ប្រតិភូអគ្គស្នងការដ្ឋាននគរបាលជាតិកម្ពុជា ជួបពិភាក្សាការងារជាមួយ ប្រតិភូនគរបាលជាតិសាធារណរដ្ឋកូរ៉េ ពាក់ព័ន្ធកិច្ចសហប្រតិបត្តិការ លើកកម្ពស់សមត្ថភាពមន្រ្តីនគរបាលជាតិកម្ពុជា

ភ្នំពេញ៖ ដោយបានការអនុញ្ញាតដ៏ខ្ពង់ខ្ពស់ពី ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ឯកឧត្តម ឧត្តមសេនីយ៍ឯក ម៉ៅ ពៅ អនុប្រធានសេនាធិការ នាព្រឹកថ្ងៃចន្ទ ១៤រោច ខែផល្គុន ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី២០ ខែមីនា ឆ្នាំ២០២៣ បានដឹកនាំប្រតិភូ អគ្គស្នងការដ្ឋាននគរបាលជាតិ ជួបពិភាក្សាការងារជាមួយ លោក គីម ផុងហ្វុង ប្រធានគ្រប់គ្រងមជ្ឃមណ្ឌលCCTV នៃនគរបាលជាតិសាធារណរដ្ឋកូរ៉េ ពង្រឹងពង្រីកកិច្ចសហប្រតិបត្តិការ លើកកម្ពស់សមត្ថភាព មន្រ្តីនគរបាលជាតិកម្ពុជា នៅអគ្គស្នងការដ្ឋាននគរបាលជាតិ។

ក្នុងកិច្ចប្រជុំខាងលើនេះដែរ ក៏មានការអញ្ជើញចូលរួមពីលោកឧត្តមសេនីយ៍ទោ ប្រធាន-អនុប្រធាននាយកដ្ឋានវិទ្យុទាក់ទង, លោកឧត្តមសេនីយ៍ទោអនុប្រធាននាយកដ្ឋានបច្ចេកទេសវិទ្យាសាស្ត្រ, លោកឧត្តមសេនីយ៍ត្រី ថី វិសាល អនុប្រធាននាយកដ្ឋាននគរបាលចរាចរណ៍ និងសណ្ដាប់ធ្នាប់សារធារណៈ រួមទាំងមន្ត្រីជំនាញពាក់ព័ន្ធជាច្រើនរូបទៀត បានជួបប្រជុំពិភាក្សា ជាមួយលោក គីម ផុងហ្វុង ប្រធានគ្រប់គ្រងប្រតិភូនគរបាលជាតិសាធារណរដ្ឋកូរ៉េ និងសហការី។

ឯកឧត្តម ឧត្តមសេនីយ៍ឯក ម៉ៅ ពៅ បានសម្តែងនូវការស្វាគមន៍ និងក្តីសោមនស្សរីករាយ ចំពោះគណប្រតិភូនគរបាលជាតិសាធារណរដ្ឋកូរ៉េនៅពេលនេះ លោកឧត្តមសេនីយ៍ក៏សូមថ្លែងអំណរគុណដល់ លោក Baek Won Jin ស្ថានតំណាងនគរបាលកូរ៉េប្រចាំនៅកម្ពុជា ដែលបានយកចិត្តទុកដាក់ខ្ពស់ ក្នុងការទំនាក់ទំ និងកិច្ចសហប្រតិបត្តិការដ៏ល្អរវាងនគរបាលជាតិកម្ពុជា និងនគរបាលជាតិសាធារណរដ្ឋកូរ៉េនាពេលកន្លងមក។

ក្នុងជំនួបនេះដែរ ភាគីនគរបាលជាតិសាធារណរដ្ឋកូរ៉េ លោក គីម ផុងហ្វុង ប្រធានប្រតិភូនគរបាលជាតិសាធារណរដ្ឋកូរ៉េ បានលើកឡើងនូវគោលបំណង សំខាន់ទៅលើការងារពង្រឹងកិច្ចសហប្រតិបត្តិការ ក្នុងការលើកកម្ពស់សមត្ថភាពជំនាញបច្ចេកទេសគ្រប់គ្រង វិភាគរូបភាព តាមប្រព័ន្ធ CCTV និងជួយលើការងារកាមេរ៉ាត្រួតពិនិត្យសុវត្ថិភាពតាមដងផ្លូវ នៅបន្ទប់ប្រចាំបញ្ជា របស់អគ្គស្នងការដ្ឋាននគរបាលជាតិ និងការងារបណ្ដុះបណ្ដាលមន្ត្រីជំនាញ បច្ចេកទេស ជាពិសេសការងារធ្វើកោសល្យវិច្ចយលើរូបភាពមួយចំនួន នៅលើកាមេរ៉ាសុវត្ថិភាព ៕