លោកជំទាវ ឡោក ខេង ជម្រុញដល់ក្មេងស្រីត្រូវមានក្តីសង្ឃឹម ដើម្បីក្លាយខ្លួនជាអ្នកដឹកនាំ នាពេលអនាគត

ភ្នំពេញ៖ «យុទ្ធនាការនារីវ័យក្មេងឆ្ពោះទៅភាពជាអ្នកដឹកនាំ #Girl2Leader» នាពេលនេះ ត្រូវបានក្រុមសភាជាតិកម្ពុជានៃអ្នកនយោបាយសភាស្ត្រី រៀបចំធ្វើឡើងនៅក្នុងសាលប្រជុំសាលាខេត្តកំពត នាថ្ងៃទី២០ ខែតុលា ឆ្នាំ២០២២ ក្រោមអធិបតីភាពលោកជំទាវ ឡោក ខេង ប្រធានគណៈកម្មការទី៨ នៃរដ្ឋសភា និងជាអនុប្រធានក្រុមសភាជាតិកម្ពុជានៃអ្នកនយោបាយសភាស្ត្រី។​

យុទ្ធនាការនេះ ក៏មានការអញ្ជើញចូលរួមពីសំណាក់ លោកជំទាវ អ៊ុន សុគន្ធា តំណាងរាស្រ្តមណ្ឌលខេត្តកំពត និងជាលេខាធិការគណ:កម្មការទី៤ នៃរដ្ឋសភា និងលោកជំទាវ កង សៅរ៏ធន សមាជិកាព្រឹទ្ធសភា និងលេខាធិការគណ:កម្មការទី៣ព្រឹទ្ធសភា លោកជំទាវ យូ សុគន្ធ អភិបាលរង នៃគណ:អភិបាលខេត្តកំពត ថ្នាក់ដឹកនាំរដ្ឋបាលខេត្តកំពត ព្រមទាំងមន្ត្រី នៃអគ្គលេខាធិការដ្ឋានរដ្ឋសភា ក្រុមការងារមជ្ឈមណ្ឌលសភាអាស៊ី ស្ត្រីនៅមូលដ្ឋានធ្វើការអំពីសមភាពយេនឌ័រ អង្គភាពពាក់ព័ន្ធមួយចំនួនជុំវិញខេត្ត លោកគ្រូ អ្នកគ្រូ សិស្សានុសិស្សនៅក្នុងទីរួមខេត្តកំពតប្រមាណ២៥០នាក់។

យុទ្ធនាការនេះ ធ្វើឡើងក្នុងគោលបំណង ផ្តល់ការណែនាំអំពីជីវិតនយោបាយផ្ទាល់ខ្លួនរបស់សមាជិកាសភា ជាស្ត្រី ទៅដល់នារីវ័យក្មេង និងបង្ហាញដល់នារីវ័យក្មេងថា នយោបាយគឺជាការងាររបស់ស្ត្រី និងជម្រុញឱ្យនារីវ័យក្មេងពិចារណាអនាគតក្នុងភាពជាអ្នកដឹកនាំ ដើម្បីឱ្យនារីវ័យក្មេងចូលរួមក្នុងនយោបាយកាន់តែច្រើន ជាពិសេសសម្រេចបាននូវសមភាពយេនឌ័រ សំដៅជំរុញឱ្យនារីវ័យក្មេងអាចកសាងទំនុកចិត្តលើខ្លួនឯងឱ្យកាន់តែខ្ពស់ មានក្តីសុបិន្តធំ នឹងយកគម្រូតាមអ្នកនយោបាយជាស្ត្រី។

ក្នុងឱកាសវាគ្មិនដែលបានអញ្ជើញចូលរួម បានធ្វើបទបង្ហាញលើកឡើងពីប្រធានបទផ្សេងៗគ្នា ជាមួយនឹងការចែករំលែកពីបទពិសោធន៍ការងារផ្ទាល់ខ្លួនកន្លងមក រហូតបានក្លាយជាសមាជិកាសភា និងបានក្លាយជាអ្នកធ្វើសេចក្តីសម្រេចនៅក្នុងស្ថាប័ន ឬអង្គភាពរបស់ខ្លួន បង្ហាញអំពីតួនាទីភារកិច្ចរបស់សមាជិកាសភា និងបទពិសោធន៍លើការងារមូលដ្ឋាន ចុះអប់រំផ្សាព្វផ្សាយ និងតាមដានការអនុវត្តច្បាប់ ជាពិសេសតួនាទីភារកិច្ចរបស់ក្រុមសភាជាតិកម្ពុជា នៃអ្នកនយោបាយសភាស្ត្រី ក្នុងភាពជាអ្នកដឹកនាំ បានបង្ហាញពីបទពិសោធន៍លើការងារតស៊ូបញ្ហាប្រឈមក្នុងជីវិតរស់នៅ។ ជាមួយគ្នានេះដែរ វាគ្មិនក៏បានបង្ហាញពីការថែរក្សាបរិស្ថាន ដូចជាការកាត់បន្ថយការប្រើប្រាស់ថង់ប្លាស្ទិច ការបែកចែងសំរាម កាត់បន្ថយការប្រើប្រាស់ទឹក អគ្គីសនី ជាដើម។​

យុទ្ធនាការនេះ ជាការឆ្លុះបញ្ចាំងឱ្យឃើញកាន់តែច្បាស់ពីភាពចាំបាច់របស់អ្នកដឹកនាំជាស្ត្រី ក្នុងវិស័យនយោបាយនៅគ្រប់កម្រិត នៃស្ថាប័នជាតិ វិស័យឯកជន ដើរតួនាទីយ៉ាងសំខាន់ក្នុងភាពជាអ្នកដឹកនាំ ជាពិសេសអ្នកធ្វើគោលនយោបាយ ដើម្បីស្របទៅនឹងយុទ្ធសាស្ត្រចតុកោណរបស់រាជរដ្ឋាភិបាលកម្ពុជា ដែលបានចាត់ទុកស្ត្រីជាឆ្អឹងខ្នងនៃសេដ្ឋកិច្ចជាតិ។

គួររម្លឹកថា កម្មវិធីយុទ្ធនាការនារីវ័យក្មេងឆ្ពោះទៅភាពជាអ្នកដឹកនាំ នាពេលនេះ គឺជាលើកទី១០ ដែលក្រុមសភាជាតិកម្ពុជានៃអ្នកនយោបាយសភាស្ត្រី បានរៀបចំកម្មវិធីនេះឡើង សហការរៀបចំដោយ អគ្គលេខាធិការដ្ឋានរដ្ឋសភា មជ្ឈមណ្ឌលសភាអាស៊ី និងលេខាធិការដ្ឋានក្រុមសភាជាតិកម្ពុជានៃអ្នកនយោបាយសភាស្រ្តី ៕