មន្ត្រីជាន់ខ្ពស់ក្រសួងបរិស្ថាន៖ ការដាំដើមកោងកាង មានសារៈសំខាន់ណាស់ ក្នុងការគ្រប់គ្រងធនធានធម្មជាតិ និងការអភិរក្សជីវៈចម្រុះ
ភ្នំពេញ៖ លោកជំទាវ ម៉ុម ថានី រដ្ឋលេខាធិការក្រសួងបរិស្ថាន បានលើកឡើងថា ការដាំដើមកូនកោងកាង ពិតជាមានសារៈសំខាន់ណាស់ ក្នុងការគ្រប់គ្រងធនធានធម្មជាតិ ការអភិរក្សជីវៈចម្រុះ។
ការថ្លែងរបស់លោកជំទាវបានធ្វើឡើង ក្នុងពេលអញ្ជើញដាំដើមកូនកោងចំនួន ២០០០ដើមជាមួយក្រុមការងារនារីក្រសួងបរិស្ថាន នៅក្នុងតំបន់សហគមន៍ ភូមិសាស្រ្តឃុំសំរុង ស្រុកព្រៃនប់ ខេត្តព្រះសីហនុ នៅថ្ងៃទី១៨ ខែមីនា ឆ្នាំ២០២៣ ដើម្បបង្កើនធនធានជីវៈចម្រុះសមុទ្រកម្ពុជា និងជួយរួមចំណែករក្សាតុល្យភាពបរិយាកាស។
លោកជំទាវ ម៉ុម ថានី បានលើកឡើងថា ការដាំកូនកោងកាងនេះ រៀបចំឡើងដោយក្រសួងបរិស្ថាន សហការជាមួយអាជ្ញាខេត្ត ព្រះសីហនុ អង្គភាពពាក់ព័ន្ធនានា រួមជាមួយសហគមន៍ប្រជាពលរដ្ឋនៅក្នុងមូលដ្ឋាន និងពិតជាមានសារៈសំខាន់ណាស់ ក្នុងការគ្រប់គ្រងធនធានធម្មជាតិ ការអភិរក្សជីវៈចម្រុះ ព្រមទាំងលើកស្ទួយជីវភាពរស់នៅរបស់សហគមន៍មូលដ្ឋាន និងជួយការពារបរិស្ថាននៃភពផែនដី។
លោកជំទាវ បានបញ្ជាក់ដែរថា យុទ្ធនាការនេះរៀបចំឡើង ស្របនឹងពិធីអបអរសាទរខួបលើកទី១១២ ទិវាអន្តរជាតិនារី៨មីនា ឆ្នាំ២០២៣ ក្រោមប្រធានបទ “ស្ត្រីរួមគ្នារក្សាសន្តិភាព ដើម្បីកិច្ចអភិវឌ្ឍ ក្នុងយុគសម័យឌីជីថល”។
លោកជំទាវបន្ថែមថា ជាមួយការដាំដើមកោងកាងនេះ នារីក្រសួងបរិស្ថាន បានចូលរួមបង្កើតនូវអនុស្សាវរីយ៍នៅលើទឹកដីខេត្តព្រះសីហនុ ដើម្បីទុកកូនចៅជំនាន់ក្រោយ ព្រមទាំងលើកស្ទួយជីវភាពរស់នៅរបស់សហគមន៍មូលដ្ឋាន និងជួយដល់ភពផែនដី៕
