ភ្នំពេញ៖ លោកជំទាវ ឡោក ខេង តំណាងរាស្ត្រមណ្ឌលរាជធានីភ្នំពេញ និងជាប្រធានគណៈកម្មការទី៨ នៃរដ្ឋសភា នារសៀលថ្ងៃទី៣០ ខែមករា ឆ្នាំ២០២៣ បានអញ្ជើញចុះជួបសំណេះសំណាលជាមួយប្រជាពលរដ្ឋក្នុងសង្កាត់ច្បារអំពៅទី២ ចំនួន ៥៦នាក់ និងគណៈភូមិ ២២នាក់ សរុប ៧៨នាក់ នៅសាលាខណ្ឌច្បារអំពៅ រាជធានីភ្នំពេញ។
ក្នុងឱកាសនោះ លោកជំទាវ ឡោក ខេង បានមានប្រសាសន៍ ជម្រុញលេីកទឹកចិត្តដល់បងប្អូនអោយខិតខំប្រកបមុខរបរទ្រ្រទង់ជីវភាពគ្រួសារ រួមទាំងចូលរួមផ្សព្វផ្សាយនូវគោលនយោបាយរបស់រាជរដ្ឋាភិបាលក្នុងការជួយឧបត្ថម្ភស្ត្រីក្រីក្រ ស្រ្តីមានផ្ទៃពោះ កុមារទៅចាក់វ៉ាក់សាំង ឧបត្ថម្ភសាច់ប្រាក់ក្នុងដំណាក់កាលកូវីដចំពោះប្រជាពលរដ្ឋក្រីក្រដែលប៉ះពាល់ដោយកូវីដ ជារៀងរាល់ខែ ការឧបត្ថម្ភចំពោះប្រជាពលរដ្ឋរងនូវហានិភ័យអតិផរណា ជារៀងរាល់ខែ និងគោលនយោបាយអភិវឌ្ឍជាតិ “មនុស្ស ផ្លូវ ទឹក ភ្លេីង”។
ជាមួយគ្នានេះ លោកជំទាវក៏បានសំណូមពរអោយបងប្អូនប្រជាពលរដ្ឋខិតខំអប់រំកូនចៅអោយខំរៀនសូត្រអោយក្លាយជាធនធានមនុស្សដ៏មានសក្តានុពលដេីម្បីចូលរួមយ៉ាងសកម្មជាមួយរាជរដ្ឋាភិបាលទៅថ្ងៃអនាគត។
ឆ្លៀតក្នុងឱកាសនោះដែរ លោកជំទាវ ឡោក ខេង បានផ្តល់ជូនក្រមា និងឧបត្ថម្ភថវិការបស់សម្ដេចវិបុលសេនាភក្តី សាយ ឈុំ ប្រធានព្រឹទ្ធសភា និងឯកឧត្តម ស៊ឹម កា អនុប្រធានទី១ ព្រឹទ្ធសភា ក្នុងម្នាក់ៗទទួលបានថវិកា ១ម៉ឺនរៀលផងដែរ ៕
