ស្រ្តីមេម៉ាយម្នាក់ជួបការលំបាក ទទួលបានអំណោយពី ឧត្តមសេនីយ៍ឯក រ័ត្ន ស្រ៊ាង
ភ្នំពេញ៖ លោកវរសេនីយ៍ឯក សៀ ទីន នាយសេនាធិការ កងរាជអាវុធហត្ថ រាជធានីភ្នំពេញ នាព្រឹក ថ្ងៃទី០២ ខែធ្នូ ឆ្នាំ២០២២ បានដឹកនាំក្រុមការងារ នាំយកអំណោយ ជាសម្ភារៈនិងថវិកា ដែលជាជំនួយរបស់ ឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស ជាមេបញ្ជាការ កងរាជអាវុធហត្ថរាជធានីភ្នំពេញ ទៅប្រគល់ជូនដល់ស្ត្រីមេម៉ាយម្នាក់ ឈ្មោះ ថ្លាង សុភាព អាយុ៦២ឆ្នាំ ដែលជួបការលំបាកនិងខ្វះខាត ស្នាក់នៅក្នុងបន្ទប់ជួលលេខ៣៦៣ ផ្លូវ២៧១ស្ទួន ភូមិ០៣ ក្រុម១៧ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។
ស្ត្រីម្នាក់នេះមិនត្រឹមតែលំបាកខ្វះខាតប៉ុណ្ណោះទេ ថែមទាំងជួបរឿងអភ័ព្វគួរឲ្យអាណិតបំផុត ត្បិតកន្លងមក បន្ទាប់ពីធ្លាក់ខ្លួនមេម៉ាយ គាត់ត្រូវទទួលបន្ទុកចិញ្ចឹមកូន០៣នាក់(មានម្នាក់ឈឺ ម្នាក់ពិកាភ្នែក) និងចៅស្រីពិកាជើងម្នាក់ទៀត ក្រោយមកកូនម្នាក់បានស្លាប់ដោយសារជំងឺមហារីក និងកូនម្នាក់ទៀត មិនអាចរកការងារបាន ព្រោះត្រូវជួយមើលបងប្រុសពិកាភ្នែក និងក្មួយស្រីពិកាជើង។
អំណោយដែលបានយកប្រគល់ជូនដល់អ៊ំស្រី រួមមានថវិកាចំនួន ៥០ម៉ឺនរៀល, អង្ករចំនួន ៥០គីឡូក្រាម, មី០១កេស, ត្រីខ០២យួរ, ទឹកស៊ីអីវ០១យួរ, ទឹកត្រី០១យួរ, ទឹកសុទ្ធ០២កេស, ទឹកដោះគោឆៅ០១យួរ, ភេសជ្ជៈ០២កេស, សាច់ជ្រូកផាត់កន្លះគីឡូក្រាម, ត្រីងៀត០១គីឡូក្រាម, សាច់ក្រក០១គីឡូក្រាម, សៀង០១យួរ, មុង០១, ភួយ០១,កន្សែង០១, ខោទឹកនោមចំនួន ២កញ្ចប់, សម្ភារក្មេងលេងចំនួន០៣មុខ និងសម្ភារមួយចំនួនទៀត៕
