមរយៈបណ្ដាញសង្គមហ្វេសប៊ុក នាថ្ងៃទី២១ សីហានេះ ឯកឧត្ដម ហ៊ុន ម៉ានី បានមានប្រសាសន៍ថា «ទូលព្រះបង្គំយើងខ្ញុំជាតំណាងរាស្រ្ត សូមក្រាបថ្វាយបង្គំ និងសម្តែងថ្វាយនូវកត្តញ្ញូកត្តវេទីថ្វាយព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ដែលស្តេចយាងជាព្រះរាជាធិបតីភាពដ៏ខ្ពង់ខ្ពស់បំផុតបើកសម័យប្រជុំលើកដំបូងនៃរដ្ឋសភា នីតិកាលទី៧» ។
«ព្រះរាជវត្តមានដ៏ថ្លៃថ្លាបំផុតនេះ គឺជាការប្រោះព្រុំពរជ័យប្រទានដល់ស្ថាប័ននីតិបញ្ញត្តិក្នុងការចាប់ផ្តើមបេសកកម្មរបស់ខ្លួន»។
«ទូលព្រះបង្គំជាខ្ញុំនឹងចងចាំព្រះរាជឱង្ការផ្តាំផ្ញើដ៏ថ្លៃថ្លាបំផុតនៃអង្គព្រះករុណាថ្លៃវិសេស ដែលឱ្យតំណាងរាស្រ្តត្រូវទាំងអស់ខិតខំយកអស់សមត្ថភាពដើម្បីបម្រើជាតិ និងប្រជាជន» ៕
