ភ្នំពេញ៖ ជនសង្ស័យ ៣នាក់ ត្រូវបានកម្លាំង នៃបញ្ជាការដ្ឋានកងរាជអាវុធហត្ថខេត្តតាកែវ ឃាត់ខ្លួន ជាបន្តបន្ទាប់ ក្រោយពីបានធ្វើការស្រាវជ្រាវ កំណត់មុខសញ្ញាដោយយកចិត្តទុកដាក់បំផុតពីសំណាក់ លោកឧត្តមសេនីយ៍ត្រី សេង មហា មេបញ្ជាការកងរាជអាវុធហត្ថខេត្តតាកែវ។
យោងតាមរបាយការណ៍របស់ លោកអនុសេនីយ៍ទោ ហួត វឿន ប្រធានការិយាល័យប្រឆាំងគ្រឿងញៀន បានឱ្យដឹងថា កាលពីថ្ងៃទី២៣ ខែតុលា ឆ្នាំ២០២២ ដោយទទួលបានបទបញ្ជា លោកឧត្តមសេនីយ៍ត្រី មេបញ្ជាការ និងក្រោមការសម្របសម្រួលនីតិវិធីដោយ លោក ស៊ឹម ជុំសុខហេង ព្រះរាជអាជ្ញារងអមសាលាដំបូងខេត្ត ព្រមទាំងសហការជាមួយ កម្លាំងមូលដ្ឋានអាវុធហត្ថស្រុកសំរោង បានចុះបង្ក្រាបករណីគ្រឿងញៀនជាក់ស្ដែងចំណុចកញ្ចុះលក់គ្រឿងក្លែម ស្ថិតនៅភូមិព្រៃ ខ្លាឃុំជំរះពេន ស្រុកសំរោង ខេត្តតាកែវ។
ឃាត់ខ្លួនជនសង្ស័យបាន១នាក់ (លើកទី១) -ឈ្មោះ ខែម សុភាព (ប)អាយុ៣១ឆ្នាំ ( រក្សាទុកប្រើប្រាស់)។
ក្រោយពីស្ដាប់ចម្លើយជនសង្ស័យឈ្មោះ ខែម សុភាពរួច វេលាម៉ោង ៨:១០នាទី ថ្ងៃទី ២៤/ ១០/២២ ការិយាល័យជំនាញ បានឈានទៅដល់ការ ឃាត់ខ្លួនជនសង្ស័័យបានចំនួន ០១នាក់ (លើកទី២) ឈ្មោះ ជឹម ពិសិដ្ឋ (ប) អាយុ ៣៦ ឆ្នាំ ជនជាតិខ្មែរ ភូមិវាយឈ្នះ ឃុំរវៀង ស្រុកសំរោង ខេត្តតាកែវ។
ក្រោយស្តាប់ចម្លើយជនសង្ស័យឈ្មោះ ជឹម ពិសិដ្ឋ ឆ្លើយសារភាពថា ថ្នាំញៀនដែលសមត្ថកិច្ចដកហូតនេះខ្លួនទិញ ពីឈ្មោះ លីហ៊ ហៅ ឆក វេលាម៉ោង ៩,១០នាទី ថ្ងៃ២៤/១០/២២ ទើបកម្លាំងជំនាញបន្តឃាត់ខ្លួនបាន (លើកទី៣) ឈ្មោះ ធួន លីហ៊ ហៅ ឆក (ប) អាយុ ២៨ឆ្នាំ រស់នៅភូមិតាយឹង ឃុំជំរះពេន ស្រុកសំរោង ខេត្តតាកែវ។
នៅក្នុងប្រតិបត្តិការខាងលើនេះដែរ កម្លាំងសមត្ថកិច្ចបានធ្វើការដកហូតបានវត្ថុមួយចំនួន ផងដែរ។
បច្ចុប្បន្នជនសង្ស័យទាំង ៣នាក់ និងវត្ថុតាងត្រូវបានរក្សាទុក ឃាត់ខ្លួនបណ្ដោះអាសន្ននៅទីបញ្ជាការអាវុធហត្ថខេត្តជំនាញកំពុងសាកសួរកសាងសំណុំរឿងបញ្ជូនទៅសាលាដំបូងខេត្តចាត់ការតាមផ្លូវច្បាប់៕
