ភ្នំពេញ៖ យោងតាមរបាយការណ៍របស់អគ្គនាយកដ្ឋានកៅស៊ូ បានឲ្យដឹងថា រយៈពេល១១ខែឆ្នាំ២០២២នេះ កម្ពុជារកចំណូលបានជិត៤៧០លានដុល្លារពីការនាំចេញជ័រកៅស៊ូ និងឈើកៅស៊ូទៅទីផ្សារបរទេស។ ក្នុងនោះទទួលបានចំណូលពីការនាំចេញជ័រកៅស៊ូជាង ៤៦៥លានដុល្លារ និងចំណូលពីការនាំចេញឈើកៅស៊ូចំនួនជាង ៣,៨លានដុល្លារ។
ប្រភពបន្តថា រយៈពេល១១ខែឆ្នាំ២០២២ កម្ពុជាបាននាំកៅស៊ូចំនួនជាង ៣សែន២ម៉ឺនតោន គឺកើនឡើងជាង ៩ពាន់តោន ស្មើនឹង ១៩ភាគរយ បើធៀបនឹង១១ខែឆ្នាំមុន។ ជ័រកៅស៊ូគិតត្រឹមខែវិច្ឆិកាមានតម្លៃ ១,២៣១ដុល្លារក្នុងមួយតោន បើធៀបនឹងតម្លៃនៅឆ្នាំមុនធ្លាក់ចុះ ៣១ដុល្លារក្នុងមួយតោន។
ប្រភពបនថែមថា ចំណែកការនាំចេញឈើកៅស៊ូក្នុង១១ខែឆ្នាំនេះមានជាង២៤ម៉ឺនម៉ែត្រគូប។ ផ្ទៃដីដាំកៅស៊ូគិតត្រឹមខែវិច្ឆិកាមានចំនួនជាង ៤០ម៉ឺនហិកតា ក្នុងនោះមានផ្ទៃដីចៀរជ័រកៅស៊ូចំនួនជាង ៣១ម៉ឺនហិកតា ស្មើនឹង ៧៨ភាគរយ និងផ្ទៃដីថែទាំមានជិត ៩ម៉ឺនហិកតា៕
