រដ្ឋមន្ត្រីមហាផ្ទៃ ផ្ដល់ទស្សនាទានពីគោលបំណង នៃកំណែទម្រង់វិមជ្ឈការ និងវិសហមជ្ឈការនៅកម្ពុជា ដើម្បីឲ្យរដ្ឋបាល នៅមូលដ្ឋានមានសិទ្ធិ អំណាច និងធនធាន កាន់តែច្រើនក្នុងការបម្រើពលរដ្ឋ

ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានក្រុមក្រុមប្រឹក្សាកីឡាក្រសួងមហាផ្ទៃ បានផ្ដល់ទស្សនាទានអំពីគោលបំណងនៃកំណែទម្រង់វិមជ្ឈការ និងវិសហមជ្ឈការនៅកម្ពុជា ដើម្បីឱ្យរដ្ឋបាលនៅតាមមូលដ្ឋានមានសិទ្ធិ អំណាច និងធនធាន កាន់តែច្រើនក្នុងការបម្រើសេចក្ដីត្រូវការ របស់ប្រជាពលរដ្ឋក្នុងមូលដ្ឋានខ្លួន ។

ក្នុងពិធីសំណេះសំណាលជាមួយថ្នាក់ដឹកនាំ ប្រតិភូ គ្រូបង្វឹក និងកីឡាករ កីឡាការិនី នៃអគ្គលេខាធិការដ្ឋានក្រុមប្រឹក្សាកីឡាក្រសួងមហាផ្ទៃ ប្រារព្ធនៅសាលប្រជុំ នៃសាកលវិទ្យាល័យភូមិន្ទភ្នំពេញ នាថ្ងៃទី៥ ខែមករា ឆ្នាំ២០២៣នេះ សម្ដេច ស ខេង បានគូសបញ្ជាក់ជូនអង្គពិធីអំពី វឌ្ឍនភាពនៃការដឹកនាំជាតិរបស់រាជរដ្ឋាភិបាល មានសម្ដេចតេជោ ហ៊ុន សែន ជាប្រមុខ ដែលរក្សាបានសុខសន្តិភាព និងស្ថិរភាព សន្តិសុខ និងសណ្ដាប់ធ្នាប់សាធារណៈ មានភាពម្ចាស់ការក្នុងការប្រយុទ្ធនឹងជំងឺឆ្លងកូវីដ-១៩ ពិសេសជោគជ័យនៃការដឹកនាំកិច្ចប្រជុំកំពូលអាស៊ានឆ្នាំ២០២២។

ជាមួយគ្នានេះដែរ សម្ដេចក្រឡាហោម ស ខេង ក៏បានបន្តគូសបញ្ជាក់អំពីកិច្ចខិតខំប្រឹងប្រែងរបស់រាជរដ្ឋាភិបាល ក្នុងនោះក៏មានក្រសួងមហាផ្ទៃ ក្នុងកិច្ចការប្រយុទ្ធប្រឆាំងនឹងបទល្មើសប្រឈមៗនៅកម្ពុជា ដូចជាបទល្មើសជួញដូរគ្រឿងញៀនខុសច្បាប់ បទល្មើសជួញដូរមនុស្ស និងបទល្មើសសម្អាតប្រាក់ជាដើម។

សម្ដេចបន្ថែមថា ប្រជាពលរដ្ឋទាំងអស់ រួមទាំងកីឡាករ កីឡាការិនីដែរ សុទ្ធតែមានចំណែកនៅក្នុងការចូលរួម ប្រយុទ្ធប្រឆាំងនឹងបទល្មើសទាំងនេះ និងបទល្មើសផ្សេងទៀតនៅកម្ពុជា ដើម្បីរក្សាបានសន្តិសុខ និងសុវត្ថិភាពសង្គម ព្រមទាំងកិត្តិយសជាតិ ៕