លោកជំទាវ ដាំ ដារីនី៖ ថែរក្សាការពារសន្តិភាព ជាមូលដ្ឋានគ្រឹះក្នុងការអភិវឌ្ឍ មានតែគណបក្សប្រជាជនតែមួយគត់ ដែលនាំមកដោយលំបាកបំផុត
ភ្នំពេញ៖ លោកជំទាវ បណ្ឌិត ដាំ ដារីនី អនុប្រធានក្រុមការងារថ្នាក់កណ្តាចុះមូលដ្ឋានស្រុកត្បូងឃ្មុំ ខេត្តត្បូងឃ្មុំ និង ជាប្រធានក្រុមការងារចុះជួយ ឃុំរកាពប្រាំ មានប្រសាសន៍ថា ថែរក្សាការពារសន្តិភាព ជាមូលដ្ឋានគ្រឹះក្នុងការអភិវឌ្ឍ គឺមានតែគណបក្សប្រជាជនកម្ពុជាតែមួយគត់ ដែលសម្តេចអគ្គមហាសេនាបតីតេជោ ហ៊ុនសែន ប្រធានគណបក្សប្រជាជនកម្ពុជា នាំមកដោយលំបាកបំផុត។ គោលនយោបាយ របស់គណបក្សគឺ ធ្វើអ្វីៗគ្រប់យ៉ាងដេីម្បីបុព្វហេតុជាតិ និងប្រជាជន។
លោកជំទាវ បណ្ឌិត ដាំ ដារីនី មានប្រសាសន៍បែបនេះក្នុងពិធីសំណេះសំណាល បញ្ចូលសមាជិកបក្សថ្មីចំនួន ៨៨៥នាក់ នៅឃុំរកាពប្រាំ ស្រុកត្បូងឃ្មុំ ខេត្តត្បូងឃ្មុំ នាព្រឹកថ្ងៃទី១០ ខែមិថុនា ឆ្នាំ២០២៣។
ថ្លែងក្នុងពិធីសំណេះសំណាល លោកជំទាវ បណ្ឌិត ដាំ ដារីនី ក៏បានពាំនាំនូវការផ្តាំផ្ញើរសួរសុខទុក្ខ និងការនឹករលឹកពីសំណាក់ សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា ជូនចំពោះសមាជិក សមាជិកា បក្សឃុំរកាពប្រាំ និងបានថ្លែងអំណរគុណដល់ សមាជិកបក្ស ទាំងអស់ដែលបន្តគាំទ្រគណបក្សប្រជាជនកម្ពុជា។
លោកជំទាវ បានស្វាគមន៍យ៉ាងកក់ក្តៅ និងបានកោតសរសើរចំពោះសមាជិកបក្សថ្មីទាំង៨៨៥នាក់ ដែលបានសម្រេចចិត្តយ៉ាងត្រឹមត្រូវក្នុងការចូលមករួមរស់ជាមួយគណបក្សប្រជាជនកម្ពុជា។
លោកជំទាវ បានបន្តថា សមិទ្ធផលធំៗជាច្រើនដែលគណបក្សប្រជាជនសម្រេចបានរួមាន ការរំដោះប្រទេសជាតិ ប្រជាជនចេញពីរបបប៉ុលពត នាំមកនូវសិទ្ធិសេរីភាពជូនប្រជាជនឡើងវិញ។ ផ្តើមចេញពីនយោបាយឈ្នះ-ឈ្នះ ដែលបានដាក់ចេញដោយសម្ដេចអគ្គមហាសេនាបតីតេជោ ហ៊ុន សែន កម្ពុជាបានធ្វើឲ្យមាននូវសន្តិភាព ឯកភាពជាតិពេញលេញ ស្ថេរភាពនយោបាយ ដែលធ្វើឱ្យយើងមានឱកាសក្នុងការអភិវឌ្ឍប្រទេសជាតិដូចសព្វថ្ងៃ។
លោកជំទាវប្រធានក្រុមការងារ បានក្រើនរំលឹក ដល់សមាជិកបក្សមានតួនាទីយ៉ាងសំខាន់ក្នុងការខិតខំអនុវត្តឱ្យបានត្រឹមត្រូវតាមកម្មវិធីគោលនយោបាយ និងលក្ខន្តិកៈ របស់គណបក្ស សំដៅការកសាងទំនាក់ទំនងល្អជាមួយប្រជាជននិងខិតខំឃោសនា ផ្សព្វផ្សាយអំពីកម្មវីធីនយោបាយរបស់គណបក្ស ដើម្បីឱ្យប្រជាពលរដ្ឋជឿជាក់លើកការដឹកនាំដ៏ត្រឹមត្រូវរបស់គណបក្សប្រជាជនកម្ពុជា សមាជិកបក្សម្នាក់ ជាសម្លេងឆ្នោត១សន្លឹក។
លោកជំទាវប្រធានក្រុមការងារ បានអំពាវនាវឱ្យសមាជិកបក្សទាំងអស់ត្រូវពិនិត្យ មើលបញ្ជីឈ្មោះបោះឆ្នោតត្រៀមឱ្យបានរួចរាល់នូវឯកសារបម្រើឱ្យការបោះឆ្នោត និងទៅបោះឆ្នោតជូនគណបក្សប្រជាជនកម្ពុជាដែលមានលេខរៀងទី១៨ ទាំងអស់គ្នានៅថ្ងៃទី២៣ ខែកក្កដា ឆ្នាំ២០២៣ នាពេលខាងមុខនេះ ព្រោះសមាជិកបក្សម្នាក់សន្លឹកឆ្នោត០១សន្លឹក។
ក្នុងឱកាសនោះ សមាបក្សចូលថ្មីទាំង ៨៨៥នាក់ ក្នុងម្នាក់ៗទទួលបាន អាវយឺតចំនួន១ មួកចំនួន១ និងថវិកាចំនួន ២ម៉ឺនរៀល ៕
